Óviðfelldin er mærð og hræsni vestrænna leiðtoga, sem flykktust til útfarar Abdullah, miðaldakóngs í Sádi-Arabíu. Hann stýrði í bandalagi við öfgaklerka. Þeir ráða grimmri karlrembu og annarri forneskju heima fyrir. Og fengu fé til að reisa og reka madrössur um allan heim til að útbreiða miðaldir. Terroristar eru ein afleiðing þessa vanheilaga bandalags kóngs og klerka. Wahabítar í Sádi-Arabíu eru verstu öfgaklerkar spámannsins. Bera mesta ábyrg á íslamisma, sem nú tröllríður mörgum söfnuðum múslima. Bandaríkin hafa lengi stutt Arabíukóngana vegna olíunnar. Gott dæmi um fórnun langtímahagsmuna fyrir einnar nætur gaman.

Samantektir geta verið frábærar. Í fyrra samdi ég lista um newspeak pólitíkusa, sem gildir enn. BJÖRN VALUR hefur gert lista um samhengislaust rugl valdhafa um afnám hafta. Gæti verið leikrit eftir Beckett, hjóðar svona:

Þann 23. apríl 2013 sagði formaður sjálfstæðisflokksins að hægt yrði að afnema gjaldeyrishöftin á næstu mánuðum
Þann 23. apríl 2013 sagði formaður framsóknarfloksins að afnám haftanna myndi ekki taka langan tíma
Þann 27. maí 2013 tilkynnir nýr forsætisráðherra að höftin verði afnumin samkvæmt áætlun sem byggist á hans hugmyndum.
Þann 27. maí 2013 segir forsætisráðherra að áætlun sín verði birt í september það sama ár.
Þann 15. ágúst 2013 tilkynnir forsætisráðherra um að hann hafi skipað sérstakan afnámsstjóra
Þann 20. september 2013 segir forsætisráðherra að afnám haftanna geti hafist í fyrirsjáanlegri framtíð
Þann 15. október 2013 fullyrðir fjármálaráðherra að stutt sé í afnám haftanna
Þann 16. október 2013 segir fjármálaráðherra að meiriháttar skref um afnám haftann verði kynnt á næstu fimm mánuðum
Þann 30. október 2013 segir forsætisráðherra að það geti tekið nokkur ár að afnema höftin
Þann 31. október 2013 segir forsætisráðherra að það taki bæði skamman tíma og langan að afnema höftin
Þann 15. nóvember 2013 tilkynnir forsætisráðherra um skipan sérstaks ráðgjafahóp um afnám haftanna
Þann 30. nóvember 2013 segir forsætisráðherra að skattlagning þrotabúana muni ekki tefja afnám haftanna
Þann 26. janúar 2014 segir forsætisráðherra að ríkisstjórnin hafi skamman tíma til að afnema höftin
Þann 9. febrúar 2014 segir fjármálaráðherra að afnám haftanna gæti hafist á árinu
Þann 20. febrúar 2014 segir forsætisráðherra að það þjóni ekki tilgangi að opinbera leynilega áætlun um afnám haftanna byggða á hans hugmyndum
Þann 20. febrúar 2014 segir forsætisráðherra að beðið sé eftir gögnum frá Seðlabankanum til að hægt verði að greina frá hugmyndum stjórnvalda um afnám haftanna
Þann 25. febrúar 2014 segir fjármálaráðherra að framkvæm afnáms gjaldeyrishaftana sé í fullum gangi
Þann 27. mars 2014 segir fjármálaráðherra að afnám haftanna sé forgangsmál hjá ríkisstjórninni
Þann 4. apríl 2014 tilkynnir fjármálaráðherra um fjölgun rágjafa við afnmám haftanna og að fyrstu skrefin í afnámi þeirra verði tekin á næstu mánuðum
Þann 7. júní 2014 segir fjármálaráðherra að það þurfi pólitískan kjark til að afnema höftin
Þann 16. júlí 2014 segir forsætisráðherra að afnám haftana hefjist á árinu
Þann 25. september 2014 segir fjármálaráðherra að árið 2014 verði örlagaár við afnámi haftana. Ekki sé eftir neinu að bíða
Þann 20. október 2014 segir fjármálaráðherra að höftin verði líklega afnumin í skrefum
Þann 1. nóvember 2014 segist fjármálaráðherra aldrei hafa verið jafn sannfærður og þá um að markverður árangur muni nást á næstu mánuðum við afnám haftanna
Þann 11. nóvember 2014 segist fjármálaráðherra vongóður um að geta opinberað áætlun um afnám haftana fyrir jól
Þann 12. nóvember 2014 segir fjármálaráðherra frá því að kostnaður við afnám haftana sé komin í 335 milljónir á árinu
Þann 4. janúar 2015 segir tilkynnir forsætisráðherra að næstu skref við afnám haftana verði tekin í mánuðinum
Þann 9. janúar 2015 skipar forsætisráðherra enn einn hópinn um afnám haftanna
Þann 20. janúar 2015 segir fjármálaráðherra að afnám haftana sé að hefjast og það skipti ekki öllu hvoru megin mánaðarmótanna það verði úr þessu.

