Frá sjónarmiði skaðaminnkunar talar Sigmundur Davíð of seint við fjölmiðla. Og bara við þá, þar sem hann telur sig geta ruglað átölulaust. Hættir sér ekki út úr vernduðu umhverfi siðblindingjans. Vekur auðvitað ekki traust. Jafnvel þótt átta útskýrarar muni segja, hvað hann var að meina. Hann er allt annar en hann sagðist vera í kosningunum. Laug um doktor frá Oxford. Skáldaði ævintýraloforð, sem hann stóð ekki við. Verst er, að hann mælti með krónunni, en faldi milljarð þeirra hjóna í gjaldeyri á aflandseyju. Var það, sem hann sjálfur hafði kallað að vera hrægammur. Í Vestur-Evrópu væri slíkur siðblindingi fokinn úr embætti.

Vestræn ríki taka yfirleitt að sér fleiri hlutverk en næturvarðarins, einkum velferðar. Upprunalega hlutverkið snýst mest um „libertarianism“, að vernda eignir auðgreifa gegn fólkinu og víkka svigrúm auðgreifa gegn ríkinu. Nýja hlutverkið felst mest í að vernda fólkið fyrir auknu svigrúmi auðgreifa. Bezt hefur það gengið á norðurlöndum, þar sem velferð er orðin vel skipulögð. Þar kom í ljós á allra síðustu árum, að ríkisrekstur er hagkvæmari í heilsu og menntun en pilsfaldarekstur á kostnað ríkisins, svo og einkarekstur. Sjónarmið auðgreifa og velferðar berjast um völdin og öld velferðar rís úr öskustónni.

Með viðtalinu við Fréttablaðið staðfestir Sigmundur Davíð, að hann er mesti siðblindingi landsins. Ekkert stenzt af því, sem hann áður sagði, sama um hvað hann er að tala. Á þingi sagði hann sig mundu fara eftir siðareglunum. Skrifaði síðan ekki undir þær og felur sig núna bak við siðaregluleysið. Býr á eyðibýli til að hafa fé af ríkinu. Segir alla Íslendinga vera kröfuhafa, það er „étið þið skít“. Hótaði kröfuhöfum kylfu og haglara, en veitti þeim síðan feitan afslátt. Forherti skrumarinn segir bara það, sem hljómar bezt hverju sinni og hefur alla þjóðina að fífli. Bófinn hundskist burt og úldin Framsókn með honum.

Aðeins eitt sagði Sigmundur Davíð við Fréttablaðið, er ég vissi ekki áður. Hann heldur, að allir Íslendingar séu kröfuhafar. Sennilega þekkir hann enga aðra en Tortóla-fólk með fé í aflandsfélögum. Heldur að öll þjóðin sé eins og vinir sínir. Hlýtur að vera athyglisvert fyrir þann helming þjóðarinnar, sem á varla til hnífs og skeiðar. Í heimi Sigmundar hafa allir úti öll spjót til að hafa fé af ríkinu. Sjálfur þykist hann eiga heima á afskekktu eyðibýli í Jökulsárhlíð til að fá styrk út á það. Kjarni málsins er þó hinn sami og áður. Sigmundur hélt milljarðinum leyndum fyrir allri þjóðinni unz blaðamenn komu upp um hann.

Hryðjuverk í Vestur-Evrópu eru færri á þessari öld en þau voru síðustu áratugi liðinnar aldar. Umfang hvers hryðjuverks er hins vegar stærra, margir tugir drepnir í hvert sinn. Fyrra tímabilið voru hryðjuverk á vegum margra fámennra og óskyldra hópa. Núna eru þau nánast eingöngu á vegum eins aðila, róttækra múslima, sjá þó Breivik. Þegar hver atburður er stórfelldur og sömu öfgar ætíð að baki, er skiljanlegt, að hræðslan sé meiri. Í samanburði við aðra óvænta dauðdaga eru hryðjuverk í Vestur-Evrópu samt rosalega fátíð. Nánast engar líkur eru á, að þau valdi þér ótímabærum dauða. Þið getið því óhrædd haldið ró ykkar.

