Nefnd í stað verks

Punktar

Ef forsætisráðherra vill láta gera eitthvað, lætur hún gera það. Annars skipar hún nefnd í málið, stundum nefnda vinnuhópur eða þverpólitískur vinnuhópur í fegurðarskyni. Þegar dómsmálaráðherra sýnir eindreginn brotavilja í umgengni við lög og vinnureglur, er hún rekin. Að skipa nefnd sýnir skort Katrínar á vilja til að aga ríkisstjórnina í umgengni við lög. Ríkisstjórnir hafa ítrekað látið undir höfuð leggjast að fara eftir kröfum GRECO, samstarfs Evrópu um að kveða niður spillingu í framkvæmdavaldinu. Nefnd Katrínar Jakobsdóttur eflir ekki traust á stjórnmálum eða stjórnsýslu. Brottrekstur Sigríðar Andersen mundi hins vegar gera það.

Tveir kvenbófar

Punktar

Dómsmála- og forsætisráðherra skilja ekki, að sú fyrri er dæmd lögbrjótur. Hefur í tvígang reynt að skipa flokks-kvígildi í stöðu dómara. Svipað hafa pólitískir bófar reynt að gera í Austur-Evrópu. Ráðherra getur ekki metið, hvaða lögum hún megi hafna. Getur ekki heldur samið eigin verklagsreglur sér í hag. Í þessu máli skortir ekki verklagsreglur, heldur skortir vilja til að fara að lögum og rétti. Sigríður Andersen er fasisti eins og svo margir félagar bófaflokksins. Hún ræðst gegn lýðræðislegri reglu um sjálfstæði dómstóla. Forsætis getur ekki stutt hana í glæpnum á þeirri forsendu að hún hafi sjálf áður látið slíkan verknað átölulausan.

Ég man Ólaf Thors

Punktar

Man eftir flokki allra stétta hjá Ólafi Thors. Þá voru harðir verkalýðsleiðtogar í forustuliðinu og keyrt var á norræna velferð. Hún var þá að ýmsu leyti betri en núna, þegar jafnvel er skorið niður af barnabótum. Flokkur allra stétta er ekki þekkjanlegur frá þeim tíma. Græðgispólitík nýfrjálshyggju og Davíðsku ítrekar niðurskurð velferðar í samræmi við þá hagtrú, að brauðmolar leki niður á gólf til fátæklinga. Þessi trú hefur verið hagfræðilega afsönnuð, en sumir hægri flokkar halda stíft í hana. Nú er Sjálfstæðisflokkurinn hreinn bófaflokkur, innsti koppur í búri hundrað milljarða þjófnaðar á ári með hækkun í hafi. Undir vernd Katrínar.

Varið ykkur á Isnic

Punktar

Kristín heitin Halldórsdóttir, kona mín, hefur haft opna heimasíðu með ýmsu af rituðu efni hennar. Síðan hvarf 17. desember síðasta. Ástæðan var, að einhver Sigurður hafði yfirtekið síðuna. Isnic, alias Guð, segir mér, að ástæðan sé greiðslufall. Voru þó reikningar vegna kristin.is ekki lengur sendir á heimasíðu mína, jonas.is og mér engar sjáanlegar viðvaranir sendar. Samkvæmt upplýsingum Isnic er þetta ekki afturkallanlegt. Hef ég því opnað nýja heimasíðu kristinh.is með sama efni og var áður á kristin.is. Ég tel, að mál þetta sé dæmi um, að illt er að einkavæða ríkiseinokun. Betra er, að óumflýjanleg einokun sé hjá ríkinu.

Fjölmenn sauðahjörð

Punktar

Viðskiptablaðið hefur eftir Þjóðarpúlsinum, að 74% þjóðarinnar styðji stjórnina. Mín 6000 manna blaðra á fésbókinni segir mér, að 98% þeirra, sem tjá sig, séu andvíg ríkisstjórninni. Er þar þó töluvert af fólki, sem ég ímynda mér að kjósi Vinstri græn. Það er annað hvort andvígt stjórninni eða þegir þunnu hljóði. Hverju á ég að trúa? Játa, að ég hef enga trú á neinu, sem stendur í því ágæta Viðskiptablaði. En hef líka lesið, að blöðrur á fésbókinni geti verið ákaflega sérhæfðar. Verð því að bíða og sjá, hvað aðrar kannanir segja. Svo sannarlega er skrítið að heill flokkur geti snúizt 180° á einum degi. Mikil dauðans sauðahjörð má það vera.

