Engin trúarbrögð heimsins eru eins og islam. Engin ólga verður í heiminum, þótt umboðsmenn kristni, búddatrúar, brahmisma eða sjintó telji trú sína hafa sætt móðgunum. Ýmis dæmi eru um, að öll þessi útbreiddu trúarbrögð skilja milli trúar og stjórnmála í veraldlegum ríkjum, á vesturlöndum eftir frönsku og bandarísku byltingarnar. Trú múslima er hin eina, sem setur trúna ofar veraldleikanum, gerir menn múslima fremur en borgara. Hún er hin eina, sem sannanlega kallar á hryðjuverk og fjöldamorð, eina trúin, sem ekki er húsum hæf.

Ekki gleyma, að það voru róttækir múslimar á Vesturlöndum, sem ofsóttu brezka rithöfundinn Salman Rushdie og myrtu hollenska kvikmyndamanninn Theo van Gogh. Ekki gleyma, að ástæðan fyrir teikningum af Múhameð spámanni í Jyllandsposten voru mótmæli gegn því, að enginn hafði þorað að myndskreyta barnabók um Múhameð spámann af ótta við tilræðismenn. Þannig er islam að eitra vestrænt samfélag innan frá. Þegar hefur verið gengið allt of langt í Vestur-Evrópu við að þjónusta múslimsk áhugamál, sem stinga í stúf við vestrænar hefðir.

Til marks um vitleysuna, sem veður um lönd múslima, er krafa Najef prins, innanríkisráðherra Sádi-Arabíu um, að páfinn í Róm banni teikningar af Múhameð spámanni, þótt páfinn hafi ekki bannað teikningar af Kristi og geti raunar ekki bannað eitt né neitt. Hugmynd ráðherrans sýnir í hnotskurn, að þjóðir spámannsins hafa enga hugmynd um, hvernig vestrænt þjóðfélag virkar og hvað það er, sem hefur lyft því upp úr eymd og volæði fyrri alda. Það er gersamlega úti af kortinu að láta hótanir um hryðjuverk víkja okkur frá vestrænum forsendum.

Við búum í góðu þjóðfélagi, gölluðu en góðu. Við búum ekki í ríki, þar sem þjóðmenning er frosin, lítt skapandi og ófrjáls. Við búum ekki í ríki, þar sem lítið er um vísindi og uppfinningar. Við búum ekki í ríki, þar sem fólk brennir útlenda fána og eftirmyndir útlendinga. Við búum ekki við stjórn klerka. Við búum semsagt ekki í neinu af ríkjum Múhameðs spámanns. Við búum við arfleifð Voltaire og munum ekki sætta okkur við, að framandi sjónarmið neyði okkur út af þeirri braut. Við munum því ekki verða við óskum múslima um að biðjast afsökunar.

Blöð í heimi múslima eru oft ekki vönd að efni sínu. Þau birta myndir af fólki að brenna vestræna fána og eftirmyndir af vestrænum leiðtogum. Þar sjást líka teikningar af Ísraelsmanni við mannát. Enginn mótmælir slíku, enda þarf mikið til að egna vestrænt fólk. Hins vegar varð allt brjálað, þegar birtar voru teikningar í Evrópu af Múhameð spámanni. Þetta sýnir, að menningarlegt úthaf er milli vestrænna og íslamskra þjóða. Við höfum loksins áttað okkur á, að þetta úthaf gerir fjölmenningarþjóðfélag ókleift að þessu leyti.

Íran og Bandaríkin eru verstu ríki heims samkvæmt nýrri könnun, sem náði til 40.000 manns í 33 löndum, talin hafa verst áhrif. Almennt er Evrópulönd bezt allra ríkja, talin hafa bezt áhrif. Sérstaklega líta menn jákvæðum augum á Evrópu í heild, nánast enginn telur hana hafa vond áhrif. Þessar niðurstöður tengjast því, að rof hefur orðið milli stefnu Evrópu og Bandaríkjanna í heimsmálunum á síðustu árum. Evrópa er því vel sett til framtíðaráhrifa.

Hættan á hryðjuverkum núna meiri en nokkru sinni fyrr að mati bandarískra embættismanna. Þótt Bandaríkin hafi haft hendur í hári nokkurra millistjóra alKaída, hefur hreyfingin breiðst út og náð samstarfi við hliðstæðar hreyfingar, svo sem Abu Zarkavi í Írak. Net hryðjuverkasveita er dreifðara en áður og erfiðara viðureignar. Allt þetta hafa menn lengi vitað, en Bush forseti hefur lengi haldið fram, að vel gangi aðgerðir gegn hryðjuverkum. Hann segir líka að vel gangi í Afganistan og Írak, þótt aðrir séu aldeilis ekki á sama máli.

Það er fjör í pólitíkinni á Seltjarnarnesi. Tveir eru í framboði um flest sæti, þar á meðal það efsta. Baráttan er tiltölulega hófsöm, lítill kostnaður á hvern frambjóðanda. Þeir hafa sent okkur fáorða bæklinga, þar sem í ljós kemur, að flestir hafa áhuga á málaflokkum barna og aldraðra. Ætla mætti að þetta væri prófkjör hjá Samfylkingunni, en það er raunar hjá Sjálfstæðisflokknum. Þar sem sá flokkur hefur frá söguöld verið með meirihluta á Nesinu, er þetta prófkjör áhrifameira en sjálfar kosningarnar verða.

