Ásta Ragnheiður Jóhannesdóttir, forseti Alþingis, hringdi Sigmund Davíð Gunnlaugsson, formann Framsóknar, úr ræðustól í gær. Vel og drengilega var að því staðið hjá henni. Hún verður betri forseti en sá, sem á undan henni var. Sigmundur var kominn langt út fyrir umræðuefnið og reyndi að yfirtaka fundarstjórn. Sigmundur er hress og væri fínn í blogginu, færi þar hamförum. En frekjuhegðun hans hentar síður flokksformanni. Ekki gengur, að slíkur reyni að taka völdin af forsetanum og skipta einhliða um dagskrá. Reyndari áhrifamenn í Framsókn verða að kenna nýjum formanni að froðufella minna.

Samningurinn um IceSave er fjárkúgun. Að henni standa Evrópusambandið og Alþjóða gjaldeyrissjóðurinn auk Bretlands og Hollands. Norðurlöndin eru stuðningsaðili kúgunarinnar. Þau neituðu að hjálpa, nema Evrópusambandinu og gjaldeyrissjóðnum væri hlýtt. Allir þessir aðilar höfðu samráð um að sliga börn okkar og barnabörn. Aðila, sem ekki komu nálægt IceSave, græddu ekkert á svindli Bjögganna og bankastjóra Landsbankans. Þetta er svívirðilegur og ærulaus samningur, sem fjárkúgararnir vilja ekki, að birtur sé. Vonandi verður fjárkúgunin felld á Alþingi og vonandi verður hún aldrei greidd.

Gallinn við tillögu Jóns Kaldal ritstjóra um brottrekstur Evu Joly er, að hann er óframkvæmanlegur. Vantraust er svo mikið á íslenzku eftirliti og saksóknum, að Joly ein nýtur trausts. Hvort sem er innanlands eða erlendis. Verði hún rekin, hrynur allt, jafnvel lánshæfismat ríkisins og ríkið verður gjaldþrota. Rangt er hjá Jóni, að Joly hafi truflandi áhrif. Gagnrýnin á hana er bundin við lögmenn útrásarinnar, kerfiskarlana sem brugðust, svo og skúrka útrásarbanka og útrásarvíkinga. Fréttablaðið er í eigu útrásarvíkinga og hefur sem slíkt ekki traust til að láta taka mark á sér í þessu tilviki.

Fréttastofa Ríkisútvarpsins náði eintaki af IceSave samningnum við Holland. Þar kemur fram, að málið er ekki milliríkjamál, heldur innanríkismál í Bretlandi. Brezkir dómstólar munu fjalla um ágreining. Verði greiðslufall, má brezka stjórnin taka lögtak að vild í verðmætum eigum íslenzka ríkisins. Gera má ráð fyrir, að samningurinn við Bretland sé svipaður. Þá vitum við það. Ríkisstjórnin hefur afsalað fullveldinu. Þar á meðal stjórnarflokkur, sem lýsir yfir áhyggjum af afsali fullveldis vegna Evrópusambandsins. Þessir samningar um afsal fullveldis eru landráð og verða felldir á Alþingi.

Fasistadeild löggunnar ræður lögum og lofum undir stjórn Rögnu Árnadóttur eins og undir Birni Bjarnasyni. Tíu manns voru járnaðir og handteknir fyrir að setjast á götuna við alþingishúsið. Þeir voru sagðir trufla umferðina. Það á andóf einmitt að gera. Því miður heldur mannfjandsamleg stefna Björns áfram hjá Rögnu. Ég hef margspurt, hvers vegna fasisti sé notaður sem ráðherra í vinstri stjórn. Hef enga skýringu fengið á því rugli. Er orðinn sannfærður um, að óhæf stjórn elztu stríðshrossa í stétt pólitíkusa verði fyrir rest orðin einangraðri og hataðri en vanhæfa stjórnin var hjá Geir.

