Þótt fasismi sé almennt skilgreindur yzt á hægri jaðri stjórnmála, er líka til eins konar vinstri fasismi. Félagsfræðingurinn Jürgen Habermas hefur til dæmis notað þetta hugtak í mótsögn við vinstra frjálslyndi. Vinstri fasismi er hrein valdshyggja á vinstri jaðri, áhugi á að ná vinstri markmiðum með valdbeitingu. Gott dæmi um það er stefna meirihluta borgarstjórnar í skipulagi Reykjavíkur. Reynt er að þvinga fólk úr einkabílum upp í strætó eða helzt á reiðhjól með því að þrengja götur og fækka bílastæðum. Samkvæmt því er Hjálmar Sveinsson vinstri fasisti.

Sumir Íslendingar búa yfir kunnáttu, sem gerir þá gjaldgenga erlendis. Kerfið þarf að borga þeim nógu mikið til að halda þeim í vinnu. Það gildir um lækna og flugmenn, en líka um marga fleiri, svo sem hugbúnaðarfólk. Kerfið þarf líka að sjá um að endurnýja límið í samfélaginu. Það gengur alls ekki, að 6200 manns búi við sára fátækt, þar á meðal fólk í fullri vinnu. Því þarf að skilgreina lágmarksframfærslu og lögfesta lágmarkslaun, með tilsvarandi hækkun velferðar. Peningarnir munu finnast í auðlindarentu og auðlegðarskatti, svo og í hærra hlutfalli launa í rekstrarkostnaði. Burt með gráðugan trúflokk brauðmolanna.

Verkalýðsfélög bregðast starfsfólki illra fyrirtækja, sem svíkja kjarasamninga. Undanfarið hafa birzt fréttir af bófum, sem reka veitingakeðju Eldsmiðjunnar, Aktu-Taktu, American Style, Greifans á Akureyri, Pítunnar og Saffrans. Meðvitaðir neytendur forðast þessa staði, en ekkert kemur í stað alvöru verkfalls. Sama er að segja um Primera flugfélagið, sem rekur gistiheimili fyrir erlendar flugfreyjur á skítalaunum. Meðvitaðir flugfarþegar forðast fyrirtækið, en ekkert kemur í stað alvöru aðgerða alvöru stéttarfélags. En þau eru önnum kafin í rekstri sumarhúsa, meðan hlutverkið situr á hakanum.

Stríð Kiev og Moskvu í Austur-Úkraínu er valdabarátta fasista, dæmigert blóðbað á jaðarsvæði. Um Pútín vitum við, að hann er rússneskur mafíubófi. Um stjórnina í Kiev vitum við, að þar eru hreinir fasistar í bland. Stríðið snýst um grátt svæði, þar sem sumir eða margir íbúar tala ýmist rússnesku eða halla sér að rússnesku kirkjunni. Pútín hefur étið Krímskaga og vill meira. Ögrar nágrönnum til að auka stuðning hins breiða massa rússneskra þjóðrembinga. Vesturlönd eru réttilega hræddari við Pútín en Poroshenko og styðja stjórnina í Kiev. Þarna er teflt um gífurleg landsvæði og gífurlegan fólksfjölda. Að venju tapar fólkið.

Siðferði í nútímanum á eldri rætur en í kristni. Kom fyrst fram hjá forngrískum spekingum, svo sem Sókratesi, Plató og Epíkúrusi. Grískar rætur vesturlanda voru ítrekaðar á endurreisnartíma. Þroskuðust svo á veraldlegri upplýsingaöld. Við sögu komu trúleysingjar á borð við Voltaire, Spinoza, Jefferson og Paine. Síðar komu fleiri til skjalanna, svo sem Bertrand Russell. Öðrum þræði flutti frumkristni svipaðar kenningar um góða siði og enn frekar á endurreisnartíma. Ókristnar rætur góðra siða í nútímanum eru þó öflugri en hinar kristnu. Hér á landi vísa Hávamál til háþróaðs siðferðis, sem er miklu eldra en kristnitakan.

