Forsætisráðherra segir ekkert sérstakt hafa komið fram í sögufrægu símtali Geirs H. Haarde og Davíðs Oddssonar rétt fyrir hrun. Ef svo er, þá er ekkert því til fyrirstöðu að birta það. Þjóðin veit líka, að pólitíkusar ljúga, þegar þeir telja sér það kleift. Sigmundur Davíð Gunnlaugsson lýgur ævinlega, segir aldrei satt orð, það er hans sérgrein. Enginn róast, þegar Sigmundur segir, að við þurfum ekki að vita innihald samtalsins. Málflutningur hans er venjulegur hroki forstokkaðs siðblindingja, sem þolir hvorki gagnrýni né önnur tengsl við veruleikann. Mál er, að þjóðin losni undan möru hans og fái öll gögn í hendur.

Gróðafíklar hyggjast loka fyrir útsýni að Skógafossi með því að byggja hótel í sjónlínunni. Markmiðið er, að útsýnið að fossinum sé frá gluggum hótelsins. Næsta skref gróðafíknar í ferðabransanum verður að reisa hótel allan hringinn umhverfis Kerið í Grímsnesi, umhverfis Strokk á Geysissvæðinu og umhverfis útsýnispallana við Gullfoss. Auðvelt verður að fá sveitavarginn í hreppsnefndum til að knýja fram skipulagið. Reynslan frá útlöndum sýnir, að í skipulagi nægir að veifa peningaseðlum. Reynslan hér af sjávarútvegi, raforku og ferðaþjónustu sýnir, að gráðugir auðgreifar eru fljótir að sölsa undir sig þjóðarauðlindir.

Alcoa segir Fjarðarál sitt vera frábæra fjárfestingu. Enda er hér boðið upp á heimsmet í lágu orkuverði og laun eru hér hlægilega lág. Samt er verð á áli svo lágt í útflutningi, að álverið rétt skrimtir. Þetta gengur greinilega ekki upp. Einhvers staðar síðar í ferlinu hækkar verð á álinu. Gróðinn kemur fram annars staðar en hér. Eva Joly segir þetta stafa af glufum í kerfinu, en Alcoa segir það fráleitt vera. Stjórnvöld gera fátt, því þau vilja bara virkja í spreng til að útvega verktökum tækifæri og að falsa tölur um hagvöxt. Ál er ómagi hér á landi, núll og nix. Borgar niður orkuver, en færir þjóðinni enga auðlindarentu.

Bæjarstjórinn í Hafnarfirði óskaði eftir og fékk lista yfir þá, er höfðu hringt í tiltekið númer hjá bænum á sex klukkustunda tímabili. Starfsmaður bæjarins fór yfir listann og fann engin númer. Þegar málið komst í hámæli, baðst hvorki bæjarstjórinn né meirihluti bæjarstjórnar afsökunar. Bæjarstjórinn sagði bara, að þessi ósk og þessi afhending hefði ekki átt sér stað. Sjálfstæðisflokkurinn og Björt framtíð mynda meirihlutann í Hafnarfirði. Þung vænisýki gekk þar á bæ og voru bæjarfulltrúar minnihlutans grunaðir um upphringingu. Athyglisvert er, að Björt framtíð átti aðild að þessum skrítnu njósnum, er ekkert leiddu í ljós.

Jón Gnarr skrifaði grein í Fréttablaðið um, að guð sé ekki til. Nokkrir prestar svöruðu og sögðu guð víst vera til. Mogginn sagði þá hafa farið af límingunum út af orðum Gnarrs. Fésbókin fjallaði um málið. Sumir fóru þar af límingunum út af orðum prestanna, sem höfðu farið af límingunum út af orðum Gnarrs. Eins og venjulega minntu orðskeytin á siðferði fótboltaleikja, þar sem fullorðið fólk gargar frá sér allt vit. Hver fyrir sig fylgir sínu liði gegnum rauðan dauðann. Einkennir raunar umræðu á Íslandi, að menn fara í manninn, en ekki í boltann. Ég varð engu nær um tilvist guðs, sem hefði þó verið áhugaverðara lesefni.