“Við erum ekki að sitja hérna í marga klukkutíma að ræða starfsmannalánin.” Þetta segir Hulds Dóra Styrmisdóttir, stjórnarformaður Kaupþings í viðtali við fjölmiðil. Hroki hennar er yfirgengilegur. “Við erum ekki einu sinni búin að ræða það.” Hún er samt að tala um afskrift kúlulána, mesta svindl sögunnar. Hún er að tala um mál sem rífur og tætir samfélagssáttmálann. Ekki er ónýtt fyrir nýtt Ísland að hafa svo firrtan fulltrúa græðgisvæðingar sem bankaráðsformann. Hvert sem við lítum í heimi fjármála og eftirlits og saksóknar á Íslandi er gamla siðleysið í fjármálum enn við óskert völd.

Seðlabankinn gat ekki samið marktæka skýrslu um greiðslubyrði heimilanna. Hann gleymdi að taka með frystingu íbúðalána. Röngu tölurnar voru sendar til Jóhönnu Sigurðardóttur forsætisráðherra. Hún notaði þær á Alþingi til að halda fram, að vandi heimilanna væri minni en talið hefði verið. Nú er hún orðin að athlægi. Seðlabankinn hefði getað hindrað það með því að vinna vinnuna sína af kostgæfni. Hver á að taka mark á seðlabanka, sem getur ekki komið frá sér réttum tölum? Þetta minnir á, að mikilvægt er, að næsti seðlabankastjóri hafi sem minnsta starfsreynslu úr bankanum. Helzt enga.

Álfheiður Ingadóttir hefur rétt fyrir sér. Alþingi getur ekki lagt á þjóðina ríkisábyrgð upp á hundruð milljarða án þess að sjá plaggið. Ríkisstjórnin verður að leggja fram IceSave-samninginn, ef hún vill fá hann samþykktan. Enginn viti borinn samþykkir samning, sem hann hefur ekki séð. Ríkisstjórnin verður einfaldlega að fá samþykki viðsemjanda sinna fyrir birtingu. Hún þykist vera að reyna það. Grunur leikur á, að í samningnum séu ákvæði, sem ekki standist birtu. Þess vegna séu þau leyndó. Af þeirri tæknilegu ástæðu einni er einföld ástæða til að fella samning pukurstjórnarinnar um IceSave.

Sjónvarpsstöð í Belgrað sýndi þátt með myndskeiðum af stríðsglæpamanninum Ratko Mladic. Þau sýna, að hann leikur lausum hala með fjölskyldu sinni í Belgrað og Sarajevo. Þótt ríkisstjórn Serbíu fullyrði, að hún finni hann ekki. Myndskeiðin koma illa við Evrópusambandið, sem reynir að koma Serbíu inn. Olli Rehn stækkunarstjóri segir myndskeiðin gömul, en á þeim sést þó barn, sem fæddist 2006. Spurningin er, hvort Evrópusambandið muni ekki líka fullyrða, að allt sé í lagi á Íslandi. Málið sé því að lofa stuðningi við útgerðarstefnu sambandsins, en taka í rauninni alls ekkert mark á henni.

Því meira sem ég hugsa um árás Páls Hreinssonar og Tryggva Gunnarssonar á Sigríði Benediktsdóttir, því reiðari verð ég. Hún er valinkunnur kennari við Yale, þeir eru ómerkir kerfiskarlar. Hún sagði í Yale almælt tíðindi héðan, sem allir geta skrifað undir nema kerfiskarlarnir. Einn forkólfa hrunsins, Jónas Fr. Jónsson, kvartaði undan texta, þar sem hvert orð var satt. Páll og Tryggvi hlupu samdægurs upp til halda og fóta að þjónusta skúrkinn. Sem sagði í ágúst í fyrra að íslenzku bankarnir væru mjög stöðugir. Getur ríkisstjórnin ekki losað okkur við Pál og Tryggva úr sannleiksnefndinni?

