Brezkir fjölmiðlar fjalla um gagnrýni Greg Dyke, brezka útvarpsstjórans, á bandaríska fjölmiðlun, sérstaklega Fox sjónvarpskeðjuna. Hann telur brýnt, að hin hlutdræga, bandaríska stríðsfréttamennska verði ekki innleidd í Bretlandi. Hér á landi skiptast erlendar fréttir í tvö horn. Annars vegar eru DV, Fréttablaðið og Ríkisútvarpið með svipaðar fréttir og maður sér á vefnum hjá fjölþjóðlegum fréttastofnunum, sæmilega traustvekjandi, og hins vegar undarlegar fréttir í Morgunblaðinu og á fréttastofum sjónvarps. Innan síðari hópsins eru annars vegar fréttir í Morgunblaðinu og Ríkissjónvarpinu, sem virðast vera frá CIA og fengnar frá sendiráðinu, og hins vegar fréttir á Stöð 2, sem virðast koma beint frá Mossad.

Roy Denman segir í International Herald Tribune, að Frakkland og Þýzkaland muni áfram ráða ferðinni í Evrópusambandinu, þrátt fyrir stækkun þess, meðal annars vegna tregðu Bretlands við að taka upp evru. Hann segir, að dálæti ríkisstjórna í Austur-Evrópu á Bandaríkjunum muni víkja fyrir mikilvægi evrunnar og markaða í Evrópusambandinu. Hann segir, að japönsk fyrirtæki séu að skipta úr fjárfestingu í Bretlandi yfir í fjárfestingu á evru-svæðinu. Raunar er evran stöðugt að styrkjast gagnvart dollar og er nú komin tíu sentum framúr honum. Meðan svo fer fram, sjá fleiri sér hag í að skipta peningalegum eignum sínum úr dollurum yfir í evrur.

Eftir að hafa slegið eigið Íslandsmet í loforðum um lækkun skatta, sem ekki er ráðgert að efna, eru ráðherrar núna að slá eigið Íslandsmet í undirritunum og opnunum, sem síðan daga uppi, af því að þeir uppgötva eftir kosningar, að ekki er til fé á fjárlögum til að framkvæma hinn fjölþætta góðvilja þeirra. Kjósendur munu margir láta sér vel líka að vera hafðir að fífli rétt eina ferðina.

Amnesty hefur harðlega gagnrýnt, að Bandaríkin hafa lengið haldið 13-15 ára börnum frá Afganistan í fangabúðum í Guantanamo-flóa í trássi við alþjóðalög. Þau hafa ekki aðgang að lögmanni og hafa vita ekki, hvort þau verða einhvern tíma ákærð fyrir eitthvað eða endalaust lokuð inni. Fangabúðir þessar eru alræmdar, enda hafa 17 fangar gert samtals 25 tilraunir til að svipta sig lífi. Kunnugt er, að geðveikur forseti Bandaríkjanna hafnar því alfarið, að ærulaust ríki hans þurfi að fara eftir alþjóðlegum sáttmálum um meðferð stríðsfanga og meðferð borgara í hernumdum löndum. Kunnugt er, að fyrir utan Sómalíu eru Bandaríkin eina ríkið í heiminum, sem ekki hefur samþykkt sáttamála Sameinuðu þjóðanna um barnavernd. Amnesty segir alla framgöngu Bandaríkjanna í máli þessu vera “gersamlega viðurstyggilega”. Frá þessu segir Oliver Burkeman í Guardian.

Ef fjölmiðlar hefðu verið gefnir út í Undralandi, hefði Lísa á hverjum morgni fengið fréttir af því, að geðveika drottningin hafi orðið reið út af höfnun Kanada á aðild að stríði við Írak, ofsareið út af undankomu fjölskyldna írakskra ráðamanna til Sýrlands, og gengið af göflunum út af andstöðu Frakklands í öryggisráði Sameinuðu þjóðanna. Fjölmiðlar Undralands hefðu flutt fréttir af því, að geðveika drottningin ógnaði Kanada, hótaði Sýrlandi öllu illu og heimtaði sí og æ, að Frakklandi yrði refsað. Reiði og refsing voru alfa og ómega geðveiku drottningarinnar. Bandaríkin eru Undraland nútímans og George W. Bush er geðveika drottningin.

