Múslimar og sendiherrar íslamskra ríkja í Danmörku eru reiðir skopmyndum af Múhameð spámanni í Jyllandsposten, heimta viðbrögð forsætisráðuneytisins og afsökunarbeiðni dagblaðsins. Múslimar kvarta líka um bann Frakka og fleiri ríkja við kvenslæðum, sem á Vesturlöndum eru óbein tákn um undirgefni kvenna. Múslimar eru með þessu komnir út á hálan ís. Ef þeir vilja búa á Vesturlöndum verða þeir að sætta sig við vestræna siði og vestrænt réttarfar, sem leyfir móðgun við guðdóminn og bannar kvenhatur. Ef þeir geta ekki sætt sig við slíkt eiga þeir að flytja aftur í heimahagana.

SJÁLFSTÆÐISFLOKKURINN er capo spillingar í mannaráðningum hér á landi, ekki Framsóknarflokkurinn. Samkvæmt úttekt DV í gær eru 58 af 100 kvígildum flokkanna sjálfstæðismenn og aðeins 23 framsóknarmenn. Heilir 19 voru samfylkingarmenn eða úr forveraflokkum hennar. DV birti myndir af öllum 100.

MIKILL MEIRIHLUTI allra ráðninga fólks í opinber embætti er spilltur. Flokkarnir líta á aðstöðu sína í ríkisstjórn og borgarstjórn sem herfang. Framsóknarflokkurinn er svo frægur af þessu, að hann hefur verið kallaður Vinnumiðlun, en sú nafngift á raunar betur við Sjálfstæðisflokkinn.

SJÁLFSTÆÐISFLOKKURINN fjölyrðir flokka mest um, að ríkisrekstur sé ekki eins hagkvæmur og einkarekstur, en á sjálfur mesta sök á að velja óhæfa menn, sem gera ríkisrekstur ónýtan. Flokkurinn er meira að segja að gera sjálfan Hæstarétt að griðastað fyrir undirmálsmenn.

ENN MERKILEGRA ER, að fjöldi kjósenda styður þessa spillingu flokkanna með atkvæði sínu. Fólk er sátt við, að atkvæði sitt sé notað til að setja flokksjálka í embætti, sem betur hæfa fagmanni. Næst verður Sturla Böðvarsson gerður að vegamálastjóra, þótt þar hafi áður verið röð verkfræðinga.

MANNARÁÐNINGAR eru annar svartasti bletturinn á íslenzkri pólitík. Hinn svarti bletturinn er, að sumir flokkar, með Sjálfstæðisflokkinn í broddi fylkingar, neita að veita nokkra innsýn í fjármál sín og í stuðning fjársterkra fyrirtækja. Gegnsæi er eitur í beinum flokks allra stétta.

KÓNGUR ÍSLENZKRAR spillingar er fráfarandi formaður Sjálfstæðisflokksins, sem lét skipa algerlega óhæfan frænda sinn í Hæstarétt og skipaði að lokum sjálfan sig í embætti seðlabankastjóra, svo að hann þyrfti ekki að lifa af heillar milljón króna eftirlaunum, sem hann hafði áður útvegað sér.

jonas@dv.is

DV

Þrátt fyrir fréttir af stríði og hörmungum er friðsamlegra í heiminum um þessar mundir en oftast áður. Samkvæmt tölum Sameinuðu þjóðanna hafa vopnuð átök minnkað um 40% frá lokum kalda stríðsins. Auðvitað þakka þær og friðargæzluliði sínu þessa breytingu og má það satt vera. Hryðjuverk eru eina tegund vopnaðra átaka, sem vex um þessar mundir, en drepur þó innan við þúsund manns á ári hverju að meðaltali, meðan hefðbundin átök drepa tugþúsundir árlega. Samkvæmt skýrslu Sameinuðu þjóðanna hefur ekki verið sérstök ástæða til svartsýni á heimsfriðinn eftir að kalda stríðinu lauk.