Þessa daga er verið að kynna nýjar tölur fjölþjóðastofnana um stéttaskiptingu. Sýna, að ríkasta eitt prósent mannkyns á um helming auðs í heiminum. Að áttatíu ríkustu mennirnir eiga meira en fátækari helmingur mannkyns. Stafar ekki af dug og vizku fárra, heldur af aðstöðu þeirra til að stela og fela þýfið. Jafnframt breyttist lýðræði í auðræði. Bandarískir þingmenn eru allir á framfæri greifa. Hér er ferlið það sama, ríkasta eitt prósent þjóðarinnar gleypir fjórðung alls auðs. Engin bremsa er á þessu, græðgi þjófanna er óseðjanleg, auðræðið étur sig innanfrá. Fólk verður að vakna, ganga í musterið, velta um borðum víxlaranna.

Pólitískum ferli Hönnu Birnu er loksins lokið. Hafði mikil og ítrekuð afskipti af rannsókn lögreglunnar á lekamálinu. Fór langt út fyrir verksvið sitt sem ráðherra. Þetta er niðurstaða umboðsmanns alþingis. Með tuddaskap hrakti hún lögreglustjórann úr embætti. Bófaflokkur hennar rústaði innanríkisráðuneytinu, sem þjenustaði tuddann. Á endanum hékk hún ótrauð á nöglunum í hamrabrúninni. Flótti hennar og og handrukkara hennar úr einni lygi í aðra er búinn að vera langvinn harmsaga. Útilokað er, að hún sýni sig aftur á alþingi, þegar hún hættir í fríi. Niðurstaða umboðsmanns er eindregin og verður ekki vefengd.

Í stóru og smáu böðlast ríkisstjórnin áfram við að flytja verðmæti frá fátækum til ríkra. Grefur undan Sérstökum með því að hætta að fjármagna stofnunina. Því verður að hætta við ýmsan málarekstur gegn ofurbófum. Neitar jafnvel að smíða frumvarp til laga um smálánafyrirtæki, sem frægir bófar á Balkanskaga reka hér á landi. Áður er komið fram, að hún reynir að sturta Landspítalanum og dregur á öllum póstum úr hvers konar velferð. Útkoman er, að Ísland siglir æ hraðar til auðræðis, þar sem 1% þjóðarinnar á meirihluta allra eigna og hálf þjóðin er eignalaus eða í eignamínus. Næst ætla þjóðníðingarnir að gera kvótann varanlegan.

Ekki kemur á óvart, að Jón Gunnarsson þingmaður reyni að snapa fæting við hvers konar umhverfissinna. Í Sjálfstæðisflokknum er útbreidd sú skoðun, að verktakar sé allri náttúru æðri. Sama er að segja um Framsókn. Sumir telja líka, að lón og stíflur taki náttúru fram að fegurð. En aðallega snýst þetta um verktakana. Undarlegra er, að ríkisstofnunin Orkustofnun taki þátt í að efla úlfúð og reiði fólks og snapa fæting við það. Geðveikar eru áætlanir stofnunarinnar um að rífa fyrri sættir og skutla sextán vernduðum stöðum í nýtingu. Guðni A. Jóhannesson orkumálastjóri hefur að vísu áður sýnt vanstillingu. En nú er komið upp í kok.

Sem Evrópusinni get ég fullyrt, að þrjózka Jóhönnu drap ríkisstjórn hennar. Evrópuaðild naut þá lítils fylgis og klauf samstarfsflokkinn í ríkisstjórn. Í pólitík þarf að velja sér bardaga og hafna vonlausum slagsmálum. Samfylkingin er ekki stjórntæk, ef hún heldur áfram slíkri þrjózku. Eftir kosningar myndast meirihluti um mál, sem hægt verður að sættast um. Ekki mun þá duga að setja samstarfsfólki afarkosti eins og Jóhanna gerði. Sú reynsla drap frekari sénsa á slíkum vinnubrögðum. Evrópusambandið getur samt orðið vinsælt einhvern tíma í framtíðinni. Þá getur Samfylkingin reynt að taka slaginn og koma málinu í gegn.