Keypt og selt í pólitík

Punktar

Ásmundur Einar Daðason ráðherra og fjölskylda vaða í lánum. Skulda rúmlega hálfan milljarð, sem hvíla á jörðunum Þverholti og Vindási. Meðal skulda er nýleg skuld upp á 50 milljónir, þar sem ekki er skráður neinn lánveitandi eða handhafi. Það sama gildir raunar um 50 milljónir, sem lánaðar voru Framsóknarflokknum út á hús hans í Reykjavík í formannsíð Sigmundar Davíðs. Þessi framsóknardæmi sýna opnar trektar úr fjármálastofnunum til flokksins. Framsókn hefur löngum háð dýrari kosningabaráttu en aðrir flokkar. Hetjur í fjárglæfrum og Kvíabryggjumenn af því tagi hafa oftast staðið undir taprekstri flokksins. Fyrir pólitísk fríðindi.

Harðsvíruð hægristjórn

Punktar

Ríkisstjórnin hefir ákveðið að lækka auðlindarentu frá litlum og meðalstórum kvótagreifum á þessu ári. Þetta er sama ríkisstjórn og hafnaði hækkun barnabóta og vaxtabóta. Neitar að gera neitt fyrir þá fátækustu, húsnæðislausa, einstæðinga með börn, öryrkja og aldraða. Þetta er ríkisstjórn aukins ójafnaðar. Harðsvíraðri hægristjórn en sú, sem lagði upp laupana í haust. Þetta er ríkisstjórn Katrínar Jakobsdóttir. Sú stjórn er verri en stjórn Bjarna Benediktssonar var í fyrra. Nú má sjá, að Vinstri græn eru gersamlega áhrifalaus aðili að stjórn bófaflokksins. og Katrín er bara gluggaskraut. Mestur hluti flokksins segir bara já og amen.

Tvær tungur Katrínar

Punktar

Katrín Jakobsdóttir laug því um daginn, að meira fé færi í heilsu, velferð og skóla á þessu ári en því fyrra. Hún fær þá skrítnu útkomu með því að jafnsetja krónur ársins 2017 og 2018. Allir vita þó, að krónan breytist að verðgildi milli ára. Það köllum við verðbólgu. Þótt Landspítalinn hækki um nokkrar krónur, verður hann að skera niður þjónustu um hálfan milljarð. Það þýðir, að minna fer í heilsu á þessu ári en því síðasta. Sama gildir um velferð og skóla. Katrín bætti um betur í áramótaávarpi. Sagði „gríðarlega mikilvægt“ að allir njóti velmegunar. Samt fór hún í hina áttina, til minni velmegunar, í fjárlögum ríkisstjórnarinnar.

Sumt er fokking vitað

Punktar

Veit um sumt, sem mun einkenna 2018. Hægfara fjölgun rafbíla og aukin þjónusta við þá. Flutningur á sous-vide tækjum úr íbúðum niður í geymslu, þar sem þau munu rykfalla við hlið fótanuddtækja. Veit meira um sumt, sem ekki mun einkenna 2018. Við höfum ríkisstjórn, sem ver gamla tíma, spillingu, svínarí og hjarðhegðun þingmanna. Katrín sér um það. Ekkert gert í heilsu og skólum. Ekkert gert til að efla stöðu Íslands í umheiminum. Ekkert gert til að íslenzka fylgi með í þróun tækni og tölva. Ekkert gert til að bæta stöðu landsins í tölulegum samanburði þjóða heims. Ekkert til að fá stjórnarskrá, jafnræði eða þá velferð lítilmagnans.

Bara í kvöld

Punktar

Er hættur að horfa á flugelda á gamlárskvöld. Fer að sofa áður en lætin byrja. Set tappa í eyrum og hverf á vit draumanna. Þegar ég var yngri, keypti ég kökur og rakettur í frekar hóflegum mæli. Gamlárskvöldin eru orðin svo mörg, að ég get misst af öllum, sem eftir eru. Hef síður en svo neitt á móti hávaðanum. Njóti þeir, sem yngri eru. Efast um, að þrír tímar af mengun skipti neinu máli. Svo er þetta gott fyrir fjárhag björgunarsveita. Hitt er öllu verra, þegar menn halda eftirleiknum áfram á nýjársdag og jafnvel fram eftir öllum janúar. Gjarna mætti fylgja eftir banni við hávaða á hversdagstímum og takmarka hann við gamlárskvöld.