Molenbeek hverfið í Bruxelles er miðstöð ofsa í Evrópu síðustu misseri. Dæmi um stjórnleysið í Belgíu. Hverfið varð smám saman að borg múslima. Þeir, sem náðu í menntun og störf, hurfu annað og löguðust að samfélaginu. Eftir situr fátækt fólk, sem er að mestu á sósíalnum. Ungt fólk eygir enga von og verður ósátt við ytra samfélagið. Önnur og þriðja kynslóð innfluttra múslima. Reiðin er mögnuð í moskum, sem predika aðra siði en þá, sem gilda í Belgíu. Hryðjuverkin í París í nóvember voru framin af fólki úr hverfinu. Og forsprakkinn fannst fyrir nokkrum dögum falinn þar. Molenbeek er víti til að varast, ekki búa til fleiri gettó.

Um Myllulæk

Fylgi við stjórnarskrá fólksins er víðfeðmt, það sýna kannanir. Að sama skapi grunnt, rís og hnígur eftir atvikum. Fyrir síðustu kosningar var massinn búinn að gleyma málinu. Hljóp með lafandi tungu eftir Sigmundi Davíð, heimsmetshafa í loforðum. Nú hefur málið snúizt. Fólk vill stjórnarskrá og silfurskeiðungurinn er afhjúpaður sem Tortola-greifi í skattaskjóli. Ekki er þó víst, að það endist til kosninga. Almannatenglar eru að skálda ný loforð, sem geti fleytt bófunum gegnum kosningar. Miklu djúpstæðari stuðningur er við lífskjör en lýðræði. Það, sem kemur við pyngju fólks, stýrir atkvæði þess. Hugsjónir eru í aftara sæti.

Minnkum álag á starfsfólk Landspítalans. Kostar töluvert, má gerast í áföngum. Eyðum biðlistum eftir aðgerðum og plássi. Kostar töluvert, má gerast í áföngum. Tæknivæðum spítalann. Kostar töluvert, má gerast í áföngum. Byggjum mikið við spítalann. Kostar töluvert, má gerast í áföngum. Vitrænt væri að vinna eftir nokkurra ára áætlun. Að þeim tíma liðnum hafi sjúkraskýli í styrjaldarástandi endurfæðst í norrænum hátæknispítala. Til viðbótar afnemum við kostnaðarhlut sjúkra. Kostar töluvert, má gerast í áföngum. Dæmið allt fjármagnist með fullri auðlindarentu og endurheimtum auðlegðarskatti. Ekkert flókið mál, þýfið er til.

Einfalda staðreyndin er, að forsætisráðherrahjónin pukruðust í felum með rúman milljarð í aflandsfélagi á Tortola. Siðlaust, hvað sem segja má um lögmætið. Sigmundur Davíð skrifaði ekki undir siðareglur sínar, auglýsti þær ekki og því þykist hann ekki þurfa að halda góða siði. Hann hefur forustu í eftirgjöfum til kröfuhafa föllnu bankanna, svokallaða hrægamma. Á sama tíma er hann hrægammur sjálfur. Sama er, þótt fylgismenn hans hneykslist á fjölmiðlunum, staðreyndir málsins eru öllum ljósar: Falinn milljarður í aflandsfélagi á Tortola. Getur ekki verið verra fyrir pólitíkus, sem semur um mikla afslætti til hrægamma.

Hryðjuverkin í Bruxelles stigmagna Evrópustríðið milli veraldlegs vesturs og miðalda austurs. Hófst í París 13. nóvember og heldur áfram víðar um Evrópu, í dag í Bruxelles.  Eftirlit með múslimum og moskum þeirra verður margfaldað í Evrópu. Nærri allir innflytjendur til Evrópu eru til friðs. Nema sumir hópar múslima, er hafa látið klerka magna sig upp í bókstafstrú. Trú á heilagt stríð, trúarlög, karlrembu og kvenhatur, sem einkennir nútíma íslam. Þúsundir slíkra af annarri og þriðju kynslóð múslima í Vestur-Evrópu eru komnir til baka frá hryðjuverkum Isis í Sýrlandi. Hyggjast flytja stríðið út um alla Vestur-Evrópu.