Robert Mugabe í Zimbabve er ekki fínn pappír, einn af ógeðfelldari einræðisherrum þriðja heimsins. Samt hefur hann rétt fyrir sér, þegar hann kallar George W. Bush og Tony Blair fasista og alþjóðlega hryðjuverkamenn. Einnig þegar hann segir fátækt þriðja heimsins vera vesturlöndum að kenna. Bush og Blair eru sannanlega ofbeldishneigðir í utanríkismálum, samanber Írak. Vesturlönd skrúfa fyrir innflutning landbúnaðarafurða frá þriðja heiminum, en heimta tollfrelsi fyrir sínar vörur í þriðja heiminum. Hræsnin er sameiningartákn vesturlanda í samskiptum við umheiminn.

Öfugt við Þýzkaland hafa Japan og Austurríki ekki gert upp fortíð sína. Forsætisráðherra Japans er enn í árlegum ferðum til Jasukuni musterisins, til að heiðra minningu japanskra glæpamanna úr stríðinu. 200 japanskir þingmenn hafa gert slíkt hið sama á þessu ári. Þótt Japan sé orðið ríkt land, sem oft er talið með vestrinu, hafa Japanir ekkert lært og engu gleymt. Þeir eru einir mestu rasistar í heiminum um þessar mundir, hata útlendinga almennt. Ég man enn eftir leiðsögumanni í Kyoto, sem gargaði á viðskiptavini sína eins og þeir væru stríðsfangar í útrýmingarbúðum gömlu daganna.

ÉG ÁTTI UM TÍMA samskipti við Landmælingar Íslands, af því að ég var einn þeirra, sem höfðu tekið ferilpunkta reiðleiða um óbyggðir inn á GPS-tæki.

SLÍKAR PUNKTARAÐIR henta vel til að finna hlið á girðingum og vöð á ám, auk þess sem tækin eru kompásar og kort, svo að ég veit, hvar ég er staddur í svartaþoku og hvert ég er að fara.

MARGIR ÁHUGAMENN, einkum jeppamenn og vélsleðamenn, hafa raðir ferilpunkta eða leiðarpunkta á heimasíðum sínum. Aðrir geta hlaðið þessum töflum inn í GPS-tæki sín og séð leiðir og staði á skjánum um leið og þeir eru að ferðast.

LANDMÆLINGARNAR vildu vera með í þróuninni og opnuðu heimasíðu með reiðleiðum. Ég og ýmsir fleiri voru fengnir til að skila inn röðum ferilpunkta. Lítill hluti þeirra rataði á vefkort Landmælinganna.

SÁ GALLI ER Á gagnagrunni Landmælinganna, að hann er sá eini í heiminum, sem tekur bara inn punktaraðir, en getur ekki skilað þeim út aftur. Hann er eins konar svarthol, sem gleypir allt, en skilar engu.

ÞESS VEGNA GETA hestamenn ekki notað vefkort Landmælinganna til að hlaða punktaröðum reiðleiða inn á GPS-tæki, þegar þeir undirbúa ferðalög. Landmælingarnar bjóða ekki heldur neinar punktatöflur í staðinn.

HANDARBAKAVINNUBRÖGÐ Landmælinga Íslands eru dæmigerð fyrir opinberan rekstur. Ráðamenn einkafyrirtæks hefðu örugglega áttað sig á, að ekki er gott að nota danskt svarthol fyrir gagnagrunn.

DV

LANDSFUNDUR Sjálfstæðisflokksins er viðurkenndur performans, einnig af andstæðingum flokksins. Þetta er ekki bara samfellt halelúja, þótt öll umgerðin kalli á hópefli af tagi fjölmennra safnaða í Bandaríkjunum. Inn á milli er fólk að reyna að koma sjónarmiðum sínum á framfæri.

ÞANNIG TÓKST að fá landsfundinn til að styðja bílastyrki handa öldruðum og öryrkjum, sem ríkisstjórnin hafði ákveðið að leggja niður. Það er í landsfundum dálítið magn af jafnaðarstefnu, sem hefur raunar fylgt Sjálfstæðisflokknum frá ómunatíð.

MARGIR SEGJA, að landsfundir Sjálfstæðisflokksins séu hápunktar lífs þeirra, mesta upplifun þeirra og skemmtun. Enginn flokkur getur státað af þvílíkum samkomum, þar sem menn koma út úr helginni forkláraðir í framan með hjartað fullt af hugsjónum.

