Stjórnmálamaður í Austurríki, Peter Pilz, hefur hafið lögfræðilega kröfu um, að Arnold Schwarzenegger, ríkisstjóri Kaliforníu, verði sviptur austurrískum ríkisborgararétti fyrir að hafa samþykkt dauðarefsingu síðastliðinn miðvikudag. Pilz segir, að Schwarzenegger sé þekktasti Austurríkismaður í heiminum um þessar mundir og valdi Austurríki álitshnekki með aðgerð þessari. Dauðarefsing sé óheimil í Austurríki. Enginn Austurríkismaður og raunar enginn Evrópumaður megi taka þátt í slíku. Hún sé því næg ástæða fyrir sviptingu ríkisborgararéttar. BBC segir frá.

Brezki sagnfræðingurinn, Eric Hobsbawn, sem ritaði Öld öfganna, segir í Guardian í dag, að krossferð George W. Bush í Írak sé hættuleg tálsýn. Lýðræði verði ekki dreift um heiminn með byssum og sprengjum. Fólk verði ekki frelsað með því að drepa það. Hvert land hafi sína sögu og siði og muni hér eftir sem hingað til hafna innflutningi pólitískra áhrifa frá þrautvopnuðu hernámsliði. Saga 20. aldar sýni, að ofbeldi í nafni lýðræðis og frelsis sé ekki til þess fallið að breiða lýðræði og frelsi um heiminn. Innsetningarræða Bush sé að þessu leyti furðuleg og stórhættuleg í senn.

Fróður maður sagði mér í gær, að söluverðmæti Orkuveitu Reykjavíkur væri komið upp í 120 milljarða, meira en skuldir Reykjavíkurborgar, sem á fyrirtækið. Orkuveitan hefur með Hitaveitu Suðurnesja skákað Landsvirkjun sem framleiðandi orku til stóriðju, tiltölulega vistvænnar orku. Orkuveitan er stöðugt að kaupa litlar hitaveitur, nú síðast austur í Rangárvallasýslu. Sumt hefur mistekizt af tilraunum hennar, en í stórum dráttum er komið til sögunnar moldríkt fyrirtæki með framtíðarsýn. Það má hafa til marks um eymd Framsóknar, að Alfreð Þorsteinsson fer í taugar flokksforustunnar.

Frakkar eru ánægðir með sig, finnst allt bezt í Frakklandi, til dæmis betra en í Bandaríkjunum. Ef við líkjum Frökkum við Íslendinga að þessu leyti, skulum við minnast þess, að engum Frakka dettur í hug að segja við útlending: “How do you like France'”. Hann þarf ekki staðfestingu útlendinga á fordómum sínum. Að baki sjálfsánægjunni er sterk sjálfsmynd, sem hvílir föstum grunni á innri styrk þeirra sem þjóðar. Íslendingar eru hins vegar svo nagaðir af kvíða um stöðu sína, hafa svo veika sjálfsmynd, að þeir sækja staðfestingu fordóma sinna í spurninguna: “How do you like Iceland?”

Brezka konungsfjölskyldan er kennslubók um, að erfðafesta úreldist í stétt þjóðhöfðingja. Þar hafa í hálfa öld geisað undirmálsmenn, fyrst hertoginn af Edinborg með fúla brandara um þriðja heiminn. Síðan kom sonur hans, prinsinn af Wales, sem er svo ruglaður, að hann sendir undarlegar leiðbeiningar til ritstjóra brezkra dagblaða. Loks er þriðja kynslóð tossa komin í gang í fjölskyldunni með greindarskertum prins, sem stundar ljúfa lífið án þess að skilja neitt í þjóðfélaginu og án þess að skilja, að þjóðin er að borga þessu pakki kaup fyrir að vera öðrum fyrirmynd. Þessari ætt verður sparkað.

Barnett og Rivers segja í Boston Globe, að karlmenn séu hafðir fyrir rangri sök. Mismunur meðalvinnutíma, að heimilisstörfum meðtöldum, hjá kynjunum hafi minnkað úr hálfum þriðja tíma niður í einn. Þær segja rannsóknir sýna einnig, að strákar geti bæði talað og skrifað, karlmenn geti fóstrað börn, þeir gefi góð ráð í sama mæli og konur og séu alls ekki frá náttúrunnar hendi þannig gerðir, að þeir leiti upp í rúm hjá næstu konu. Það sé bara rugl, sem bíómyndir og sjónvarpsþættir frá Ameríku hefur komið inn hjá almenningi. Trygglyndi karla í sambúð mælist raunar 78% og kvenna 85%.