Hugsa þarf launaskala í samfélaginu upp á nýtt. Láglaunafólk þarf að geta lifað af daglaunum. Langskólagengið hálaunafólk þarf tvöföld laun láglaunafólksins. Síðan þarf að hnika upp stéttum, sem auðveldlega geta fengið vinnu erlendis, því að þetta litla samfélag hefur ekki efni á spekileka. Loks þarf samfélagið að endurheimta auðlindarentu og auðlegðarskatt greifanna til að hafa efni á nýrri skipan launa. Skalinn þarf að ná frá hálfri milljón brúttó á mánuði upp í eina milljón á mánuði. Þýðir jafnframt, að lækka þarf bankstera og aðra greifa. Standi atvinnurekstur ekki undir launaskalanum, ætti að skipta um forstjórann.

Orkustofnun, Landsvirkjun, Landsnet og Vegagerðin eru stjórnmálaflokkar. Hafa á stefnuskrá að virkja sem mest og glannalegast. Að flytja alla orku á þann hátt að sem mest beri á raflínum. Að leggja upphækkaða vegi sem víðast og þannig að sem mest beri á þeim. Ítrekað reyna þessar firrtu stofnanir að rjúfa fyrri sátt um meðalhóf í orkuverum, stauralínum og hálendisvegum. Ítrekað reyna þessar stofnanir að færa hugsjónir sínar úr bið í framkvæmdaáætlun. Ekki vegna þess, að þjóðin hafi eitthvað upp úr atinu, heldur til að auka umsvif sín og verktaka sinna. Þessir fjórir stjórnmálaflokkar eru helztu hryðjuverkasamtök landsins.

Frönsk og þýzk stjórnvöld hvöttu lengi grísk stjórnvöld til að kaupa sem mest af frönskum og þýzkum hergögnum. Grikkir samþykktu þetta eins og aðrar þriðja heims þjóðir til að fá sem mest lánsfé inn í landið. Þýzkir og einkum franskir bankar lánuðu Grikklandi yfirgengilegar summur í skjóli stjórnmálanna. Svo kom í ljós, að Grikkir geta ekki borgað. Og nú síðast, að þeir ætla bara alls ekki að borga. Skiljanlegt er, að grískur almenningur tregðist við að borga sukk og svínarí stjórnvalda, sem framið var að frönsku og þýzku undirlagi. Ráðamenn Frakklands og Þýzkalands neita að fatta samábyrgð sína á stöðunni í Grikklandi.

Undanfarið hafa margir orðið vitni að mestu niðurlægingu handboltans í sögunni. Alræmdasta þrælaríki heimsins byggir handboltahallir í eyðimörkinni, kaupir sér landslið og mútar alþjóðasambandinu til að koma. Og dómurunum til að tryggja landsliði þrælaríkisins sæti í úrslitum. Lengra komast mafíur ekki í spillingu og mannfyrirlitningu. Katar slær hér heimsmet. Í vændum er enn stærra heimsmet, því að enn spilltara fótboltasamband samþykkti að halda þar heimsmeistaramót. Það verður væntanlega sama niðurlæging fótboltans og þessa daga handboltans. Og þrælahaldarar Katar stefna loks á ólympíuleikana. Þá verður vininum ÓRG boðið.

Oftar en áður kemur í ljós, að fólk er andvaralaust um verndun einkamála sinna. Konur fækka fötum í hvelli, þegar þær sjá símamyndavél. Verða síðan hissa og jafnvel reiðar, þegar myndirnar birtast á samskiptamiðlum. Nú er fólk að lýsa undrun sinni yfir eignarhaldi Facebook á innihaldinu. Hélt fólk, að Zuckerberg gerði fésbókina frítt? Eða að Google sé mannvinur? Ég er því ekki hissa, þótt fólk geri tóma vitleysu í kjörklefanum. Fólk þarf að gá að sér á almannafæri, þar á meðal í sturtuklefum og samskiptamiðlum. Er eitthvað uppi á fésbókarvegg þínum, sem þú vilt ekki, að fari lengra? Hugsaðu: Hver er sinnar gæfu smiður.

