Báðir frambjóðendur til formennsku í Heimdalli neita að hafa boðið bjór og hamborgara. Skjáskot á fésbók og frásagnir kjósenda sýna hins vegar, að bjórinn hafi flotið í stríðum straumum. Þar eru líka sýnd boðsbréf, sem bjóða akstur, hamborgara og „yfirdrifið nóg af fríum bjór“ fyrir atkvæði. Frambjóðendur ljúga því báðir eins og þeir eru langir til, enda félagar í bófaflokki. Fróðlegt er, að silfurskeiðungum finnst í lagi að haga kosningum á þennan hátt. Þeir lifa og hrærast í græðgivæddu samfélagi. Þar eru orðin marklaust newspeak. Tilgangurinn helgar meðalið. Frír bjór er góður undirbúningur fyrir græðgivædda þingmennsku.

Vegna fyrirhugaðrar komu fjölmennra hópa flóttafólks af trú múslima þarf til öryggis að taka þetta skýrt fram:
Ísland þarf í sjálfu sér enga flóttamenn. Fólk mun því hafna ýmsum af kröfum múslima um aðlögun af hálfu landsmanna. Svo sem þetta:
1. Ekkert svigrúm verður fyrir halal eða kosher í opinberum mötuneytum.
2. Ekkert svigrúm verður fyrir bænir og föstur á skólatíma og vinnutíma.
3. Ekkert svigrúm verður fyrir trúarlög, sharia, gagnvart landslögum.
4. Ekkert svigrúm verður fyrir feðraveldi, karlrembu og heiðursglæpi.
5. Ekkert svigrúm verður fyrir frávik frá vestrænum mannréttindum.
Þetta verður útskýrt fyrir flóttafólki. Við munum hindra, að fólk, sem flýr miðaldir, reyni að koma hér upp þeim sömu miðöldum.

Síðbúin hefur Matvælastofnun játað, að eftirlit hennar hefur lengi leitt í ljós óforsvaranlegar aðstæður dýra á verksmiðjubúum. Svín hafa legusár, því að þau geta ekki staðið upp vegna þrengsla. Kjúklingar hafa vætubruna, því að þeir eru hafðir of þétt saman. Ekkert hefur verið gert enn við þessum óskunda. Því er borið við, að tími hafi verið of skammur. Haldi Matvælastofnun frambærilegt, að  halda slíkum upplýsingum leyndum mánuðum saman, er hún ekki að starfa fyrir fólkið í landinu. Lengi hefur verið grunað, að matvælaeftirlit hér er að mestu leyti fúsk, Og nú hefur það verið staðfest. Skiptum út yfirstétt eftirlitsins.

Bandaríkin eru komin í stríð við alla stríðsaðila í Sýrlandi. Hófu stríð við Assad. Ræktuðu til þess sveitir öfgamúslima, sem við þekkjum nú sem ISIS. Þau urðu öflugustu óvinir Assads. Saumuðu um leið að öðrum óvinum Assads, einkum Kúrdum. Bandaríkjunum var mikið í mun að etja Tyrkjum út í stríðið. Tyrkir urðu við því, en reyndust lélegir í að sprengja Assad. Lögðu þeim mun meiri áherzlu á að sprengja Kúrda. Hafa komist upp með það um langa hríð. Því eru Bandaríkin í senn í stríði við Assad, við ISIS og við Kúrda. Eru þannig komnir í stríð við helztu stríðsaðila í Sýrlandi. Geri aðrir fávitar betur. Bandaríkin eiga bágt.

„Hét Ísland því nýlega að draga úr losun gróðurhúsalofttegunda um 40% fyrir árið 2030.“ Athygli vöktu þessi orð forsætisráðherra á leiðtogafundi Sameinuðu þjóðanna. Þeir, sem ekki þekkja til, halda, að þetta alvara, hinir vita betur. Til dæmis umhverfisráðherra sömu ríkisstjórnar: „Engin ákvörðun hefur verið tekin um það, hversu mikið Ísland dregur úr losun gróðurhúsalofttegunda, þótt stjórnvöld stefni að samstarfi við Norðmenn og Evrópusambandið um að draga samanlagt úr henni um 40%.“ Ísland ætlar þannig að beita sér fyrir, að aðrir dragi úr losun. Sigrún Magnúsdóttir upplýsti líka, að stóriðja væri fyrir utan loforðið. Hún lýsir þannig Sigmundi Davíð sem fársjúkum og stjórnlausum lygara.

