Búið er að ná pólitískri sátt um meðferð snjóhengjunnar. Peningana á að nota til að greiða niður hinar tröllslegu ríkisskuldir. Framsókn tapaði og aðrir flokkar sigruðu. Framsókn hefur í seinni tíð eingöngu lifað á skrumi. Hún mun í næstu kosningum setja fram stjarnfræðileg kosningaloforð um aðra notkun á fénu. Ég þori að veðja, að stórkarlalegasti lýðskrumari Íslandssögunnar er nú þegar að undirbúa nýjar sjónhverfingar og ný Undralönd. Lýðskrum hefur hingað til runnið ljúflega niður í 20% Íslendinga. Vonandi er þjóðin betur undir það búin að meðhöndla lýðskrumið af meiri varúð en hún var í síðustu alþingiskosningum.

Bjarni Benediktsson hafði betur í stjórninni. Gjaldþrotaleið Sigmundar Davíðs var hafnað. Hvorki voru dregnar fram kylfur né haglarinn hlaðinn. Farin leiðin, sem Alþjóða gjaldeyrissjóðurinn vildi, svo og allir flokkarnir, nema Framsókn. Ríkisstjórnin féllst á tillögur slitastjórna bankanna um, að þeir skildu eftir krónueignir, en færu út með gjaldeyrinn. Stöðugleikaskatturinn kemur ekki til framkvæmda, það er fyrirfram ákveðið. Að minnast á hann núna gegnir bara því hlutverki að friða skrumarann SDG. Taka mun sex ár að afnema höftin. Krónan er svo áfram ónýt og til vandræða. Það er dýrt að hafa heimtatilbúin trúarbrögð.

Auknar ýfingar eru kringum suma hópa múslima, er laga sig ekki að vesturlöndum. Sértrúarmenn WAHABÍTA í Danmörku HAFNA lýðræði og stjórnarskránni. Vilja ekki svara spurningum um, hvers vegna þeir séu þá þar í landi. Þetta gengur svo langt, að sumir múslimar undirbúa byltingu. Sumir wahabítar reyna að YFIRTAKA lögregluvald í hverfum, þar sem múslimar eru fjölmennir, til dæmis í Bretlandi og Þýzkalandi. Augljóst er, að óbeit á múslimum mun vaxa hratt í Evrópu, nema stjórnvöld láti af andvaraleysi sínu. Setja verður múslimum þá kosti, að þeir samþykki vestrænt þjóðskipulag eða hverfi ella af vettvangi vesturlanda.

Þá er það upplýst. Mr. Hyde lak í Dr. Jekyll, sem birti lekann í DV. Herramenn þessir eru samlokur, sem halda ekki neinu leyndu hvor fyrir öðrum. Um helgina voru svo allir, ekki bara innvígðir,  á fullu við að finna nýjustu sniðgöngur í dansi um hina verðlausu krónu. Sjálfstæðisflokknum var að vísu miður skemmt, enda kostaði málið fyrsta sunnudagsfund alþingis í sögu lýðveldisins. Raunar er því haldið fram, að Mr. Hyde og Dr. Jekyll séu einn og sami maður. Fól og hvers manns hugljúfi í einum manni. Sú sé skýringin á, hversu sjaldan Mr. Hyde sést á fótum. Farsælla sé að hafa Dr. Jekyll sem oftast sýnilegan, það ljúfa gæðablóð.

Fyrsta skrefið í afnámi gjaldeyrishafta reyndist felast í aukningu. Reyndist semsagt vera afturfótafæðing. Stjórnvöld eru dauðhrædd um, að breytingarnar í heild verði slitastjórnum gömlu bankanna tilefni til að svindla sem ákafast. Það getur verið nauðsynlegt, en um leið dálítið fyndið, að afnámið byrji með aukningu. Þar sem ríkisstjórnin nýtur einskis trausts, er rétt að taka öllu svona regluverki með mikilli varúð. Efast um, að hún hafi vit á að gera rétt og siðsemi til að vilja gera rétt. Stjórnarandstaðan þorði að vísu ekki að segja múkk. Hún samþykkti aukninguna orðalaust í gærkveldi og er því orðin samábyrg.

