Stöð 2 er að missa Óskar Þorvaldsson, síðasta ágenga fréttastjóra landsins. Til viðbótar öðrum atgervisflótta. Áður var rekið Kompásliðið, sem einnig bauð upp á fyrsta flokks fréttamennsku. Hjá helztu rannsóknablaðamönnum landsins, Jóhannesi Kr. Kristjánssyni, Kristni Hrafnssyni og fleirum. Áður voru rekin hjónin Sigmundur Ernir Rúnarsson og Elín Sveinsdóttir, er áttu 50 ára starfsreynslu með sóma. Í staðinn hefur Stöð 2 fengið himpigimpi á borð við blaðurfulltrúa, ímyndunarfræðinga og sendiherra. Ari Edwald útgáfustjóri er í tómu tjóni, skilur ekki blaðamennsku. Siglir Stöð 2 beint í strand.

Fátækleg voru svör Geirs Haarde við spurningum BBC. Sagðist ekki hafa gert nein mistök, en mundi biðjast afsökunar, ef rannsókn leiddi slíkt í ljós. Vildi ekki ræða einkasamtöl við Davíð Oddsson fyrir hrunið, en mundi gera það við rannsóknina. Játaði, að kannski hefði hann átt að kvarta við Gordon Brown yfir hryðjuverkalögunum. Viðtalið sýndi ákvarðanafælinn og verkkvíðinn mann, sem gat ekki veitt þjóðinni forustu. Enda spurður: “Fólk vildi sjá þig sýna raunverulega forystu, en það sá það ekki, er það nokkuð?” Fátt var um svör við því. “Það er ekki mitt að meta það”, sagði hnípinn Geir.

Alltaf bætist við syndaregistur bankastjóranna og eigenda bankanna. Nú segir Boris Berskovskí fjárglæframaður, að Vladimír Pútín og menn hans hafi keypt Ísland til peningaþvottar. Hann á þá væntanlega við, að þeir hafi keypt einhverja bankana og Björgólfana að minnsta kosti. Hann sagði, að reglur um bankarekstur hefðu verið frjálsari á Íslandi en í Evrópusambandinu. Því neitar utanríkisráðuneyti okkar. Kannski voru reglur til, en Seðlabankinn og Fjármálaeftirlitið beittu þeim ekki. Bereskovskí minntist líka á risalánið, sem Davíð Oddsson þóttist hafa fengið hjá Rússum, sem stóðst svo alls ekki.

Alþingismenn Sjálfstæðisflokksins saka ríkisstjórnina um að leggja fram frumvörp, sem gamla ríkisstjórnin hafi undirbúið. Þeir svara hins vegar ekki, hvers vegna gamla stjórnin gat ekki ungað þeim út. Það stafar auðvitað af ákvarðanafælni, verkkvíða og ráðleysi ríkisstjórnar Geirs Haarde. Nýjan forsætisráðherra, Jóhönnu Sigurðardóttur, þurfti til að grípa til raunhæfra aðgerða. Ríkisstjórn hennar hefur gert meira á tveimur vikum en stjórn Geirs og Ingibjargar Sólrúnar gerði á 3-4 mánuðum. Þar skilur milli feigs og ófeigs á örlagatímum.

Landstjóri Alþjóða gjaldeyrissjóðsins yfir Íslandi er Franek Rozwadowski. Hann er sagður vera kunnugur Geir Haarde, hafa verið með honum í háskóla. Þetta þarf að staðfesta. Ef Franek er kunningi Geirs, getur hann ekki verið landstjóri yfir Íslandi. Hann getur ekki verið vinur stjórnarandstöðunnar. Hér hafa þá orðið herfileg mistök af hálfu sjóðsins, svipuð mistök og íslenzkir pólitíkusar mundu fremja. Tilgangurinn með erlendum landstjóra er að fara framhjá íslenzkum gaurum. Það gengur ekki að fá útlending til að stjórna landinu, ef hann lendir í sama flórnum og innlendir valdamenn.

Merkilegt er viðtal DV við Bjarna Benediktsson, verðandi flokksformann. Hann gefur kost á þeim möguleika, að Sjálfstæðið beri einhverja ábyrgð á hruninu. Hann efast um, að rétt hafi verið staðið að einkavæðingu bankanna. Hér talar ekki frjálshyggjumaður, heldur gamaldags íhald. Ég hef ekki orðið var við, að talsmenn flokksins hafi áður leyft sér að efast um milligramm af gerðum flokksins. Yfirleitt ræður þar alger afneitun. Geir Haarde er gott dæmi um það, samanber viðtalið við BBC. Ef hinni óvæntu línu Bjarna fylgja gerðir af hálfu flokksins, er hugsanlegt, að flokkurinn nái fyrri yfirburðum í fylgi.