Skondið, að kjósendur skuli velja sér til forustu silfurskeiðunga, sem fela auð sinn á aflandseyjum. Sem nota ríkisvaldið til að færa gæludýrum sínum peninga á silfurfati. Sem lifa á fjölþjóðlegri mynt og segja kjósendum á sama tíma, að krónan sé málið. Sem í hverju skrefi hossa auðgreifum á kostnað almennings. Sem eru svo spilltir, að leitun er að öðru eins hjá vestrænum þjóðum. Sem vinna kosningar á firrtum yfirlýsingum um risavaxnar gjafir handa öllum. Hefur allt komið skýrt í ljós á þremur stjórnarárum. Samt er enn þriðjungur þjóðarinnar fastur í fylgispekt við yfirbófana og bófaflokka þeirra. Sannkallað Undraland.

Kínverska lopapeysan er skondið dæmi um heimsku gagnslausa ferðamálaráðherrans. Tók frí frá umræðu um „gríðarlega“ vinnu í ráðuneytinu við að ná „gríðarlegri“ samstöðu um ferðamál. Án þess að nokkuð hafi gerzt. Ráðherrann náði sér í ferð með Icelandair til að færa borgarstjóra Chicago „íslenzka“ lopapeysu. Var að vísu ekki íslenzk, heldur kínversk. Og ekkert lík lopapeysu. Með svo gríðarlegu hálsmáli, að vestra töldu menn þetta vera pils, íslenzka útgáfu af Skotapilsi. Því miður náðist ekki mynd af borgarstjóranum stíga í peysuna og hysja hana upp um sig. Hefði verið frábær endapunktur á gríðarlega brýnni ferð ráðherrans.

Sigmundur Davíð Gunnlaugsson hélt leyndum hagsmunum sínum af peningum eiginkonu sinnar í skattaskjóli á Tortola. Leyndum fyrir öllum, þar á meðal samherjum og samstarfsflokki. Sumir segja það í lagi, því hann hafi ekki brotið lög. Málið snýst þó um siðrof fremur en lögbrot. Forsætisráðherra verður að vera hafinn yfir grun um hugsanlega hagsmunagæzlu. Hafði færi á að gæta hagsmuna þessara peninga. Einnig segja verjendur, að Sigmundur sé ekki tengdur eiginkonu sinni. Hann er þó ekki bara tengdur henni, heldur öllu sínu „tengdafólki“. Orðið segir allt, sem segja þarf um þá lélegu röksemd. Sigmundur Davíð á að segja af sér.

Persía er árþúsunda gamalt menningarríki og höfuð Shia, annarrar megingreina Islam. Sumt fer þar betur en á veraldlegum vesturlöndum. Samt er Persía enn á miðöldum eins og íslam almennt. Trú og pólitík ofin saman í rembihnút. Trúin hefur ekki slípazt af að vera á hliðarspori í veraldlegu samfélagi. Enn er konan undirgefin, ekki sjálfráð. Tekur hálfan arf á móti karli og fær hálfar skaðabætur. Hefur aðgang að færri háskóladeildum, sárafáar eru þingmenn. Konur eru annars flokks borgarar í Persíu sem og í öðrum löndum múslima. Lýsing eins þingmanns pírata á ferð um Persíu gefur afar sykraða mynd af veruleikanum.

Wikipedia um kvenréttindi í Persíu.

Sykruð lýsing Ástu Helgadóttur þingmanns í Stundinni.

Bófaflokkar ríkisstjórnarinnar ganga ítrekað fram af venjulegu fólki. Misferli þeirra verður stærra og opnara með hverri viku. Eigi að síður styður þriðjungur þjóðarinnar bófaflokkana. Mér sýnist sem þessi þriðjungur sé skipaður nokkurs konar Orkum. Þeir skríða upp úr jörðinni á kjördegi. Bregðast ekki húsbændum sínum, þegar í harðbakkann slær. Ég mundi ekki vilja sitja til borðs með Orkum. Þeir gera Ísland óbyggilegt. Neita ungu láglaunafólki um mannsæmandi lífskjör. Af því stafar flóttinn til Noregs. Ríkasta þjóð í heimi vanrækir að rukka rentu af ótæmandi auðlindum sínum. Því Sauron og Saruman vilja hirða allt og fela.