Hugsanlegt er, að lyfjameðferðir verði svo dýrar, að ríkið verði að setja mörk við kostnað sinn. Raunar er það gert með þátttöku sjúklinga í lyfjakostnaði og öðrum heilsukostnaði. Við sígum niður úr evrópskri hefð ókeypis heilsuþjónustu. Gert til að létta byrðum af þeim, sem breiðust hafa bökin, eigendum pólitískra bófaflokka. Breytingin er hægfara án þess að þjóðin sé spurð. Við þurfum samt að setja upp viðmið og reglur. Má heilsuþjónusta nema 11% landsframleiðslu eins og í Evrópu? Hér er hún 9%. Eigum líka að forðast bandaríska einkavæðingu, sem kostar 17% og nær samt bara til vel stæðra. Eigum að forðast bandarískt volæði.

Háskóla Íslands gengur vel að komast í röð 100 verstu háskóla heims. Frægast var, þegar prófessor var dæmdur fyrir víðtækan ritstuld. Hann heldur starfinu, þótt fáir taki lengur mark á honum. Svo fékk laganemi lokapróf út á ritgerð, sem var meira eða minna stolin orðrétt. Mannréttindadómstóllinn í Strasbourg þrengdi svigrúm hans til málaferla út af meintum meiðyrðum, réttlætið kemur að utan. Og nú síðast birtust skálduð viðtöl í málhaltri prófritgerð upp á 8,0 úr viðskiptadeild. Ekki hefur verið brugðizt við af hálfu háskólans. Enda léttir súpergaggó raunar mjög á byrði velferðarstofnana, sem hafa verið í fjársvelti.

Hrun síðkapítalismans byrjaði, þegar hann hafnaði opinberu eftirliti, uppnefndi það sem „eftirlitsiðnað“. Er leikreglur samfélagsins koðnuðu niður, magnaðist græðgi ofurbófana. Hér á landi er þetta óvenjulega grimmt. Hrunið byrjaði með hruni fjármálaeftirlits. Bankarnir spiluðu frítt með aðstoð ríkisstjórnar og Seðlabanka Davíðs. Þeir hrundu og almenningur var látinn borga brúsann. Það var hægt hér á landi vegna krónunnar. Í evrulöndum var ekki hægt að skella tjóninu á almenning. Þannig varð íslenzka krónan að „frábærri lausn“. Kjósendur föttuðu ekkert, kusu bófana aftur yfir sig. Gróðafíknin fær því enn þindarlausa útrás.

Loftslagsráð Sameinuðu þjóðanna IPCC, og bandaríska loftslagsstofnunin NOAA eru sammála. Nýjar og auknar mælingar sýna vaxandi hlýnun af mannavöldum. Komið er til sögunnar stóraukið gagnamagn frá sjálfvirkum veðurstöðvum víðs vegar um úthöfin. Gögnin ná einnig til ársins 2014. Þau sýna, að ekkert lát er á hlýnun jarðar og að hraði þessarar hlýnunar fer vaxandi. Þeim fækkar ört, sem efast, enda eru það einkum stofnanir, sem vinna fyrir olíuiðnaðinn og aðra mengandi hagsmunaaðila. Hér er sama sagan og um tóbakið á sínum tíma, alltaf eru til einhverjir „fræðimenn“ á launum við að afneita staðreyndum í þágu hagsmuna.

IPCC
NOAA

Ekkert lát er á smíði TISA, TPP og TTIP fjölþjóðasamninga. Fela í sér jafnstöðu stórfyrirtækja sem ígildi þjóðríkja. Geta samkvæmt þeim sett þjóðríkjum stólinn fyrir dyrnar. Geta hafnað neytendavernd, umhverfisvernd og lágmarkslaunum, svo dæmi séu nefnd. Ísland er aðili að leyniviðræðunum. Wikileaks hefur í tvígang birt leyniskjöl af fundunum, en heimsfjölmiðlar stórfyrirtækjanna þegja þunnu hljóði, jafnvel Guardian. Martin Eyjólfsson sendifulltrúi vinnur að þessum landráðum í skjóli Gunnars Braga ráðherra. Öll vinnubrögð og allar meginlínur leyndarmálsins fela í sér skýr landráð og skýra atlögu að grunnstoðum lýðræðis.