Skattar eiga að vera einfaldir og þeir eiga ekki að vera tekjujöfnun. Alls konar aðrar leiðir eru til tekjujöfnunar, svo sem barnabætur, örorkubætur, ellistyrkur og frí þjónusta á borð við spítala, skóla og leikskóla. Stig tekjuskatts á að vera eitt. Tekjuskattur á laun og fjármagn á að vera hinn sami. Vaskur á að vera einn á allar vörur og þjónustu, líka matarskattur. Vask á að leggja á allar innfluttar vörur og á farseðla til og frá landinu. Hafa má til marks um lítinn kjark pólitíkusa, að þeir hafa ekki komið svona einföldun í verk.

Strætó hefur tekið í notkun tvo metanvagna, sem ganga fyrir rusli úr Sorpu. Slík endurvinnsla er gagnleg, en metan nær mjög skammt og er engan vegin sambærilegt við vetnið, sem getur leyst olíur af hólmi í samgöngum. Ég saknaði þess, að enginn minntist á stöðu vetnisins, þegar þeir voru að hossa sér á metaninu. Hafa pólitíkusar landsins gleymt því eins og Hjálmar Árnason, að til stóð, að Ísland yrði fyrsta vetnislands heimsins. Eða eru þeir bara að hala í land? Ekkert hefur komið í ljós, sem á að hindra sigur vetnisins sem orkugjafa.

Adolf Ingi Erlingsson íþróttafréttmaður telur hestamenn rallhálfa braskara, sem stundi dund en ekki íþrótt. Ég veit ekki, hverja hann þekkir eða þekkti í gamla daga, þegar hann taldi sér trú um, að þessi væri ímynd hestamanna. Hitt er svo annað mál, að hestamennska og golf eru fjölmennustu greinar innan íþróttasambandsins og hafa þá sérstöðu umfram aðrar greinar, að þær eru stundaðar af öllum þorra félagsmanna, eru almenningsíþróttir. Hið sama verður ekki sagt um þorra annarra íþróttagreina. Adolf Ingi skautar á hálum ís í fordómum sínum.

Þrjár bíómyndir munu hafa áhrif á gang mála í miðausturlöndum, ekki af því að þær lýsi staðreyndum rétt, heldur af því að þær reyna að brjótast út úr þröngum þjóðernissjónarmiðum, þar sem mín þjóð gerir allt rétt og hinar gera allt rangt. Þær fjalla ekki um baráttu góðs og ills, heldur um fólk. Þetta eru Paradise Now eftir Hany Abu Assad, Syriana eftir Stephen Gaghan og München eftir Steven Spielberg. Áhorfendur hafa líka gott af að átta sig á, að ekkert er athugavert við að líkja saman ofbeldi stjórnvalda annars vegar og hryðjuverkum hins vegar.

Þétting byggðar er tízkufyrirbæri, sem ekki hefur haft áhrif á London, eina af dreifðustu borgum í Evrópu. Þar býr fólk í úthverfum og líður bara vel, þrátt fyrir kenningar skipulagsfræðinga um, að þétta skuli byggð. Raunar á dreifbýlið í London sér aldagamlar rætur. Hrein unun er að skoða marga af útbæjunum og enn betra að búa þar. Þétting byggðar er síður en svo neitt áhugamál fólks, sem býr í brezkum útbæjum. Það rekur upp ramakvein, ef upp koma hugmyndir um slíkt. Heppilegt er, að Reykjavíkurlistinn skuli ekki vera við völd þar í landi.

Brezka frumvarpið gerir ráð fyrir, að bannað sé að birta mynd af bænastund múslima og skrifa þar undir: Leitað að linsum Khomeini erkiklerks! Salman Rushdie hefði ekki mátt skrifa Satansversin. Auðvitað hefði Jyllandsposten ekki mátt birta teikningu af Múhameð spámanni með sprengju vafða í túrban. Frumvarpið felur í sér, að einhver segist vera móðgaður og þá á bannið að taka gildi, gróft dæmi um félagslegan réttrúnað. Brezka þingið gerði rétt og hafnaði þessu. Hins vegar er hugsanlegt, að Alþingi Íslendinga bili í meiðyrðafrumvarpinu.

Fjallað var um félagslegan réttrúnað í umræðunni í Bretlandi um frumvarp stjórnvalda um bann við móðgunum við trúarbrögð. Bent hefur verið á, að ófært sé, að menn eða stofnanir geti sagt: Ég er móðgaður. Og það eigi að gilda sem heimild um, hvort um móðgun sé að ræða. Svipaðar fullyrðingar hafa heyrzt hér á landi, þar sem menn menn vilja þrengja að móðgunum og einkum gera þær dýrari í meiðyrðamálum. Á þessu sviði lýðræðis mátti sjá merki um afturför í báðum löndum. Móðgunarklausan var þó felld í brezka þinginu í gær.