Paul Kennedy er einn helzti sagnfræðingur nútímans, höfundur undirstöðuritsins: “Ris og hnignun heimsvelda”, sem kom út árið 1987. Hann skrifar í Washington Post langa og lærða grein um “Hættur heimsveldis”, þar sem hann vekur athygli á, að stríð Bandaríkjanna við Írak og önnur afskipti þeirra af miðausturlöndum minni óþægilega mikið á sigursælan hernað Bretlands í Írak og afskipti af miðausturlöndum við lok fyrri heimsstyrjaldarinnar, sem allt rann út í sandinn. Kennedy telur, að ömurleg reynsla af íhlutunum Bandaríkjanna í málefni Rómönsku Ameríku gefi ekki tilefni til að ætla að þeim vegni betur í Miðausturlöndum. Þau muni ekki láta Bandaríkin breyta sér frekar en þau létu Bretland breyta sér fyrir 83 árum. Kennedy spyr líka, hvort það sé nothæf utanríkisstefna að gera jafnvel rólynda Hollendinga dauðhrædda við Bandaríkin.

Þegar haldinn verður tveggja daga toppfundur efnahagsvelda í Évian í Frakklandi í vor, mun George W. Bush Bandaríkjaforseti gista um nóttina handan landamæranna í Sviss. Það gerir hann til að refsa Frakklandi fyrir að vera andvígt stríði hans við Írak. Hinir refsiglöðu ráðamenn Bandaríkjanna áttuðu sig ekki á, að Sviss var enn andvígara stríðinu en Frakkland var og leyfði ekki einu sinni yfirflug bandarískra herflugvéla. Frá þessu segir Elisabeth Bumiller í New York Times. Hún hefur oft verið skrítin alþjóðapólitíkin, en nú er hún orðin barnaleg, enda ráða geðsjúklingar ferðinni.

Eðlilegt er að greiða ríkisstjórnarflokkunum atkvæði, ef menn eru 1) fylgjandi hraðvaxandi stéttaskiptingu í landinu, 2) fylgjandi forgangi útgerðaraðalsins að auðlindum hafsins, 3) fylgjandi fleiri orkuverum á ósnortnum víðernum landsins, 4) fylgjandi hrikalega hárri og áhættusamri ríkisábyrgð handa bandaríska fyrirtækinu deCode, sem verður afgreidd eftir kosningar, og 5) fylgjandi undirlægjuhætti stjórnvalda gagnvart nýrri heimsvaldastefnu Bandaríkjanna, sem einkum beinist gegn smáríkjum.

Talið er, að ruslpóstur hafi aukizt úr 16% af tölvupósti fólks í janúar í fyrra upp í 45% í byrjun þessa árs og jafnvel upp í 70% þessa dagana. Hugbúnaður til að sía ruslpóstinn sjálfvirkt og eyða honum verður sífellt fullkomnari, en tækni ruslpóstmanna batnar enn hraðar. Freistingin er mikil, því að ruslpóstur er svo ódýr, að einungis þarf að ná einni sölu á hver 100.000 tölvupóstbréf til að svara kostnaði. Búast má við, að víða á vesturlöndum verði fljótlega sett lög, sem skyldi ruslpóstmenn 1) til að tilgreina sendanda nákvæmlega, 2) til að setja fyrirsagnir á póstinn, sem séu í samræmi við innihaldið, og 3) til að veita viðtakendum auðvelda aðferð til að strika nafn sitt út af póstlistum. Brot á reglum valdi sektum. Frá þessu segir Saul Hansell í New York Times.

