Gylfi Arnbjörnsson hefur ævinlega rangar skoðanir, forritaðar af Samtökum atvinnulífsins. Ætíð gætir hann hagsmuna skuldareigenda. Aldrei fellst hann á, að stjórnir lífeyrissjóða verði skipaðar á lýðræðislegan hátt. Skipulega styður hann öll gæluverk fyrir verktaka, helzt orkuver, álver, spítalasteypu og göt í fjöll. Allt atriði, sem rústa ríkisfjárhag. Hann styður eindregið svonefnda sérfræðinga, sem sömdu mjög svo fáránlega, upprunalega rammaáætlun um orkunýtingu. Sem setti ókannaðan Reykjanesskaga allan í nýtingarflokk. Gylfi er algert flopp sem verkalýðsrekandi. Bíður grátandi eftir Bjarna Ben.

“Brynjar kastar öllum mínum syndum bak við sig, bak við sig, bak við sig. Hann frelsaði mig …” Þannig syngja sanntrúaðir Flokksmenn í dag. Hafa fengið Fjallræðuna frá Brynjari Níelssyni þingmannsefni. Vill, að bankahrunsmálin séu ekki rannsökuð sem sakamál. Rannsóknin ein sé verri en Kvíabryggjuvist, segir hinni nýi spámaður. Hann er kominn til að kasta öllum útrásarsyndum okkar bak við sig. Allt frá Vafningi yfir í forsætisráðuneyti Geirs. Meinta hrunið fólst bara í þessari venjulegu bankastreitu, sem varla telst vera kreppa. Afneitun hrunverja minnkar lítt við innreið Brynjars í musterið.

Um allan heim er hefðbundið og hagkvæmt, að umboðsmenn þrengstu hagsmuna villa á sér heimildir í pólitík. Þannig var staðan líka lengst af hér á landi. Sjálfstæðisflokkurinn og Framsóknarflokkurinn höfðu helmingaskipti á herfangi skömmtunar, gengislækkana og annarrar hagstjórnar. Bjálfarnir, sem ganga undir heitinu kjósendur, létu þetta viðgangast. Gerðu góðlátlegt grín að þessu eins og heiti spillingarinnar sýnir. Nú eru umboðsmenn sérhagsmuna alveg hættir að nenna að standa í undirferli og feluleik. Koma á Alþingi hreint og klárt fram sem einbeittir þjóðaróvinir. Og kjósendum er enn sama.

Lífeyrissjóðir eyðilögðu Alþýðusambandið. Verkalýðsleiðtogar sitja í stjórn  þeirra í nánu samstarfi við atvinnurekendur. Í framhaldinu einnig í sjóðum banka um útrásina. Alþýðusambandið varð deild í Samtökum atvinnulífsins og útrásar-klappstýra. Gætir hagsmuna sjóðanna gegn almenningi með varðstöðu um vísitölu skulda. Í bandalagi við peningagreifa heimtar Alþýðusambandið meiri stóriðju og fleiri gæluverk með rosakostnaði ríkisins. Gylfi Arnbjörnsson er sem verkalýðsrekandi afleiðing af ruglinu. Talar ekki mál almennings frekar en verkalýðsgreifarnir. Hvergi er lengur pláss fyrir Gylfa nema í Flokknum.

Lengi hefur mig vantað Stóra bróður til að halda í hendina á mér. Loksins hefur Mark Zuckerberg tekið við þessu nauðsynlega hlutverki. Fésbók hans hefur útvegað mér aðild að ýmsum félögum, sem ég vissi ekki, að væru til. Hann bendir mér sífellt á nýja vini og ræður mér heilt um að vingast við aðra. Hann hefur líka flokkað vini mína í betri vini og beztu vini. Hefur ákveðið, að allir eftirlaunamenn séu mínir beztu vinir. Nú hefur Mark líka byrjað að læka fólk og fyrirtæki fyrir mína hönd. Slær birtu á einmana líf mitt. Vona, að Mark útvegi mér nú þægilega innivinnu sem pólitískt kvígildi.