Alþingi hyggst setja lög um að veita þingmönnum undanþágu frá að gefa upplýsingar um fjármál sín. Slík lög eru einskis virði, nema þau skyldi þingmenn til að gefa upplýsingarnar. En þingmenn eru samir við sig. Þeir halda áfram að skara eld að eigin köku. Það eina, sem þeir kunna. Þeir vilja auðvitað ekki upplýsa, hver á þá.

Ferðast í hægindastólNútíma leiðsögubækur koma í stað ferðalaga. Eywitness Guides segja okkur frá öllu skoðunarverðu og birta myndir af því. Truflandi smáatriði eru klippt úr myndfletinum. Bókin verður tærari fyrir vikið. Engar biðraðir á flugvelli, andþrengsli í flugvélum, niðurnídd verksmiðja í úthverfi, bilaður krani í hótelvaski. Í bókinni sjáum við bara hvítan sand, hallandi pálma og tvo elskendur á teppi. Er þá ástæða til að ferðast? Ég er með Feneyjabók, sem sýnir teikningar af öllum höllum við Stóraskurð, alveg án lyktar. Er ekki bara bezt að ferðast um í eigin hægindastól, laus við óþægindi veruleikans.

Flestir vita, hver er Daniel Barenboim, píanisti og hljómsveitarstjóri frá Ísrael. Hann hefur aðrar skoðanir á pólitík en kjósendur í Ísrael, skrifar um þær blaðagreinar. Hann telur loftárásir Ísraelshers styrkja Hamas, hin róttæku samtök Palestínumanna. Hann telur þær líka ómennskar, ósiðlegar og ekki bæta öryggi Ísraels. Hann bendir á, að Hamas sé meirihlutaflokkur á Gaza. Hann vekur sérstaka athygli á siðleysi þess að gera baklandið réttdræpt fyrir verk skæruliða. Collective Punishment er siðlaus stefna Ísraelsríkis. Hún er til þess eins fallin að efla andstöðuna við Ísrael.

Vaclav Klaus Tékklandsforseti er orðinn forseti Evrópusambandsins. Sérstæður pólitíkus á hægri jaðri tékkneskra stjórnmála. Hreytir ókvæðisorðum í þingmenn sambandsins, sem koma í heimsókn. Telur breytingar á andrúmsloftinu vera ímyndanir. Segir Evrópusambandið vera kommúnistaríki. Forsetastarfið í sambandinu fer í hring á hálfs árs fresti. Klaus varð forseti um áramótin, í kjölfar Nicolas Sarkozy Frakklandsforseta. Reiknað er með, að sambandið reki meira eða minna á reiðanum fram að næsta forseta, sem tekur við 1. júlí. Þetta er í fyrsta sinn, að harður andstæðingur Evrópu er forseti álfunnar.

Framan af mótmælum hélt lögreglustjórinn því fram, að eitri væri ekki úðað framan í fólk. Tekin voru ótal myndskeið, sem sýndu, að þetta passaði ekki. Nú segir hann, að það sé einmitt reglan, að eitri skuli úða framan í fólk. Grunsamleg U-beygja. Sú séríslenzka regla er ekki notuð í nágrannalöndunum. Að ýmsu öðru leyti gengur löggan hér lengra en í öðrum löndum. Nú er hún farin að amast við hávaðanum, sem andófsfólk fremur. Ég ítreka þá skoðun, að fasismi stjórni ríkislögreglustjóra og lögreglustjóranum í Reykjavík. Þetta eru flokkstengdir embættismenn vanhæfir, sem hreinsa þarf úr starfi.

Framsóknarflokkurinn er alltaf til skaða. Nú þvælist hann fyrir frumvarpinu um breytingu á Seðlabankanum. Segist vilja víkka kröfur til bankastjórans. Frumvarpið gerir ráð fyrir, að bankastjórinn sé vel menntaður hagfræðingur. Framsókn vill rýmka til fyrir búfræðingum, svo að framsóknarmenn komi til greina. Framsókn vildi líka láta málið fara í viðskiptanefnd, þar sem stjórnin hefur ekki meirihluta. Stjórnarflokkarnir urðu að sætta sig við það, því að Framsókn ræður öllu. Flest bendir til, að Davíð verði áfram bankastjóri. Í boði Framsóknar. Framsóknarflokkurinn er alltaf til skaða.