Öfgar magnast í íslam víða um heim, ekki bara í Sýrlandi og Írak. Hryðjuverk magnast ekki bara í París og Kaupmannahöfn. Heilir heimshlutar loga af völdum öfgasinnaðra múslima. Sjáið Norður-Afríku frá Líbíu til Nígeríu. Út um allt er fólk afhöfðað. Áður hófsöm ríki eins og Egyptaland og Tyrkland íslamiserast hratt. Veraldlega sinnaðir arftakar Kemals Atatürk viku fyrir trúarofstæki hins spillta Erdogans. Spilling magnast, viðskiptabófar fela sig bakvið íslam, græða á tengslum við moskur. Istanbul var til skamms tíma evrópsk borg að mestu, en núna eru kolsvartar slæður í meirihluta á Sultanahmet. Nýjar miðaldir nálgast.

Þreytist ekki á furða mig á greinum, sem birtast í dagblöðum, sneisafullar af þoku. Sú nýjasta er eftir Pétur Blöndal, forstjóra samtaka álvera. Hann telur álvinnslu góða, ef hún fjármagnar virkjanir. Það er rangt. Álvinnsla er ekki góð fyrr en hún borgar sama verð og álver borga erlendis. Hér á nefnilega að ríkja markaðshagkerfi, þótt kommúnistaflokkarnir D&B séu við völd. Verð á ekki að miða við kostnað, heldur við markað. Orkuverð til álvera hér kallast því réttilega tombóluverð. Þar vantar inn alla hugsun um auðlindarentu, eins og raunar líka í sjávarútvegi. Álgreifar og kvótagreifar eru ómagar á þjóðinni.

Stóri taparinn í Kaupþingsmálinu er klappstýra útrásarinnar. Ólafur Ragnar Grímsson notaði embætti forseta til að fara um heiminn og lofsyngja bankabófa Kaupþings. Bullið rann frá honum í stríðum straumum: „I give the Kaupthing bank my strongest personal recommendation. The professionalism of its leadership …“ Þessi gamli tuddi úr pólitíkinni magnaði þannig tjón þjóðarinnar af brotum, sem „voru þaulskipulögð, drýgð af einbeittum ásetningi og eindæma ófyrirleitni og skeytingarleysi“ samkvæmt dómsorðum. „Ákærðu, sem ekki hafa sætt refs­ingu fyrr, eiga sér engar máls­bæt­ur“ sagði Hæstiréttur. Ólafi Ragnar ber að segja af sér.

Sama daginn og örlagadómur Hæstaréttar féll í máli Kaupþingsmanna blés mesta fornaldareðlan til sóknar gegn almenningi. Viðskiptaráð hvatti til aðgerða, sem á sínum tíma leiddu til hrunsins. Heimtaði einkavæðingu innviða samfélagsins. Ráðið vill ekki læra neitt af ruglinu í Reykjanesbæ. Enn síður vill ráðið læra neitt af skorti á opinberum hömlum á bankabófum einkavæddra banka. Úti í heimi krefjast gráðugir viðskiptamenn einkavæðingar á vatni og lofti. Þótt slíkt hafi leitt til hörmunga í rómönsku Ameríku. Viðskiptagræðgin er orðin stjórnlaus og verður aðeins stöðvuð með pólitískri vakningu og samfélagsvæðingu.

Sigrún Magnúsdóttir umhverfisráðherra vill milda orðalagið í Evrópureglum, sem alþingi staðfestir. Telur, að unnt sé að innleiða niðurstöðu með því að breyta henni. Þetta skapar ýmsa möguleika fyrir Framsókn. Til dæmis mætti bæta orðinu „ekki“ inn á réttum stöðum. „Bannað er að virkja á náttúruverndarsvæðum“ mundi þá hljóða: „Ekki er bannað að virkja á náttúruverndarsvæðum“. Þannig væri hægt að innleiða reglurnar án þess að gera það. Slíkt væri einkar þægilegt fyrir umhverfisráðherra og aðra baráttumenn sérhagsmuna. Teljið þið, að ráðherra, sem hugsar svona, sé með fullu viti? Eða sé bara þessi venjulegi Framsóknarbófi?

