Ég vil sjá fleira fólk úr Stjórnlagaráði í framboð. Fólk, sem kann að vinna og starfa saman að lausnum, ekki að framleiðslu vandræða. Feginn, að Gísli Tryggvason og Lýður Árnason fara í framboð fyrir Dögun. Vil líka sjá Þorvald Gylfason, Þórhildi Þorleifs, Ómar Ragnarsson, Illuga Jökulsson og aðra, sem hafa fylgt eftir tillögum ráðsins. Hvort sem þeir fara fram hjá Dögun eða öðrum nýflokkum. Götustrákum gömlu flokkanna á að fleygja á haugana og fá nýtt fólk til valda. Óska öllum nýflokkum góðs gengis og bezt gengis þeim, sem fá flesta úr stjórnlagaráði til liðs við sig. Slátrum fjórflokknum núna.

Málþóf bófaflokks sjálfstæðismanna á þingi um fjárlögin snýst ekki um þau sjálf. Með málþófinu reynir bófaflokkurinn að tefja fyrir öðrum málum, sem koma illa við stóru bófana, einkum kvótagreifanna. Málþófið snýst um stjórnarskrá og kvóta. Því meiri tími, sem fer í marklaust blaður um fjárlögin, þeim mun hraðar nálgast þinglok og kosningar. Ef málþófið gengur vel, daga stóru málin uppi, einkum stjórnarskráin. Hún er eitur í beinum bófaflokksins, því að hún eykur lýðræði og hnykkir á þjóðareign auðlinda. Þeim tekst þetta, því af óútskýrðum ástæðum beitir forseti Alþingis ekki heimildum gegn málþófi.

Bjarni Benediktsson missti minnið út af Vafningi. Þykist ekki vita neitt um alvarlegar afleiðingar af gjaldfalli láns Morgan Stanley til Glitnis. Samt fór hann beint eftir undirskriftina og seldi öll bréf sín í Glitni fyrir 126 milljónir króna. “Ég hef ekkert að fela”, segir hann nú að morgni dags. Að kvöldi segir hann: “Veistu, ég er nú ekki mættur hingað í einhverja opinbera yfirheyrslu, er það?” Mánuðum saman hefur aðild Bjarna að Vafningi, Sjóvá og Glitni verið til umræðu, án þess að neitt hafi verið útskýrt. Nema það, að formaðurinn fellur eins og flís við rass stóra bófaflokksins í pólitíkinni.

Hef enga hugmynd um stefnu Bjartrar framtíðar, þótt ég hafi reynt að kynna mér hana. Notaleg yfirlýsing um græna, yfirvegaða, skynsama og skemmtilega stefnu ruglar mig bara. Hins vegar er það ekki stóra málið, enda hefur Björt framtíð langmest fylgi nýju flokkanna. Ræðst að einhverju leyti af trausti á Guðmundi Steingrímssyni. Hann virkaði sér á parti yfirvegaður, þegar hann var innan um æðikollana í Framsókn. Margir, sem hafna fjórflokknum, eru ekki að leita að fleiri stefnum. Þeir vilja fólk með mannasiði og velvilja. Því er ekki til að dreifa hjá götustrákum Alþingis, sem eru samsafn ónytjunga.

Höskuldur Þórhallsson segir réttilega Framsókn vera of nærri Flokknum. Fátt skilur milli, Framsókn fylgir Flokknum svona 90%. Og er að sumu leyti meira til hægri, einkum formaður með silfurskeið í munni. Undir forustu hans kemur Framsókn fyrir sem hægri upphlaupsflokkur með ódýrar patentlausnir á hverjum fingri. Flestir þingmennirnir eru á þeirri línu nema Eygló Harðardóttir, Siv Friðleifsdóttir og kannski Höskuldur sjálfur. Hægri hönd Sigmundar Davíðs Gunnlaugssonar frá Kögun er Vigdís Hauksdóttir. Hún er hvað eftir annað í fréttum vegna æsings á landsfrægu hrognamáli. Enda er fylgið á botninum.