Auðvitað leggur forsætisráðherra fram lagafrumvarp um afnám siðferðisnefndar og afnám siðareglna í kerfinu. Það gengur auðvitað ekki, að siðblint forsætisbarn þurfi að þola siðferðisnefnd og siðareglur. Mun eðlilegra er, að siðblindingi ákveði sjálfur, hvaða siðir séu í lagi og hvaða ekki. Þá verður enginn núningur í kerfinu og barnið getur vaðið fram að vild. Nýju lögin þurfa einnig að gefa siðblindum forsætis tilfinningalegt svigrúm til að hefta ósanngjarna gagnrýni hataðra rannsóknarblaðamanna. Þeir eiga auðvitað að vera í fangelsi, svo að friður bresti loksins á í kristilegu samfélagi heimskra og meðvirkra kjósenda.

Náttúrupassinn er versta aðferðin við fjármögnun ferðastaða. Allar aðrar tillögur hafa eitthvað sér til ágætis nema þessi ein. Hef ekki heyrt neinn mæla með ótal passalöggum hoppandi upp úr giljum og ofan úr klettum. Varla nokkurn þingmann heldur. Ragnheiður Elín Árnadóttir er sú eina, sem styður passann. Allir aðrir skilja, að hann felur í sér margfaldan innheimtukostnað í samanburði við aðrar aðferðir. En ráðherrann situr föst við sinn keip. Fólki hefur jafnvel dottið í hug annarleg ástæða fyrir því. Hún sé bara að framleiða kaos til að auðvelda einkavæðingu íslenzkrar náttúru. En svo er ekki, heimskan ein ræður ferð.

„Reglan er sú …“, segir Hjálmar Sveinsson. Já, the computer says no. Skipulag borgarinnar byggist á órum úr trúarritum nokkurra skipulagskennara. Ekki á neinum vísindum. Engin rök eru fyrir að verja 200 milljónum til að þrengja Grensásveg eins og Borgartún og Hofsvallagötu. Eru þó ekki innifalin fuglabúr fyrir næturgala, sem reynt var að setja upp í Hofsvallagötu. Slegið er fram bulli um aukið umferðaröryggi, sem styðst ekki við neinar tölur um skort á öryggi. Málið er einfaldlega, að valdshyggjumaður leikur lausum hala. Hyggst með illu þvinga kjósendur í borginni úr bílum í strætó eða helzt á reiðhjól.

Sexþúsundogtvöhundruð Íslendingar búa við sára fátækt, samkvæmt upplýsingum frá Velferðarvakt velferðarráðherra. 6200 manns. Ekki við fátækt, heldur við SÁRA fátækt. Þetta stríðir eindregið gegn réttlætisvitund mikils meirihluta fólks. Ég veit að vísu, að tugþúsundum siðblindra kjósenda Sjálfstæðisflokksins finnst þetta í lagi. Öðrum ber skylda til að lemja í borðið. Velferðarráðherra getur hætt að skipa nefndir út og suður, farið að gera eitthvað. Til dæmis getur hún sannfært ríkisstjórnina um að endurreisa auðlindarentu og auðlegðarskatt. Brot af þeim gróða getur hún notað til að hækka barnabætur um fjóra milljarða króna.

Smám saman molnar brauðmolahagspekin. Þekktir fræðingar ganga af trúnni, einnig fjölþjóðastofnanir á sviði hagstjórnar. Vara við misrétti og volæði. Fátækir við Miðjarðarhafið eru að bylta spilltum pólitíkusum stefnunnar úr sessi. Núna sést, að brauðmolahagspekin eflir stéttaskiptingu, eykur fátækt, sundrar heilum þjóðum. Græðgi hinna allra ríkustu er óseðjandi og felur í sér sjálfseyðingu. Meðan stefnan siglir þöndum seglum á heimsku Íslandi Framsóknar og Sjálfstæðis, er hún að fjara út um alla Evrópu. Evrópusambandið daðrar þó enn við auðhringa gegn almenningi, en var rasskellt í Grikklandi, vonandi senn á Spáni og víðar.