Mesta framsal fullveldis Ísland er í gangi þessa dagana á vegum Gunnars Braga Sveinssonar. Það er TISA-samningurinn, sem gerir ráð fyrir, að stórfyrirtæki verði fullvalda ríki með sérstaka dómstóla, sem rassskelli ríki, er ekki makka rétt. Ísland er sjálfstæður aðili að furðulegum viðræðum, óháð Evrópusambandinu og Fríverzlunarsamtökunum. Milljónir manna víðs vegar um Evrópu hafa skrifað undir kröfu um að vera fríaðir af þessum ósköpum. Samt heldur Martin Eyjólfsson sendiherra áfram á fullu að vinna í málinu í umboði ráðherra, sem þykist samt vera einstaklega þjóðrembdur. Sumir bófar eru hreinlega náttúraðir fyrir illvirki.

Hagklerkar græðgiskirkjunnar messa trúarjátninguna hver um annan þveran. Þótt efnilega fólkið flýi land og segi allt gott af sínum högum í Noregi. Klerkarnir vísa í línurit, sem segja, að framleiðni sé lítil og kaup þurfi að vera lágt. Meðal hagklerka síðustu daga eru Katrín Ólafsdóttir og Þórarinn G. Pétursson, sem er vígslubiskup kirkjunnar í Seðlabankanum. Hjörðin sú þylur trúarjátningar græðgiskirkjunnar, er hefur stolið þjóðarauðnum undan skiptum. Kvartar svo yfir kaupi láglaunafólks og segir upp skúringakerlingum. Hagklerkarnir flytja okkur rugl og kalla það hagvöxt og framleiðni, eins og röng hugtök séu veruleikinn.

Sigmundur Davíð og ríkisstjórn hans stefna að smíði tveggja stærstu kísilvera í heimi. Alls munu þau losa nærri milljón tonn af kolefni út í andrúmsloftið. Það er fimmtungs viðbót við núverandi 4,5 milljón tonn. Samt taldi forsætis sér kleift að stíga í gær á stokk á vettvangi Sameinuðu þjóðanna. Lofaði 40% minni losun kolefnis. Sigmundur Davíð er ekki feimnari við að ljúga að umheiminum en að Íslendingum. Ekkert, sem hann segir, er í sambandi við veruleikann. Málar bara upp þann sýndarveruleika, sem hann telur henta aðstæðum hverju sinni. Þannig komst hann til valda og þannig hyggst hann halda völdum. Með nýrri lygi.

Ísrael er ríki brjálæðinga. Hálf þjóðin hefur tryllst. Ekki bara hæstiréttur, ríkisstjórn og þingmenn. Ekki bara hálfur herinn. Sem heild er herinn orðinn verri en SS-sveitir nazista. Án tilefnis skjóta vitfirrtir hermenn ungabörn til bana, ráðast án tilefni á erlenda blaðamenn, berja þá og brjóta tæki. Ísrael hefur losað sig frá öllu, sem heitir mennska. Ríki og þjóð eru orðin að grimmu villidýri. Þetta er staðfest í erlendum fréttum dag eftir dag, viku eftir viku, mánuð eftir mánuð og ár eftir ár. Allt þetta er aðgengilegt á vefnum. Sumt fólk á Íslandi ber samt áfram blak af brjálæðinu og gerir sig þannig meðsekt.

Hæstiréttur telur ekki í sínum verkahring að vernda lýðræði. Hlutverk hans sé fremur að vernda líndælsku, sérstæða túlkun stakra orða. Verndar ekki rétt fólks til að fá að greiða atkvæði. Hindrar fremur fólk í að gera rétt bakvið pappaskilrúm, þegar Hæstiréttur vill timbur. Enginn grunur lá samt á fölsunum af neinu tagi. Hæstiréttur taldi sér kleift að bregða fæti fyrir lýðræðið. Æ síðan hef ég fyrirlitið þessa karllægu bófa. Mér kemur ekki á óvart, að þeir brjóti jafnréttislög. Þeir ákveða hverju sinni að geðþótta, hvaða lög gildi og hvaða lög séu ógild. Við eigum að skipa bara heiðarlega útlendinga í Hæstarétt.