Wikileaks

Independent

Stuðningsmenn Sjálfstæðisflokksins dreifa á vefnum upplýsingum, sem sýna góða stöðu Íslands. Annars vegar í jafnari tekjudreifingu en nokkru sinni fyrr. Hins vegar í baráttu við útrýmingu fátækar. Gallinn við þessar tölur er, að þær eru frá árinu 2013, þegar lauk kjörtímabili ríkisstjórnar Jóhönnu Sigurðardóttur. Þær sýna því ekki árásir Bjarna Benediktssonar á lífskjör almennings, einkum láglaunafólks, aldraðra og öryrkja. Þannig eru bófar að hrósa sér af afrekum fyrri ríkisstjórnar á erfiðum tíma. Við skulum svo bíða og sjá til, hvað tölur frá árinu 2015 sýna. Hætt er við, að rostinn lækki þá í stuðningsliði bófanna.

Landsbjörg horfir tárvotum augum til fortíðar, þegar konur þekktu sinn stað bak við eldavélina hjá Guðna. Í nútímanum eru þær með alls konar uppsteyt. Buðu sig jafnvel fram í stjórn Landsbjargar á landsþinginu á Ísafirði um síðustu helgi. Auðvitað voru þær allar felldar, björgunarliðar láta ekki vaða yfir sig. Átta manna stjórn Landsbjargar er núna eingöngu skipuð körlum, vel rembdum samkvæmt ljósmynd af atburðinum. Formaður samtakanna hafði þetta að segja um afturhvarf til fortíðar: Konur hafa mikil áhrif þó þær sitji ekki í stjórn. Já, þær vaska upp og skúra eftir karlana. Þær eru fyrstar reknar, þegar þeir klúðra málunum.

Íslendingar eiga að hætta að gefa stóriðju hafnir og göng í kaupbæti ofan á tombóluverð á rafmagni. Ekki reisa fleiri virkjanir fyrir lánsfé, þurfum ekki fleiri. Betra er að reisa glæsihöll yfir náttúruminjasafn og aðra glæsihöll yfir handritasafn. Ferðaþjónusta er orðinn stærsti atvinnuvegur þjóðarinnar og veitir henni langmesta atvinnuöryggið. Fjárfestingar ríkisvaldsins eiga að taka mið af því. Burt með þessa freku karla, sem halda að skurðgröfur og jarðýtur og rafmöstur séu æðsta lífsform landsins. Við höfum fengið upp í kok af úreltri stóriðjuást. Við eigum að leggja áherzlu á að taka rentu af auðlindum okkar.

Guðbjörg Matthíasdóttir í Ísfélaginu er einn af þessum greifum, sem fá gefins 10 milljarða króna á ári. Bara í ókeypis makríl, fyrir utan allan annan kvóta. Hún er einn af eigendum ríkisstjórnarinnar og þar að auki eigandi Moggans og Davíðs. Því þarf að skammta lyf í sjúklinga. Þeir sem eru aftast í biðröðinni fá engin lyf, því að kvótinn er búinn. Fólk er látið deyja drottni sínum. Svo að ríkisstjórnin geti gefið kvótagreifum eftir auðlindarentu og gefið öllum greifum eftir hátekjuskatt, vask og annað fínerí. Ríkisstjórnin leikur lausum hala í þjóðarbúinu og afhendir gírugum eigendum sínum öll finnanleg verðmæti.

Strætó og Isavia eru skýr dæmi um einkavæðingu, sem rústar opinberri þjónustu. Bæði fyrirtækin eru undir stjórn forstjóra, sem eru illa haldnir af siðblindu græðginnar. Strætó rústaði ferðaþjónustu fatlaðra með ævintýralegri græðgi. Og Isavia þurrkaði burt auglýsingagildi fríhafnarinnar sem kynningar fyrir Ísland. Samdi í leyni við erlenda auðhringa um sölubása og eyddi útboðsgögnum, þegar Úrskurðarnefnd um upplýsingamál krafðist þeirra. Hvort tveggja fyrirtækið er staðið að fársjúkum viðskiptaháttum í skjóli eftirlitsleysis opinberra aðila. Þau eru dæmi um, að einkavæðing opinberrar þjónustu er ávísun á siðferðishrun.