Augu opnuðust 2017

Punktar

Árið 2017 er árið, þegar augu fólks fóru að opnast. Fjárlagaumræða alþingis í gær var verðugur endir. Gamli fjórflokkurinn hefur haldið völdum og heldur áfram að stela af þjóðinni yfir 100 milljörðum á hverju ári. Skera má niður barnabætur, en ekki hækka fjármagnstekjuskatt. Þetta er ríki hinna ofsaríku á kostnað þeirra fátæku. Þetta er þjóð, sem étur skít, af því að hún vill éta skít. Þetta er þjóð, sem neitar sér um ávextina af feikilegri þjóðarframleiðslu. Að heyra vinstri græn smjatta á skít Sjálfstæðisflokksins var brotlending gamallar hugsjónaþvælu. Ekki er verið að raska „stjórnmálahefðum“ með forustu Katrínar fyrir svarta íhaldinu.

Engin siðbót í sýn

Punktar

Hér verður engin siðbót meðan þjóðin styður fjórflokkana. Þeir eru allir flokkar sérhagsmuna. Hafa áratugum saman stutt viðamikinn þjófnað þjóðartekna, einkum með hækkun í hafi. Fiskur, ál, ferðaþjónusta og innflutningur hækka í hafi á ýmsa vegu. Þannig eru yfir 100 milljarðar teknir úr landsframleiðslu án skatta og skipta. Þetta þýfi þarf ríkið að endurheimta. Og eiga þá fyrir ókeypis lúxus sjúkraþjónustu eins og á öðrum norðurlöndum, eiga fyrir borgaralaunum og smíði þúsunda smáíbúða fyrir ungt fólk. Um þetta er rifizt áratugum saman í hringekju fjórflokksins. Jafnvel í góðæri eins og nú, finnst fjórflokki ofurríkra óbærilegt að afturkalla þjófnaðinn og veita öllum góða ævi.

Allt stendur fast

Punktar

Ríkisstjórnin virðist leggja áherzlu á, að hér verði áfram allt eins og alltaf hefur verið. Bófaflokkurinn tryggir öruggt rennsli fjár framhjá landsframleiðslu okkar. Framsóknarflokkurinn hefur þar á ofan líf vinnslustöðva landbúnaðarins á sinni könnu. Vinstri græn staðfesta réttmætið. Að einkavæðing megi skríða inn í laumi. Aldraðir og öryrkjar verði áfram ofsóttir. Ríkið hafi ekki frumkvæði að reisn 2000 ódýrra smáíbúða. Allt íhaldsflokkar hinna þjóðrembdu stjórnmála 100 ára fullveldistímans. Þjóðin styður eindregið þann séríslenzka, úldna forarpytt. Nýir alvöruflokkar eiga of erfitt uppdráttar, til dæmis Píratar, bezta valið.

Versta fjárfestingin

Punktar

Fjárfesting Arion banka og lífeyrissjóðanna í United Silicon stórverksmiðjunni í Reykjanesbæ hefur verið afskrifuð um fimm milljarða og verður meiri, þegar yfir líkur. Taprekstur á dauðri verksmiðju er 2,5 milljarðar á ári. Sennilega einn mesti skandallinn frá fjármálahruninu. Hvorki bankinn né lífeyrissjóðirnir lærðu neitt á hruninu. Áfram er vaðið í stjórnlausra glæfra með fyrirgreiðslum ríkisins og orkuvera þess. Ekki er að sjá, að neinn stjórnenda bankans og sjóðanna ætli að axla ábyrgð á ofurtjóninu og ganga í sjóinn. Mantra þeirra er: Gengur betur næst. Tímabært er að stöðva fjárfestingar fávita lífeyrissjóða með handafli ríkisins.

Hatur á gamlingjum

Punktar

Mér er óskiljanlegt, hvers vegna íhaldsflokkarnir hata sína traustustu kjósendur svona mikið. Gamla fólkið hefur ár eftir ár setið eftir hækkunum annarra hópa. Stjórnarflokkar sinna þessu ekki með litla fingri, ekki einu sinni Vinstri græn. Reyna jafnvel að hækka lífeyrisaldur til að þræla öldruðum meira út. Svipað er að segja um öryrkja. Alls kyns sérhagsmunir aðrir fá hins vegar ótrúleg fríðindi, landbúnaður og vinnsla búvöru. 3000-3500 aldraðir eru á elliheimilum með 68.000 króna vasapeninga á mánuði. Greiðslur lífeyrissjóða hafa hækkað um 10% á ári, en greiðslur Tryggingastofnunar hafa staðið í stað. Nóg er samt af óskattlögðu fé.