Vondafólkið hnussar út af góðafólkinu. Spyr, hvers vegna það vilji ekki hjálpa hinum og þessum, úr því að það vilji hjálpa öðrum. Til dæmis vilji það lána fasteignir til flóttamanna, en hafi ekki boðið innlendum fátæklingum hið sama. Vondafólkinu hefur samt aldrei dottið í hug að hjálpa neinum. Það er upptekið af að grilla og græða fyrir sig, stofna einokun í skjóli ríkisins. Góðmennska er bara fyrir hina. Vondafólkið telur sig mega skipuleggja, hverjum góðafólkið skuli hjálpa. Til að geta vera í hópi vondafólksins þarf nefnilega magnaða siðblindu. Sem mér sýnist eiga sér kjörlendi í Sjálfstæðisflokknum og Framsókn.

Páfadómur hefur löngum verið eitt versta íhaldsafl vesturlanda. Að undirlagi Frans páfa hefur þetta stóra trúarkerfi snúið við blaðinu á brýnum sviðum. Nema um samkynhneigð og fóstureyðingar. Styður fátæka gegn græðgi auðgreifa, varar við bókstafstrú, hafnar valdafíkn, styður umhverfisvernd og ýmislegt annað, sem bandarískir íhaldsgaurar kalla kommúnisma. Þeir urðu raunar klumsa undir ræðu páfa í þinginu. Frans páfi er í sömu sveit og Bernie Sanders og Jeremy Corbyn. Þeir eru tákn um, að græðgivæðing er að verða benzínlaus, nema bara á Íslandi. Hafin er vestræn endurfæðing félagslegs markaðsbúskapar að hætti Þýzkalands.

Á miðjum rústum einkavinavæðingar trónir Áslaug Friðriksdóttir og hrópar. Hún færir hægri fótinn af biðröðum Isavia yfir á sjúkraþjónustu Strætó og vinstri fótinn af heilsuhótelum Sinnum yfir á menntaskólann Hraðbraut, svo við heyrum betur. Við, sem daglega sjáum, að heilbrigðisþjónusta versnar með hverju ári ríkisstjórnar einkavina. Sjáum Kristján Þór neita að borga lyf handa Fanneyju Björk Ásmundsdóttir. Heyrum Áslaugu æpa: Lausnin er meiri einkavinavæðing. Við eigum að trúa, að fátækt hins opinbera verði leyst með því að fela einkavinum Flokksins fleiri verkefni! Þú getur keypt bronz, silfur, gull þjónustu eða étið blankur það, sem úti frýs. Hamslausa hægrið sækir fram.

Ósvarað er spurningunni um, hvað var gallað við sniðgöngu borgarinnar á vörum Ísraels og hvers vegna. Hvorki Dagur B. Eggertsson né Halldór Auðar Svansson hafa gefið sannfærandi skýringar. Varla hefur það verið munurinn á Ísrael og hernumdu svæðunum. Enn síður lygasögur um tjón í vatnssölu, flugfarseðlum og holunni við Hörpu. Í miðju kafi urðu Dagur og Halldór skelfingu lostnir og hlupust frá öllu saman. Án þess að skýra frá á sannfærandi hátt, hvers vegna ekki mátti laga tillöguna í snarheitum. Hvaða lagatæknir ruglaði þá ríminu. Ekki mundi ég vilja setja traust mitt á slíka ringulreiðmenn. Eitthvað leyndó gerðist, sem enn hefur ekki komið fram.

Trú er í eðli sínu hættuleg. Leiðir oft til ofstækis, sem stundum fær útrás í ofbeldi. Öfgatrú hamlar gegn efahyggju, undirstöðu upplýsingaaldar og lýðræðis. Öfgar eru í öllum trúarbrögðum. Íslam hefur meira af þeim en kristni, sem hefur að mestu sætt sig við veraldlegt samfélag. Þótt múslimar séu flestir gott fólk, eiga sumir erfitt með að laga sig að efa og trúleysi vesturlanda. Skilja illa vestræn mannréttindi. Háðir fáfróðum klerkum, ofsa og yfirgengilegri karlrembu þeirra. Telja margir trúarlög, sharia, æðri landslögum. Sumir karlar eiga bágt með að fá vinnu og halda henni. Vestrið þarf að andæfa ofsatrú sumra múslima.