Morðin í Kaupmannahöfn tengjast íslam eins og morðin í París. Í öðru tilvikinu var ráðist gegn næsta umhverfi teiknara, sem sakaður hafði verið um að móðga spámanninn Múhameð. Í síðara tilvikinu var ráðist gegn næsta umhverfi gyðinga. Hvort tveggja líktist að þessu leyti morðunum í París. Þetta voru ekki aðeins verk ruglaðra einstaklinga, heldur einnig trúartengd morð. Ýmsar túlkanir á orðum spámannsins hvetja til slíkra verka. terroristasamtökin ISIS beita fyrir sig skrifum höfundarins Abu Bakr Naji. Ýmsir róttækir klerkar múslima mæla líka með hryðjuverkum. Meðal of margra múslima er leiðin of stutt út í slíkar öfgar.

Eftir síðustu kosningar í Svíþjóð myndaði stærsti minnihlutinn stjórn í samráði við næststærsta minnihlutann. Samið var um, að ríkisstjórnin notaði ekki sitt fjárlagafrumvarp, heldur fjárlagafrumvarp minni aðilans. Þetta er sænsk aðferð við að setja niður deilur. Hér var það fyrir kosningar, að ríkisstjórn reyndi að mynda sátt um vilja minnihlutans um söltun stjórnarskrár og afhendingu kvóta til greifa. Svo kom í ljós í kosningunum, að stuðningsmenn ríkisstjórnarinnar töldu þetta vera reginsvik. Samfylkingin og Vinstri græn urðu að smáflokkum í síðustu kosningum. Stundum er réttur tími til sátta og stundum er rangur tími.

Sagnfræðin segir okkur, að alla tíð hafi íslam verið herskárri en gengur og gerist um höfuðtrúarbrögð heims. Á allra síðustu árum hefur róttæk bókstafstrú geisað eins og faraldur um samfélög múslima. Ræturnar eru hjá wahabítum í Sádi-Arabíu og þaðan koma peningarnir líka. Bókstafstrúin byggist ekki bara á kóran múslima, heldur á túlkunum ýmissa klerka. Frægastur er ABU BAKR NAJI, sem boðar grimmdarlegt ofbeldi. Hann er andlegur lærifaðir ISIS, sem hefur gengið fram af fólki upp á síðkastið. Ungir múslimar af vesturlöndum flykkjast í þann hóp og koma síðan aftur. Vesturlönd þurfa að stórefla viðbúnað vegna þessara hamfara.

Fráleitt er að ímynda sér, að bakvið luktar dyr sé unnt að semja um mikið afsal fullveldis og borgaralega réttinda. Samt taldi Evrópusambandið sér trú um það. Samt taldi Gunnar Bragi Sveinsson ráðherra sér trú um það. Samt taldi Martin Eyjólfsson, sendifulltrúi Íslands í viðræðunum, sér trú um það. Halda átti öllu ruglinu leyndu fimm ár fram yfir gildistöku. Blaðran sprakk svo í andlitið á öllum þessum aðilum. Evrópusambandið er rúið trausti, enginn trúir neinu, sem forstjórarnir segja. Íslenzka utanríkisráðuneytið er rúið trausti, enginn trúir neinu, sem Gunnar Bragi og Martin segja. Nú ber þeim að hætta þessari vitleysu.

Að baki vinstri fasisma borgarstjórnar gegn bílum er hugsjónin um bíllausan lífsstíl. Til að þvinga hann fram, nægir ekki að laga umferð hjóla og gangandi fólks. Einnig þarf að hefta bílaumferð. Með fjölbreyttum hætti er unnið að því. Götur eru þrengdar ein af annarri, Hofsvallagata, Borgartún og Grensásvegur. Skipulagður er bílastæðaskortur við nýbyggingar, svo að vandræði nýrra turna yfirfærist á gömul íbúðasvæði, svo sem í Skuggahverfi. Umferðarljós eru jafnvel færð til að stífla torg, til dæmis Melatorg. Borgarstjórn telur borgarveðrið, rok og rigningu og hálku, henta vel til að koma hér á fót París norðurhjarans.