Héðan frá Lissabon sýnist mér tvístirni borgarinnar hafa farið mikinn. Gamli, góði Villi og Bingi á Hummernum hafa framið athafnastjórnmál. Þeir eru að reyna að draga Orkuveituna undan útsvarsgreiðendum og afhenda hana ólígörkum í útrásinni. Jafnvel Hannesi Smárasyni, sem á það sameiginlegt með Binga á Hummernum að leggja í stæði fatlaðra. Fæstir mæla bót þessum athafnastjórnmálum. Guðni Ágústsson reynir að fría Framsókn frá aðild að málinu. Hann sér líka höggstað á hinum sérkennilega arfaprinsi flokksins. Og Sjálfstæðisflokkurinn er ósáttur, þótt menn fari varlegar í orðbragðið.

Mikil fátækt er hér í Lissabon, betlarar og farandsölumenn. Portúgal er með fátækustu löndum Evrópu. Það hefur ekki grætt eins mikið á Evrópusambandinu og Spánn og Írland, sem eru á flugi. Einu sinni var Portúgal eitt ríkasta land heims, á tímum landafunda. Þá komu drekkhlaðin silfurskip frá Brazilíu til Lissabon. Auðæfin streymdu um landið og settu hefðbundna atvinnuvegi á hliðina. Þetta var eins og olían í sumum löndum nú til dags. Eða eins og stórvirkjanir og stóriðja Íslands. Eftir örfáa áratugi var búið að eyða silfrinu frá Ameríku í vitleysu. Og sviðin jörð var eftir um allt Portúgal.

Meðan heilsukerfið er í skralli er rangt að lækka skatta. Við eigum að hafa ráð á svipaðri heilsuþjónustu og Svíar og Frakkar. Við þurfum að geta hætt að vista sjúklinga á göngum. Við þurfum að geta lagt niður biðlista. Við þurfum að jafna kostnað sjúklinga. Við þurfum að fá hjúkkur til starfa að nýju. Þorri kjósenda er þessa sinnis. Þeir vilja hækka skatta, ef það bætir heilsu fólks. En þetta þarf að gera með aðhaldi, svo að heilsukostnaður ríkisins rjúki ekki upp. Forðast ber einkarekstur á ríkisþjónustu, því að erlendis hefur hún reynst hleypa upp kostnaði. Samanber einkum Bandaríkin.

Ríkisstjórnin er á villigötum í heilbrigðismálum. Hún gamnar sér við að ræða aukinn einkarekstur í kerfinu. Þótt reynslan frá Bandaríkjunum sýni, að slíkt hækkar heilsukostnað. Hún gamnar sér við að ræða um að lækka skatta. Þótt umtalsverð vandræði séu í heilsukerfinu af fjárhagsástæðum. Betra væri að gamna sér við ráðagerðir um að skilgreina, hvað skuli greiða og að hvaða hluta. Hver eru mörk heilsu og fegrunaraðgerða? Eru lyf svo dýr, að þau eigi ekki að kaupa? Eða þá aðgerðir, meðferðir? Á að halda lífi í öldruðum, sem þjást. Réttar spurningar eru erfiðar, þess vegna réttar.

Heilsuvandinn stafar mest af tregðu pólitískra yfirvalda við að taka á siðferðilegum spurningum. Á að halda gömlu fólki á lífi með dýrum aðferðum? Hversu langt á að ganga á því sviði? Á að veita innfluttu fólki dýrari þjónustu en öðrum? Hafa sjúklingar rétt á mannsæmandi umhverfi, til að dæmis að liggja ekki á göngum. Eiga sjúkdómar að hafa misjafna réttarstöðu, eiga fíknir til dæmis að vera lægra skrifaðar? Eiga fegrunaraðgerðir rétt á sér, tannréttingar til dæmis? Þar sem pólitíkusar skjóta sér undan svörum við þessu, taka þeir ábyrgð á fullri þjónustu. Og standa ekki við hana.

Fyndið er, að vinstri flokkarnir í Reykjavík skuli hafa staðið að mismunun barna eftir fjárhag þeirra. Það þurfti hægri flokk til að ákveða að greiða skólaferðalög úr borgarsjóði. Vinstri flokkarnir létu viðgangast, að sum börn færu ekki í skólaferðir. Af því að þau höfðu ekki ráð á þeim. Einnig, að sum börn notuðu ekki fínar dagbækur eins og hin. Þannig vildu skólamenn stéttskipta börnum í 90% normalbörn og 10% riff-raff. Í Fréttablaðinu er bráðfyndið viðtal við formann Skólastjórafélagsins, Hönnu Hjartardóttur. Hún skilur greinilega ekki bofs í málinu. Henni dugar 90% aðild að normi.

Pétur Gunnarsson á Eyjunni bendir á einkennilega afsökunarbeiðni Íslands. Utanríkisráðuneytið biður Sri Lanka afsökunar á ferð Bjarna Vestmann til uppreisnarmanna Tamíla. Bjarni var að vinna vinnuna sína. Málið er hluti af vandræðum, sem hljótast af framboði Íslands til sætis í Öryggisráðinu. Til að kaupa atkvæði verður Ingibjörg Sólrún að skríða fyrir harðstjórum. Nú þegar er Kína sagt styðja framboð Íslands. Þaðan er von á illu einu. Þetta endar með, að Ísland verður allra gagn. Sendiherrar drekka hlandið úr sér, ef erlendir dólgar með atkvæðisrétt heimta það. Framboðið er niðurlæging.