SAMFARA UPPREISNUM hér og þar í nefndum og ræðustólum ríkir fortakslaus dýrkun á liðnum og nýjum leiðtogum. Þetta er fyrst og fremst leiðtogaflokkur, sem ræður sér leiðtoga til að hugsa fyrir flokkinn og afla honum fylgis. Því fylgir auðvitað taumlaus dýrkun.

NÚ ER DAVÍÐ farinn og Geir tekinn við með aðstoð Þorgerðar. Smám saman munu samgönguleiðir í forustunni breytast, því að samkvæmt ritúalinu ræður Geir einn. Sumir millistjórar munu smám saman hverfa í skuggann og aðrir rísa upp. Það er ekki lengur nóg til framgangs að hringsnúast kringum Davíð.

FORMANNASKIPTI í Sjálfstæðisflokknum jafngilda nýrri stefnuskrá í öðrum stjórnmálaflokkum. Nýjum manni fylgja nýir tímar, því að hver formaður í foringjaflokki neyðist til að vera einræðisherra. Eins og Mussolini eða Berlusconi.

DV

Apple gaf okkur iPod, svo að við þurfum ekki lengur að þola hina óbærilega háværu þögn heimsins. Nú hefur Apple gefið okkur tækni fyrir sjónvarpsþætti á iPod, svo að við þurfum ekki lengur að þola útsýnið. Nýja tækið hefur rúmlega 6 sm skjá og getur hlaðið niður “Desperate Housewives” fyrir tæpa tvo dollara eða 150 krónur. Ætlunin er, að fólk noti tækið til að sjá þætti úr sjónvarpi fremur en bíómyndir. Vonandi leiðir þessi tækni ekki til árekstra í umferðinni, en sætt er til þess að vita, að veruleikafirring okkar getur orðið fullkomin. Við þurfum hvorki að heyra né að sjá umhverfið.

Liðinn er sú tíð, er brezka leyniþjónustan þóttist ekki vera til og skrifaðar voru bækur um James Bond og George Smiley. Á fimmtudag var opnuð vefsíða MI6, þar sem fólki var gefinn kostur á að sækja um vinnu. Þarna geta menn óskað eftir að komast að sem agentar, Bondar og rannsóknamenn. Beðið er um kunnáttu í spönsku, frönsku, arabísku, kínversku og rússnesku. Við fáum að vita, að bossinn heiti Sir Mansfield Smith Cumming. Ekki er áskilin menntun í einkaskólum og í Oxford og Cambridge, eins og Kim Philby og Guy Burgess á sínum rómantískari tíma. Slóðin er (www.mi6.gov.uk).

Samkvæmt evrópskri rannsókn er vaxandi skortur á fólki, sem kann til verka í símatækni, fartölvutækni og öryggistækni. Í Bretlandi einu mun skorturinn nema 40.000 manns. Allt eru þetta tiltölulega vel borguð störf. Á sama tíma er Þýzkaland að reyna að ná til landsins indverskum tölvumönnum með því að bjóða þeim hraðferð í ríkisborgararétt og önnur fríðindi. Hvað er svo Ísland að gera? Það er að reyna að varðveita störf við fiskvinnslu, búa til störf við stóriðju og bjarga Slippstöðinni, fyrir utan það stóra milljarðaverkefni á hverju ári að viðhalda atvinnu í hefðbundnum landbúnaði.

Haraldur Johannessen varð ríkislögreglustjóri á vegum Sjálfstæðisflokksins. Hann ber ábyrgð á efnahagsbrotadeild, sem klúðraði frægu fölsunarmáli málverka og hefur nú síðast klúðrað Baugsmálinu. Eftir það var ákveðið að flytja málið úr efnahagsbrotadeildinni til ríkissaksóknara, þar sem það á heima. Eftir stendur trausti rúinn ríkislögreglustjóri, sem meira að segja er orðinn að umræðuefni í tímaritinu Mannlífi vegna ofstopa á skemmtistað. Fullreynt er, að hann stendur ekki undir viðkvæmu embætti, sem hann hefur raunar þanið út yfir allan þjófabálk. Nú á Haraldur að taka pokann sinn.