Heilsuspillandi er að hlusta á pólitíkusa gamla Íslands æpa hver á annan í sjónvarpi. Mér varð illt og slökkti snemma. Eftir lýsingum að dæma er engin leið að fá botn í, hvor hafði verri málstað og hvor laug meira. Steingrímur er kominn á leiðarenda í pólitík og Gylfi er löngu útrunninn sem leiðtogi verkalýðsins. Hafa má til marks um markleysi hefðbundinna stjórnmála, að þeir tveir séu látnir munnhöggvast. Steingrímur talar eins og umbi Alþjóða gjaldeyrissjóðsins og Gylfi eins og umbi Samtaka atvinnulífsins. Er nú ekki ráð að gefa öllum slíkum frí í allmörg ár og fá spánnýja þingmenn næsta vor?

Rómverjar vissu, að skolpræsi eru fremsta undirstaða siðmenningar. Cloaca Maxima var svo vel byggt, að það nýtist enn í dag. Eldri menningarríki en Rómverjar byggðu líka tilveru sína á holræsum. Ingibjörg Sólrún Gísladóttir innleiddi siðmenningu á höfuðborgarsvæðinu með Cloaca Maxima Reykjavikensis. Að öðru leyti eru Íslendingar enn mestu sóðar. Fjölmennt þorp norður í landi flýtur í sorpgerlum, Akureyri. Þingvallavatn fyllist af sóðaskap Nesjavalla og á Klaustri er sorpbrennsla nákvæmlega í miðju þorpi. Íslendingar telja hreinlæti vera eitthvert ógeð frá kontóristum í hinu hataða Evrópusambandi.

Jón Gunnlaugsson læknir barðist fyrir, að sögufrægri Nesstofu hinna gömlu landlækna yrði sómi sýndur með læknaminjasafni. Hreppurinn kom að góðu máli, fagfélög, stofnanir og einkum ríkið. Snemma fékk safnnefndin 2007-veiru í hausinn að hætti hrunverja. Lét reisa hús undir safnið við Nesstofu. Síðar fattaði hún, að þar þyrfti líka að vera kaffistofa og geymsla, svo húsið var stækkað. Nú er 2007-veiran liðin hjá og enginn finnur aurinn til að klára ruglið. Sumir telja ódýrast að rífa bara nýja húsið. Sennilega heppilegast. Þá verður loks hægt að innrétta gott safn í virðulegri og fagurri Nesstofu.

Frægustu umbar landsins eru umboðsmenn ógreiddra atkvæða. Fáeinir þingmenn Flokksins gegna því mikilvæga hlutverki. Nú hefur Gunnar Helgi Kristinsson stjórnmálafræðingur dottið í úrvalsliðið. Segir uppkastið að stjórnarskrá marklaust, meðal annars vegna þess að kjósendur hafi ekki fattað, þegar þeir kusu um málið í haust. Efnislega umræðu hafi skort. Þannig strikar Gunnar Helgi yfir eindreginn vilja mikils meirihluta þeirra, sem kusu að taka þátt. Líklega talar hann fyrir hönd ógreiddra atkvæða. Þar er kominn nýr umbi til að úrskurða, hvenær kjósendur séu marktækir eða skuli úrskurðaðir ógildir.

Rúmlega tveimur áratugum eftir Nesjavallavirkjun eru svonefndir fagmenn að átta sig á, að eitthvað hefur farið úrskeiðis. Þingvallavatn er hætt að vera gegnsætt. Þar mælist eitur á borð við kvikasilfur og líka þungmálmar af ýmsu tagi, sem til dæmis setjast að í fiski. Vatnhiti á einum stað er tíu gráðum hærri en eðlilegt er. Sómi Íslands að breytast í eitraðan poll? Auðvitað er þetta sama gamla sagan, Hrunverjar vaða í að redda hagsmunum verktaka. Líka við Hellisheiðarvirkjun. Víðu landi fordjarfað og eitruðum brennisteini spúð yfir mosa og lindir. Senn byrja menn að fatta. Verður Reykjanesskagi næstur?