Með því að vera í lífeyrissjóði missirðu rétt til ellilauna. Lífeyrisgreiðslur til þín dragast nefnilega frá ellilaunum ríkisins. Sjóðirnir hafa í raun það eina hlutverk að færa greiðsluskyldu lífeyris frá ríkinu til launþegans. Hann borgar mánaðarlega í lífeyrissjóð, en fær ekkert í staðinn. Ekki fyrr en tekjur hans eru orðnar svo miklar, að lífeyrisprósentan fer yfir upphæð ellilauna. Þar á ofan eru sjóðirnir orðnir að banabita verkalýðsfélaga. Þau snúast að mestu um samsæti með atvinnurekendum í stjórnum sjóða og fyrirtækja, sem sjóðirnir reka. Vinna þar beinlínis gegn hagsmunum launafólks, svo sem í glæpafélaginu Lýsingu.

Jafnt og þétt eykst vissan um, að loftslagsbreytingar af mannavöldum séu að verða hættulegar mannkyninu. Veðurmælingar frá 6300 athugunarstöðvum sýna, að meðalhitinn 2014 var sá hæsti í 135 ára sögu mælinga. NASA, geimferðastofnun Bandaríkjanna, varar við enn auknum meðalhita yfirborðs jarðar. Hann muni magna veðurofsa, svo sem hamfaraflóð, ofsabrim og hvirfilbylji. Af þeim völdum megi reikna með auknum uppskerubresti og öðrum hörmunum mannkyns. Þessar fréttir munu að vísu ekki hafa nein áhrif á skoðanir efasemdarmanna. Þeir hafa sig mjög í frammi, einkum í Bandaríkjunum. Þeir munu ekki láta staðreyndir trufla sig. Hafa aldrei.

Framsókn hefur skipað einn kunnasta útlendinga- og hommahatara landsins sem varamann í mannréttindaráði Reykjavíkur. Eðlilegt framhald af framboði tveggja moskuhatara flokksins í borgarstjórn. Framboðið gafst vel, Framsókn fékk óvænt tvo fulltrúa, en ekki hafði verið reiknað með neinum. Menn þar á bæ telja, að vænlegt til vinnings sé að ýta flokknum á braut rasisma og haturs. Ekki er þó full eining um þessa stefnu. Eygló Harðardóttir velferðarráðherra og Birkir Jón Jónsson, fyrrum alþingismaður, andmæla framboði Gústafs Níelssonar. En líklega drepst Framsókn smám saman, nema hún skipi sér eindregið í hóp hægri öfgahópa.

Aðlögunarhæfni múslima er meiri í Bandaríkjunum en í Evrópu. Eitthvað má læra af því. Í Evrópu er algengt, að múslimar séu á sósíalnum eða í fangelsi, síður í Bandaríkjunum. Í Frakklandi eru múslimar meirihluti fanga. Múslimar eru þar í sömu stöðu og svertingar í Bandaríkjunum. Evrópa hefur fátækrahverfi múslima og ofbeldisglæpi, sem slíkum hverfum fylgja. Rannsókn segir, að 7-14% múslima hafi fagnað hryðjuverkum múslima. Gætu verið um hundrað milljón manns. Öfgar eru því algengari meðal múslima en margir ímynda sér. Og margir hófsamir múslimar láta sér líka fátt um finnast. En Evrópa þarf að finna, hvað hefur farið úrskeiðis.

Hjá fjölmenninarsinnum er víðtæk afneitun á lærdómi vesturlanda af blóðbaðinu á Charlie Hebdo. Þeir neita að sjá bilunareinkenni á stefnu fjölmenningar. Það má greinilega sjá á viðbrögðum þeirra á fésbókinni við hvers konar gagnrýni. Ég varð greinilega var við þetta síðustu daga. Sumir fjölmenningarsinnar eiga bara eftir garg og aðsúg í vopnabúrinu. Vilja ekki hlusta á neinar hugmyndir um lagfærða stefnu. Munu þó eiga eftir að verða fyrir enn meiri vonbrigðum. Fjölgi hryðjuverkum í Evrópu, mun stuðningur fólks við núverandi fjölmenningarstefnu fljótt þorna upp. Réttur tími til að skipta niður um gír er því nú, ekki síðar.

Því meira sem trúarbrögð byggjast á Bókstafnum, því hættulegri eru þau. Gamla testamentið og kóraninn eru afleit rit, sem flytja okkur ofbeldi og grimmd. Að baki veraldlegs nútíma á vesturlöndum voru myrkar aldir, þar sem túlkanir á biblíutexta voru alls ráðandi. Þeir tímar eru löngu liðnir, nema í fámennum sértrúarsöfnuðum. Nú á tímum eru það mest múslimar, sem hengja sig í túlkunum á Bókstafnum. Sharia lögmál kóransins er ljót karlremba og hefndafíkn. Við skulum ekki strika yfir tengsli milli túlkana á þessum gamla texta og terror í nútíð og framtíð. Öll bókstafstrú er ill og öfga-íslam er nú skæðasta bókstafstrúin.