Samkvæmt umfangsmikilli skoðanakönnun á heimsvísu er mannkyn almennt hrætt við George W. Bush Bandaríkjaforseta og telur hann ógnun við heimsfriðinn. Samkvæmt könnuninni, sem birt var í gær í BBC, hefur þessi eindregni meirihluti stækkað eftir forsetakosningarnar í Bandaríkjunum fyrr í vetur. Þá varð einnig sú breyting, að Bandaríkjamenn sem persónur eru litnir meira hornauga en áður, enda hafa þeir staðfest gerðir forsetans. Prósentutölur voru háar í öllum spurningum könnunarinnar. Til dæmis eru 64% Breta alveg andvígir þeirri skoðun, að Bandaríkin hafi jákvæð áhrif í samfélagi ríkja.

Fíladelfía stjórnar ekki Framsóknarflokknum, heldur stjórnar Framsóknarflokkurinn Fíladelfíu til að ofsækja Alfreð Þorsteinsson. Lengi hefur verið siður framapotara á þeim bæ að sölsa undir sig saklaus félög úti í bæ til að auka styrk sinn í flokknum, en það afl er að mestu ímyndað. Árásin á Afreð, sem er að gera fína hluti í Orkuveitunni, er liður í tilraun gæludýra formannsins til að halda aga á flokknum, sérstaklega á Alfreð, Guðna, Sólveigu og Kristni. Þetta er til að rýma fyrir gæludýrunum og gert með samþykki formanns, sem sjálfur gæti ekki haldið aga á skólabekk í heilan tíma.

Umræða fjölmiðla eftir sýningu stuttmyndar Kristínar Ólafsdóttur staðfestir það, sem löngu áður var vitað, að Íslendingar hafa lélega sjálfsmynd og sækja hana að utan með spurningunni: “How do you like Iceland.”. Menn vissu áður, að Íslendingar reyna að losna úr sjálfum sér með því að drekka frá sér ráð og rænu. Nú hefur bætzt við fyrri skelfingu, að Íslendingar búi í ljótum skúrum og skrítin lykt sé af þeim og vatninu þeirra. Engin þjóð í heiminum er eins upptekin af áliti utanaðkomandi fólks. Nú þarf að fara að kenna Dale Carnegie í barnaskólum til að laga þetta.

Staðföstum fækkar stöðugt í stríðinu gegn Írak. Nú hefur nýfrjáls Úkraína ákveðið að kalla herlið sitt heim. Áður höfðu Spánn, Holland, Ungverjaland, Tékkóslóvakía, Litáen, Filippseyjar og Taíland gert slíkt hið sama og Pólverjar eru að minnka herlið sitt í Írak og undirbúa ákvörðun um brottför. Sumpart gera þau þetta til að bæta sambúðina við Frakkland og Þýzkaland. Eftir í hópi hinna staðföstu ríkja eru auðvitað Bretland, Ítalía og Danmörk, svo og ýmis viljalítil eyríki í Kyrrahafi og Karabíahafi, ennfremur eitt eyríki í Atlantshafi, sem kallast Davíð & Halldór.

Rannsóknir sýna, að fólk er hrætt við aldraða, vill losna við þá úr augsýn og er hrætt við langvinnaa reynslu þeirra. Annalisa Barbieri segir í Guardian frá ritstjórn, þar sem hún vann og þar sem nýr ritstjóri losaði sig við 65 ára gamlan alvitring, sem hægt var að fletta upp í. Hann var kominn á internetið áður en það varð formlega til og gat fundið þar allt. Það var samanburðurinn, sem skelfdi reynslulausa ritstjórann. Barbiere rekur nokkur dæmi þess, að fólk sé upp á sitt bezta um áttrætt eða jafnvel 96 ára gamalt. Við munum svo sem eftir Churchill og Adenauer.

Í viðleitni sinni til heimsyfirráða í tölvubransanum hefur einokunarfyrirtækið Microsoft rekið sig á Evrópusambandið. Svo er raunar pólsku ríkisstjórninni fyrir það þakka, því að hún beitti neitunarbanni gegn einkaleyfum Microsoft í Evrópu. Fyrirtækið hefur lagt fram umsóknir um 1500 einkaleyfi í Bandaríkjunum, sumar hverjar fáránlegar. Microsoft vill þrengja að opnum hugbúnaði á borð við Linux og OpenOffice, sem hafa gert fátækum kleift að feta sig áfram á tölvuöld. Þúsundir forritara berjast gegn einokun með því að forrita ókeypis fyrir frjálsa hugbúnaðinn.