Skrípaleikur Alþingis snýst um að stífla færibandið. Reyna að koma sem allra flestum málum í tímaþröng. Þannig vill stjórnarandstaðan stöðva ýmis góðmál, sem koma þjóðinni vel en sérhagsmunum illa. Efst eru þar á blaði kvótinn og stjórnarskráin, en rammaáætlun fylgir fast á eftir. Falli öll þessi mál, er fátt eftir af skrautfjöðrum ríkisstjórnarinnar. Eftir kosningar er reiknað með, að Flokkurinn myndi stjórn með annarri hórunni, Samfylkingunni eða Framsókn. Þá munu öll göfug mál verða sjálfdauð. Og meirihlutinn hefur svo veika sannfæringu, að hann nennir ekki að þvinga málin út í atkvæðagreiðslu.

Dæmigert fyrir fýlu lagatækna út í uppkastið að stjórnarskrá er ákvæðið um bann við herskyldu. Er það þó í samræmi við grundvallarsjónarmið allt frá stofnun lýðveldis, að Ísland taki ekki þátt í stríði. Ákvæðið er einfalt og fríar borgarana einfaldlega við herskyldu. Engu máli skiptir, þótt önnur ríki hafi ekki slík ákvæði. Þau hafa öll verið meira eða minna í styrjöldum um aldir. Þar er herskylda talin nauðsynleg til að treysta öryggi ríkisins. Hér eru aðstæður aðrar og sjónarmiðin önnur. Einkennilegt er, að lagatæknar djöflast út í alls konar atriði, sem eru í verkahring þjóðar en ekki þeirra.

Björt framtíð gagnast með því að draga fylgi frá Samfylkingunni og Framsókn. Annað er ekki þar að hafa. Flokkurinn fer í stjórn með þeim, sem bezt býður. Þar mun hann engin áhrif hafa á stefnu, en vera Gnarristum og slíku gengi aðgöngumiði að trogum ríkisins. Samstaða virkar á hinn veginn, enginn vill eiga samstarf við hana af ótta við sérvitra stefnu. Meiri von er í Dögun, einkum ef fleiri fulltrúar Stjórnlagaráðs fara í vonarsæti á framboðslistum. Hægri grænir gera gagn með því að draga fylgi frá Flokknum. Ekkert framboð ræðst á Vinstri græna, enda er Páll frá Heimssýn einfær um slátra flokknum.

Þjóðþrifafyrirtækið Drómi auglýsir á heilsíðu siðferðisvottorð frá frægu Fjármálaeftirliti. Svo virðist sem eftirlitið hafi spurt forstjóra Dróma, hvort ekki sé allt í lagi þar á bæ. Samkvæmt verklagsreglum eftirlitsins á það ekki hafa eftirlit með fjármálastofnunum. Að sögn forstjórans, þegar smálánabankarnir voru gagnrýndir. Samkvæmt sömu reglum talar þetta fræga Fjármálaeftirlit bara við starfsfólk, aldrei við viðskiptavini fyrirtækja í þjóðþrifum. Við engan kúnna var talað af þessu tilefni. Allir geta fengið siðferðisvottorð frá frægri stofnun, sem enginn veit, að hafi nein verkefni.

Vestræni herinn býr sig nú til brottfarar frá Afganistan. Ellefu ára hernám hafði öfug áhrif við væntingar. Talíbanar munu fylla eyðuna, sem myndast. Spilling er gegndarlaus í landinu, mest vegna vestrænna áhrifa. Kabúl hefur verið breytt í dauða kastalaborg. Nútímavæðing hefur engin orðið í landinu og skólum verður lokað. Framleiðsla eiturlyfja margfaldaðist í skjóli hers, en talíbanar munu halda henni í skefjum. Kannski tíunda tilraun Vesturlanda til að stjórna Afganistan í sinni mynd. Enginn hefur stuðlað meira að öfgum múslima en einmitt Bandaríkin og hin vígfúsu Vesturlönd. Þar á meðal Ísland.