Fráleitt er, að skattgreiðendur taki þátt í kostnaði við það, sem almennt telst vera skottulækningar. Sumt af því tagi getur verið gagnlegt heilsu fólks, en um það finnast engar vísindalega unnar rannsóknir. Fyrr á öldum voru sölumenn snákaolíu á markaðstorgum og seldu ýmsa kínalífselexíra, sem reyndust sumum frábærir. Smám saman kemur í ljós, hvort ýmis náttúrulyf reynast í tilraunum gagnast heilsunni. Ríkisvaldinu ber samt að taka þessu með ró, þangað til slíkt kemur í ljós. Nærtækara er, að ríkið greiði niður vísindalega sannaða læknisfræði. Tannlækningar eru enn utan við sósíalinn.

Réttlæti á Íslandi fer út í öfgar, ef offita verður sérstaklega vernduð í stjórnarskrá. Næst á eftir kemur vafalaust krafa um, að ofdrykkja verði vernduð þar líka. Réttlætisfíkn þarf að eiga skynsamleg takmörk. Ofát og ofdrykkja stafa að vísu af líkamlegum forsendum og teljast vera sjúkdómar. Þar með er tæpast sagt, að vernda beri slíka hegðun í stjórnarskrá. Þá mætti búast við langri biðröð fólks með vanda, sem að minnsta kosti í Kaliforníu hafa verið flokkaðir sem fíknir. Þar í flokki eru spilafíkn og kynlífsfíkn. Hvað um réttlætisfíkn? Árátta eða fíkn er vandmeðfarin í stjórnarskrá.

Skuldir heimilanna hafa verið lækkaðar um 200 milljarða. Þar munar mest um hæstaréttardóma um ólögmæti lánskjara. Þar hurfu 150 milljarðar. Einnig hafa lánin lækkað um 50 milljarða vegna stjórnvaldsaðgerða. Ríkið hefur ekki efni á meiru, enda búið að skattleggja upp í topp og spara rekstur niður í botn. Þeir, sem krefjast meiri lækkunar skulda, ættu að gera betur grein fyrir, hvernig eigi að útvega aurinn. Vissulega má reyna að sækja aukið réttlæti til Evrópudómstóla. Kannski stenzt verðtrygging ekki evrópska skoðun. Samt sýnist mér vísitala skulda sanngjörn upp að sama marki og vísitala launa.

Verkstjórn á Alþingi er í molum. Forseti Alþingis má samkvæmt þingsköpum takmarka ræðutíma þingmanna, en gerir ekki. Hann má bera upp tillögu um, að umræðu sé lokað, en gerir ekki. Kannski telur hann, að meirihluti muni fella tillöguna. Þá væri gagnlegt að vita, hvaða þingmenn styðja málþófsmenn. Sé slíkur krumpaður meirihluti ekki til, á forsetinn hiklaust að beita þeim aga, sem þingsköp mæla fyrir. Skrípaleikur óvina þjóðarinnar í Flokknum er kominn út yfir allt velsæmi. Eins og raunar kjafturinn á mörgum þingmönnum Framsóknar. Hvort tveggja á meginþátt í skertu áliti almennings á Alþingi.

Í gamla daga var þjóðin alin af innlendri yfirstétt á Danahatri, bara til að magna hag yfirstéttarinnar, embættismanna og kaupmanna. Nú er þjóðin alin á Evrópuhatri og enn er hér yfirstéttin að verki. Nú eru það kvótagreifar og atvinnurekendur, sem hamast á útlandinu til að efla hag sinn og forréttindi. Íslenzk þjóðremba er ræktað illgresi. Hræðir þjóðina með evrópskri Grýlu. Með regluverki Evrópu, sem í mörgum tilvikum verndar almenning langt umfram íslenzkan geðþótta. Leiðin til að verja forréttindin er að telja fólki trú um, að séríslenzkur geðþótti forréttinda sé betri en evrópska regluverkið.