George Monbiot segir í Guardian, að Bandaríkin muni ráða, hvernig öll ríki heims sitji og standi, nema Evrópa spyrni við fótum. Bandaríkin stefni að því að rústa allar fjölþjóðastofnanir á þeirri forsendu, að þær standi í vegi fyrir óheftu valdi Bandaríkjanna. Evrópa geti unnið gegn einræðinu með því að afla evrunni stöðu og festu sem alþjóðlegs gjaldmiðils, er leysi dollarinn af hólmi á ýmsum sviðum, svo sem í olíuviðskiptum. Þetta sé hægt, af því að fjármál ríkjanna, sem standa að evrunni, séu ólíkt traustari en botnlaus taprekstur Bandaríkjanna. Meira vit sé í að fórna minna af fullveldinu með því að taka upp evru í stað eigin gjaldmiðils, heldur en að fórna meiru af því með því að sitja og standa eins og Bandaríkin vilja.

Sarah Boseley segir í Guardian, að bandaríski sykurvöruiðnaðurinn sé að reyna að koma Alþjóða heilbrigðisstofnuninni á hné með því að fá bandaríska þingið til að neita að borga til stofnunarinnar, ef hún fresti ekki birtingu ráðlegginga um mataræði. Í ráðleggingunum, sem birtar verða opinberlega á morgun, er sagt, að sykur og sykrur megi ekki vera yfir 10% fæðunnar, en sykurvöruiðnaðurinn vill, að miðað verði við 25%. Sykurvöruiðnaðurinn neitar að viðurkenna, að gosdrykkjaþamb leiði til offitu, og telur sig njóta skilnings hjá núverandi forseta Bandaríkjanna, sem hefur reynzt vera afar fjandsamlegur alþjóðlegum stofnunum.

Ian Traynor segir í Guardian, að Bandaríkin séu að ríða net herstöðva um allan heim, þar á meðal á svæðum, þar sem þau hafa ekki verið áður. Hann hefur eftir bandarískum embættismönnum, að þau hyggist hafa fjórar herstöðvar í Írak til frambúðar. Í tengslum við stríðið gegn Afganistan komu Bandaríkin sér upp herstöðvum níu löndum umhverfis landið. Viðræður standa yfir um bandarískar herstöðvar í Póllandi, Rúmeníu og Búlgaríu. Paul Wolfowitz, hugmyndafræðingur bandaríska stríðsráðuneytisins, sagði í viðtali við New York Times, að tilgangur bandarískra herstöðva væri meira pólitískur en hernaðarlegur. Þær sendi skilaboð til allra jarðarbúa um að halda sér á mottunni gagnvart Bandaríkjunum.

Gary Younge segir í Guardian, að George W. Bush Bandaríkjaforseti þurfi reglubundið pólitísk eiturlyf á borð við stríðið við Írak til að halda völdum. Tvær milljónir starfa hafa farið forgörðum í Bandaríkjunum síðan hann tók við völdum og nærri fjórðungur hefur hrunið af verðmæti bandarískra fyrirtækja samkvæmt kauphallarskráningu. Ríkissjóður stóð vel, þegar Bill Clinton fór frá, en hefur farið á hvolf eftir að Bush tók við. Kjósendur hafa illan bifur á áformum hans um skattalækkanir, sem fyrst og fremst koma hinum allra ríkustu til góða.

New York Times segir í leiðara, að innanlandsstefna George W. Bush sé stórslys, eitt allsherjar járnbrautarslys. Stórfelldur hallarekstur ríkissjóðs og fyrirhugaðar skattalækkanir hans í þágu hinna allra ríkustu geri honum kleift að halda fram, að ekki séu til peningar í ríkissjóði til umhverfisverndar, heilsuverndar, menntamála og húsnæðismála. Blaðið nefnir fjölmörg önnur dæmi um, að Bush sé óvenjulega skelfilegur forseti, sem muni verða þjóðinni dýrkeyptur.

New England Journal of Medicine segir rannsóknir hafa leitt í ljós, að fjórði hver sjúklingur þjáist af hliðarverkunum lyfja og að fæstir læknar geri sér grein fyrir þessu. Um þetta er fjallað í Boston Globe.