Hæstaréttardómurinn gegn þrotabúi gamla Landsbankans flýtir fyrir uppgjöri búsins og gjaldþroti þess. Bankinn verður að koma erlendum eignum í verð og flytja inn gjaldeyrinn. Borgar síðan erlendum kröfuhöfum í krónum, sem þeir vilja forðast. Eru því líklegri en áður til að gefa eftir hluta gegn því að fá hitt í gjaldeyri. Erlendar eignir föllnu bankanna nema 2.300 milljörðum, svo þetta bætir gjaldeyrisstöðuna. Um skeið verður eins konar störukeppni í gangi, án þess að vitað sé um útkomu hennar. Plúsar og mínusar eru við þessa störukeppni. Á meðan verða gjaldeyrishöft áfram og erlent lánsfé fæst ekki.

Sigurður Ingi Jóhannsson ráðherra vakti athygli á fundi um lífræna ræktun og verzlun. Vissi greinilega ekkert um hvað málið snerist. Sagði bara dæmisögu, er enginn skildi. Fundarmenn hafa síðan komið hver á fætur öðrum í fjölmiðla til að undrast ráðherrann. Virðist telja lífræna ræktun sjálfsþurftarbúskap í tínslu villtra jurta. Hafði engan áhuga á að heyra hið rétta. Enda er hann ráðherra atvinnugreinar, sem allra skemmst hefur gengið í lífrænni ræktun í Evrópu. Forngripurinn í ráðherrastóli hefur ekki orðið var við sprengingu í Evrópu og Bandaríkjunum í verzlun lífrænna afurða. Hann er aðhlátursefni.

Björn Zoëga forstjóri hyggst ekki taka þátt í að hrinda Landspítalanum fram af brúninni. Hann er hættur. Hefur séð fjárlagafrumvarp bófanna, sem notuðu spítalaféð í annað. Sigmundur Davíð Gunnlaugsson og Bjarni Benediktsson bera alla ábyrgð á þessu ástandi. Eyddu sumrinu í að gefa kvótagreifum eftir auðlindarentu og öðrum greifum auðlegðarskatt. En settu öll framfaramál almennings í nefndir og nefndanefndir. Þeir geta ekki kennt neinum öðrum um fall Landspítalans fram af brúninni. Sumarsukk bófanna tveggja er margfalt meira en sem nemur fjárþörf hans. Þeir einir hrinda Landspítalanum fram af.

Ráðherrar Sjálfstæðisflokksins segja sem fæst, en litlu framsóknarkallarnir í ríkisstjórninni þenja brjóst. Þykjast vera töffarar, sem að hætti ársins 2007 geti sagt “ég-á-það-ég-má-það”. Þannig hjó Gunnar Bragi á Evrópu í stað þess að láta hana hverfa í þoku. Sama gerði Sigurður Ingi í náttúruvernd, afskaffaði bara lögin. Eygló Harðardóttir rekur nefndarmenn kruss og þvers, án þess að vitað sé um nein pólitísk afglöp þeirra. Sigmundur Davíð kallar stofnanir og samtök, sem honum líkar ekki, marklausar skammstafanir. Valdið hefur stigið ráðherrum Framsóknar til höfuðs. Þar er drambið falli næst.

Að skammstöfuninni SDG frátalinni segist forsætisráðherra andvígur flestum skammstöfunum: Hann hefur “ekki miklar áhyggjur af því hvað hinum og þessum skammstöfunum finnst um þetta frumvarp”. Þannig lýsti hann fjölþjóðlegum björgunarsveitum í fjármálum, svo sem Alþjóða gjaldeyrissjóðnum og Efnahags- og framfarastofnuninni. Nú lýsir hann á sama hátt aðilum vinnumarkaðarins, Alþýðusambandinu, Samtökum atvinnulífsins og Viðskiptaráði. Þetta er nokkuð bratt hjá hraðlygnum strák, sem þekktur er af óskiljanlegum ræðum, þar sem orð eru hengd saman án samhengis. Hroki fer fáum vel og SDG einkar illa.

Lítið dæmi um bullið, sem vellur upp úr forsætisráðherra, þegar hann lýgur ekki beinlínis: Hann segir oddamenn vinnumarkaðarins aðeins vera þrjá menn, sem ekki tali fyrir aðra, bara fyrir sig. Eru þeir þó valdir af fulltrúum, sem kosnir eru í félögum. Nákvæmlega eins og forsætisráðherra er valinn af kosnum þingfulltrúum. Talar þá Sigmundur Davíð ekki fyrir ríkið, bara fyrir sjálfan sig? Þannig má rekja sig eftir ræðum hans, þær eru samhengislítill flaumur orða, svokölluð munnræpa. Kerlingum finnst gott að heyra strákinn tala djúpt niður í hálsinn, finnst hann ábyrgur. Er þó bara lyginn bullari.