Tel, að fólkið, sem vill breytingar í pólitík, sé þriðjungur þjóðarinnar. Tveir þriðju hlutar eru fastir í fjórflokknum, 25% hjá Sjálfstæðisflokki, tæp 20% hjá Samfylkingu og tæp 10% hjá Framsókn og Vinstri grænum hvorum fyrir sig. Þetta er botnfylgi hefðbundnu flokkanna, þegar þeir hafa allir gengið fram af þjóðinni. Þetta fylgi hlustar ekkert á umræðuna, þar sem uppreisnargjarni þriðjungurinn ræður ferð. Sá þriðjungur mun skiptast á ýmsa flokka, róttæka hægri-, vinstri- og miðflokka. Við þurfum minnst þrjá slíka flokka á þing með 10% fylgi á hvern. Þá verður hér loksins komið umbótaafl.

Meirihluti Egypta er strangtrúaður, en þeir, sem mótmæla á Tahir torgi eru vestrænt hugsandi. Hinn stóri vandi er, að mótmælendur velta harðstjórum, en þöglir strangtrúarmenn sigra í kosningum. Engar framfarir mannréttinda eru líklegar í heimi múslima. Fyrir nokkrum áratugum var víða frjálslyndi þar í heimi, jafnvel í Írak og Íran. Strangtrúuðum hefur aukizt ásmegin hvarvetna undanfarin ár. Þeir túlka kóraninn á annan hátt en áður og eru afar andvígir vestrænni hugsun. Boðar ekki gott um mannréttindi, frjálslyndi, vísindi og listir. Frjálsar kosningar vísa þjóðfélagi múslima beint í átt til miðalda.

Nánast alveg hættur að hlusta á greiningardeildir og hagfræðideildir banka. Viðurkenni þó, að ég er sammála hagfræðideild Landsbankans um gjaldeyrismál föllnu bankanna. Greiðslur úr þrotabúum þeirra verði í krónum, en ekki í gjaldeyri. Yfirfærslur verði háðar nógu strangri skömmtun Seðlabankans til að hindra gjaldeyrisþurrð. Með framhaldi fyrri neyðarréttar frá hruninu er þjóðin bara að tryggja tilvist sína til framtíðar. Með æðruleysi verður að taka því, að þetta leiði til málaferla þeirra, sem telja kosti sína þrengda. Brýnna er að hindra annað þjóðargjaldþrot í kjölfar uppgjörs gömlu bankanna.

Tillaga um nýja stjórnarskrá kemur ekki lengur frá Stjórnlagaráði. Var borin undir þjóðina, sem með yfirgnæfandi meirihluta studdi hana. Stjórnarskráin er tillaga þjóðarinnar sjálfrar. Síðan geta hrokafullir lagatæknar tæpast komið og birt allt aðrar tillögur. Geta ekki breytt meginhugsun hennar. Til dæmis ekki dregið úr upplýsingarétti fólks, beinu lýðræði, eignarhaldi fólks á auðlindum sínum. Einhver meiriháttar brestur er í hugsun lagatæknanefndar Alþingis, sem lagði til efnisbreytingar á vilja þjóðarinnar. Sá vilji okkar er þegar er kominn fram í þjóðaratkvæði. Hroki lagatækna gengur út í öfgar.

Þingflokkur Samfylkingarinnar slátraði kvótafrumvarpi ríkisstjórnarinnar á fundi í gær. Fann tæknilega ástæðu til að fresta málinu fram yfir helgi. Sem þýðir, að málið nær ekki á dagskrá fyrir jól og verður ekki afgreitt á þessu þingi. Nema þingflokkar kvótagreifa samþykki afbrigði. Sem þeir aðeins gera upp á býti kvótagreifanna. Lénsmenn greifanna í Samfylkingunni stóðu fyrir hinni afdrifaríku frestun. Lénsmenn greifanna í Vinstri grænum sáu svo um, að frumvarpið snýst um flest annað en þjóðareign á kvóta. Þjóðaróvinir eiga ítök víðar en í Flokknum og Framsókn. Fjórflokkurinn allur er þjóðarógæfa.