Magnús Guðmundsson varð forstjóri Landmælinga, þegar hæfur forstjóri var rekinn vegna gruns um stuld á GPS-tæki. Hann er frægur fyrir að eyða milljónum króna í þyrluferð með forsætisráðherra til að mæla skaflinn á Öræfajökli, sem stækkar og minnkar. Til að setja raðir ferilpunkta inn á kort notar hann danskt forrit, sem bara getur sett inn slíkar raðir, en ekki náð þeim út aftur. Forritið er eins konar svarthol, sem gleypir gögn, en skilar þeim ekki. Nú hefur fyrirtæki úti í bæ boðizt til að leysa Landmælingar Íslands af hólmi fyrir hálfvirði og losa okkur við Magnús.

Gissur Pétursson er einn af hundruðum framsóknarkvígilda, sem hefur fengið embætti út á flokkinn. Hann er forstjóri Vinnumálastofnunar og passar, að stéttarfélög komist ekki upp með að reyna að troða sínu liði í vinnu við Kárahnjúka í staðinn fyrir Pólverja, Portúgala og Kínverja. Þess á milli reynir hann að hindra veitingahús af erlendum uppruna í að ráða kokka að heiman til að bjóða ekta matreiðslu. Til dæmis reynir hann að koma íslenzkum kokkum að á Kínahúsum. Þannig reynir hann að hindra viðskiptavinina í að fá ekta mat. Gissur þessi er hvarvetna til vandræða. Það á að reka hann.

Í átta síðna drottningarviðtali Morgunblaðsins við leiðtoga lífs þess kemur fram, að hann er enn reiður. Í viðtalinu bölsótast Davíð að venju út í nokkra helztu athafnamenn og fjölmiðla landsins. Hann hefur ekkert lært og engu gleymt við að segja af sér starfi landsföður í daglegri pólitík.

Við vitum, hvernig jámenn hoppa kringum sterka leiðtoga og reyna að lesa hug þeirra. Þannig hafa síkkófantar ævinlega hagað sér. Þannig hefur Davíð óbein áhrif á Björn Bjarnason, sem líka er gefinn fyrir hatur. Björn hefur svo óbein áhrif á hinn umsvifamikla Harald Johannessen ríkislögreglustjóra.

Í innsta kjarna Sjálfstæðisflokksins hafa valdamenn lengi verið gefnir fyrir refsingar. Þeim finnst, að refsa þurfi mönnum, sem haga sér ekki eins og til er ætlazt. Hinir refsiglöðu halda fundi á borð við fundi Styrmis, Kjartans og Jóns Steinars, þar sem skipulagðar eru refsiaðgerðir.

Kannski verður Geir Haarde fljótlega eins og Davíð. En til að byrja með hefur hann haldið sér til hlés í eltingaleik valdamikilla flokksmanna við valdamikla auðmenn og fjölmiðla úti í bæ. Vonandi er það merki þess, að meiri friður verði í þjóðfélaginu á hans valdatíma en verið hefur undanfarin ár.

Eftir dóm Hæstaréttar er kominn tími til, að menn nái sönsum og geti aftur farið að rífast um hefðbundna pólitík. Þjóðin vill fara að fá frið fyrir síkkóföntum og hatrinu mikla.

DV

Ísland er eina landið í Evrópu, þar sem Samkeppnisstofnun er lögð niður í hefndarskyni fyrir að reyna að koma Kristni Björnssyni á Kvíabryggju. Ísland er eina landið í Evrópu, þar sem Kristinn situr ekki á Kvíabryggju. Ísland er eina landið í Evrópu, þar sem kona samráðsforstjórans er forseti Alþingis. Ísland er eina landið í Evrópu, þar sem Ríkislögreglustjóri klúðrar rannsókn á olíusamráði til að hlífa Kristni við Kvíabryggju. Ísland er eina landið í Evrópu, sem slær út gömul mafíulönd við Miðjarðarhaf. Ísland er eina landið í Evrópu, þar sem olíusamráð eru skrípó.