Þótt saga kristinnar kirkju sé blóði drifin, verður íslam að teljast vera og hafa verið herskárra trúfélag. Með hervaldi varð hún strax ríkistrú Norður-Afríku og Miðausturlanda allt að Indlandi. Múslimar eiga enn í dag erfiðara með að samlagast öðru fólki en fylgismenn annarra trúfélaga. Síðari hluta miðalda var íslam samt meiri menning en kristni. Í skjóli íslams blómstruðu vísindi, sem áttu erfitt uppdráttar í kaþólskum ríkjum. Á tíma endurreisnar tóku vesturlönd hins vegar framúr. En þá fremur sem veraldleg ríki Mammons en sem kristin ríki. Framfarir fæðast á vesturlöndum, ekki í heimi íslams.

Fækkun bílastæða við ný hús í eldri byggð niður í 0,8 stæði á íbúð leiðir til vandræða nágranna. Yfirfall bílanna kemur niður á bílastæðum í nágrenni nýju húsanna og dregur úr þægindum fólks í öllu hverfinu. Nýju húsin skapa líka skugga og spilla útsýni fólks í gömlu húsunum. Þétting byggðar leiðir þannig á ýmsan hátt til óþæginda þeirra, sem fyrir búa í hverfinu. Þeir mæta reiðir í grenndarkynningar, skrifa andmælabréf og fara loks í skaðabótamál við sveitarfélagið. Stefna byggðarþrengingar í Reykjavík er ávísun á þess háttar vandræði. Má líkja við tilraun til pólitísks sjálfsvígs meirihlutans.

Verði flugvöllurinn í Vatnsmýri lagður niður, vil ég, að innanlandsflug sé flutt til Keflavíkurvallar. Að völlur og innviðir séu þar notaðir, en ekki lagður kostnaður í nýjan flugvöll. Hef enga trú á, að fólk tapi heilsu á að lenda ekki við hlið Landspítalans. Gildi flugvallarins er hins vegar allt annað. Hann hindrar ráðagerðir um þétta byggð í Vatnsmýri. Þétting byggðar er hvarvetna til vandræða. Hún leiðir til óánægju íbúa og mótmæla þeirra, sem lenda svo í málaferlum. Við þurfum meira af opnum svæðum og sambandi við náttúruna. Ekki stælingu á borgum, sem áður var troðið innan við borgarmúra.

Hatur framsóknarmanna á náttúrunni er gamalgróið. Munið þið eftir Valgerði Sverrisdóttur og Siv Friðleifsdóttur? Þóttust vera töff. Framsókn er bara jarðvöðull, sem elskar jarðýtur og grjótflutninga, skurðgröfur og jarðbora. Þetta í blóðinu. Nú er kominn nýr ráðherra, Sigurður Ingi Jóhannsson. Segist ætla að afnema nýju náttúruverndarlögin. Frestar friðlýsingu Þjórsárvera. Færir virkjunarkosti úr biðflokki í nýtingarflokk. Segist slátra rammaáætlun um sátt milli virkjana og friðunar. Segist helzt vilja leggja niður sjálft umhverfisráðuneytið. Samtals heitir þetta einfaldlega: Hatrið á náttúrunni.

Á hverju ári eru 33.000 Bandaríkjamenn drepnir með skotvopnum, fleiri en í umferðarslysum. Eins og allir Íslendingar séu drepnir á tíu ára fresti. Af þessum fjölda deyja innan við fimm á ári í því, sem kölluð eru hryðjuverk. Má kalla þetta borgarastyrjöld? Barn, sem hringir dyrabjöllu, er skotið til bana. Þetta er ekki lengur siðað samfélag borgara, þetta er löglaus þriðji heimurinn. Byssueign vex, en Barack Obama forseti tuldrar bara og gerir ekki neitt. Þetta er meiriháttar vandi. Leiðir meðal annars til, að þú sætir áreiti á flugvöllum, sértu svo hugumstór að ferðast til Bandaríkjanna.

Um öll vestræn ríki klóra menn sér í hausnum út af tölvu-ofbeldi Bretlands og Bandaríkjanna. Hakkarar NSA og GCHQ réðust til dæmis á Belgacom. Stjórn Belgíu hefur opinberlega kvartað. Áður höfðu menn talið, að Kínastjórn væri að baki skæruhernaðarins. En það reynast vera stjórnlausar leyniþjónustur Bretlands og Bandaríkjanna. Engin leið er að fá stjórnir ofbeldisríkjanna til að tjá sig um framvindu málsins. Furðulegt er, að ríki skuli vilja vera í hernaðarbandalagi með Bretlandi og Bandaríkjunum. Er líta á bandamenn sína sem svarna óvini. Og svífast einskis í að grafa undan bandalagsríkjum sínum.