Fölsunarfræðingar Landsbankans smíðuðu hugtakið einkalífeyrissparnaður um sérstakan séreignarsjóð. Kringum hugtakið bjuggu þeir til ímyndaðar reglur, sem hvergi eru viðurkenndar. Samt gilda lög og reglur um séreignasjóði, sem Landsbankinn getur ekki túlkað út og suður. Svo virðist af frétt bankans, að hann muni senn bjóða þetta sparnaðarform fleirum en fyrrum stjórum bankans. Í fréttinni er sagt, að innri endurskoðun bankans hafi verið á vaktinni og fundið sérstæð kúlulán “einkalífeyrissjóðsins”. Fréttir af málinu höfðu þó verið á bloggi dögum saman. En hefðbundnir fjölmiðlar tyggja frétt bankans.

Gylfi Magnússon viðskiptaráðherra telur lögmenn Kaupþings dómbæra um gerðir Kaupþings. Gefur sér, að afskriftir kúlulána megi ekki gera afturvirkar. Af því að lögmenn Kaupþings segi það. Botnlaust bull Gylfa. Lögmenn Kaupþings eru vanhæfir og ekki dómbærir í málum Kaupþings. Gylfi segir “hugsanlega” mega draga gerendur til ábyrgðar. Þarf að segja okkur það enn einu sinni? Mörgum mánuðum eftir glæpinn hefur engin tilraun verið gerð hjá lögreglu og saksóknurum til að koma gerendum í gæzluvarðhald. Óhæfur Valtýr Sigurðsson týndi kærunni í pósti. Er það síðasta orð hins gerspillta ríkiskerfis?

Erfingjar Soffaníasar Cecilssonar hf. eru frægustu kvótakóngar landsins um þessar mundir. Sigurður Sigurbergsson og Rúnar Sigtryggur Magnússon hafa veðsett áður stöndugt fyrirtæki upp fyrir haus. Meðal annars veðsettu þeir kvótann eins og aðrir kvótakóngar. Tekjurnar notuðu þeir í loftbólur, sem eru glataðar. Fyrirtækið er gjaldþrota kruss og þvers, haldið á floti af bankanum. Sigurður og Rúnar hafa nú selt sjálfum sér fiskiskip, fiskiðnað og kvóta fyrirtækisins út úr fyrirtækinu. Þannig að engin veð standa þar eftir fyrir 7,5 milljarða skuld. Landsbankinn lét þetta viðgangast og er samsekur.

Pressan.is er frétta- og slúðurvefur, sem ævintýramaðurinn Björn Ingi Hrafnsson ritstýrir til stuðnings útrásarvíkingum, öðrum skuldakóngum og fylgiliði þeirra. Þar birtast árásir lögmanna og Jónasar Fr. Jónssonar á Evu Joly. Pressan.is reynir að breiða út róg um þá, sem moka skítinn eftir útrásarvíkinga, útrásarbanka, skuldakónga og sofandi embættismenn. Sjálfur var Björn Ingi gerandi í Orkuveitumálinu, þegar Reykjavíkurborg ætlaði að gefa Hannesi Smárasyni mannauð stofnunarinnar. Stundum getur verið gaman að lesa kaffislúður Pressunnar, en bezt er að fara varlega í að trúa.

Bloggheimar standa sig vel. Þar er komið í ljós, að Sigurjón P. Árnason á ekki sinn prívat séreignasjóð. Þótt Sigurður G. Guðjónsson, lögmaður hans og hatursmaður Evu Joly, haldi slíku fram. Sjötíu milljón króna lán með 3,5% vöxtum koma úr sjóði, þar sem 2524 manns eiga sparnað. Í stað þess að veita Sigurjóni lífeyri veitir sjóðurinn honum kúlulán. Af lífeyri þarf að borga tekjuskatt, en af lánum ekki. Þannig hefur Sigurjón náð sjötíu milljón króna lífeyri án þess að borga 26 milljónir í tekjuskatt. Ofursparnaður skatta hjá “jolly good fellows”. Enda er Sigurður G. stundum kallaður stjörnulögmaður.