Landspítalinn rambar á barmi þess að verða hersjúkraskýli í neyðarástandi. Samt hefur Páll Matthíasson forstjóri tíma og fé til að hefna sín á geislafræðingum fyrir að segja upp. Líklega koma við sögu bandarískar aðferðir stjórnenda við að ögra starfsliði og sýna því í tvo heimana. Ákaflega ólíkt þeirri hugsun, sem liggur að baki tilveru spítala yfirleitt. Geislafræðingar með áratuga reynslu eru frystir úti og í staðinn ráðnir mállausir geislafræðingar frá útlandinu. Þetta er augljós hefnd, sem kostar peninga og rýrir gæði. Páll er bara fúll að sýna mátt sinn og megin. Við megum búast við frekari ýfingum í spítalarústunum.

Í tvígang hefur Óttar Guðmundsson geðlæknir strokið geði lesenda Fréttablaðsins með fínu koseríi í Bakþönkum. Í dag ræðir hann Jóhannesa Birkilanda nútímans, sem fylla síður og stundir fjölmiðla og jafnvel heilar bækur. Með „Harmsögu ævi minnar, hvers vegna ég varð auðnuleysingi“. Bókaútgefendur telja harminn vera ávísun á feita umræðu og rennsli inn á metsölulista. Sérfræðingar í auðnuleysi eru á hverju strái og dásama hina sálrænu stólpípu harmsögunnar í fjölmiðlun. Jóhannes Birkiland var uppi á röngum tóma og uppskar háð og spott. Hann hefði unað sér vel á þeysireið milli fjölmiðlanna, veifandi frábærri harmsögu sinni.

Áróðursplagg Eyþórs Arnalds gegn Ríkisútvarpinu geigaði. Sé útvarpið dýrara en BBC í rekstri á hvern íbúa, má spyrja þá félaga: Eru aðstoðarmenn ráðherra hér dýrari á hvern íbúa en í Bretlandi? Allt er dýrara hér miðað við höfðatölu, jafnvel Eyþór Arnalds. Við gríni á Eyþór engin svör og þannig var hann hleginn í kaf. Hins vegar atast útvarpið í röngum póstum. Fé almennings á að nota til að halda úti menningu. Ekki til að sýna boltaleiki eða púkalega grínþætti fyrir fávita. Rusl geta allir sýnt fyrir fé auglýsenda. Rangar áherzlur útvarpsstjóra gefa höggstað á Ríkisútvarpinu. En heimska skýrslan sér um, að það líður hjá.

Þessu kippti landsfundur sjálfstæðismanna út: „Í stjórnarskránni ætti að vera ákvæði um, að auðlindir, sem ekki eru í einkaeigu, séu ævarandi í eign íslensku þjóðarinnar, sem nýttar eru með sjálfbærni og hagsmuni allra landsmanna að leiðarljósi.“ Landsfundurinn styður ekki einu sinni hugmyndir sjálfstæðismanna á alþingi um sátt í stjórnarskrármálinu. Þetta sýnir, hversu fast flokkurinn er límdur við hag þess 1%, sem telur sig eiga sjó og land og þjóð. Ungliðabylting svokölluð treysti sér ekki til að verjast þessu. Enda var hún bara tilbúningur vilhallra fjölmiðla. Alls engin ungliðabylting varð í gamla, vonda Flokknum.

Tap þjóðarinnar á stöðugleikaframlagi slitabúa föllnu bankanna nemur 850 – 379 = 471 milljörðum króna. 850 milljarðarnir eru það, sem stöðugleikaskattur hefði gefið af sér, en útkoman í stöðugleikaframlaginu varð ekki nema 379 milljarðar.  Þetta er hið raunverulega heimsmet, sem ríkisstjórnin reynir að fela með því að slengja öðrum og óviðkomandi hlutum inn í dæmið. Samt liggur ekki fyrir neitt fjölþjóðlegt lögfræðiálit um áhættu af stöðugleikaskatti, þótt það hafi hingað til verið venja. Til dæmis í IceSave. Hvers vegna fer stjórnin í sjónhverfingar í stað þess að fylgja áætluninni? Líklega rekur hún erindi skuggabaldra á laun.

Forsætisráðherrafundurinn í Reykjavík floppaði. Cameron gaf enga yfirlýsingu í Evrópumálum, sem hann hafði ekki ítrekað gefið áður. Engin samstaða náðist hjá norrænu ráðherrunum um aðgerðir eða aðgerðaleysi í málum flóttamanna. Sigmundur Davíð Gunnlaugsson kunni ráð við þessu, sem hann þekkti úr sínum kreðsum. Fara í leiki, fallin spýtan, eitt par fram fyrir ekkjumann, snú-snú. Lét kollegana reyna að búa til önd úr sex kubbum. David Cameron lét blekkjast, feginn fríinu frá grimmum Corbyn. Sætir nú aðhlátri í fjölmiðlaheimi Bretlands. Sem spyrja, hvort honum henti betur að leika sér án bindis en að stjórna landi og þjóð.

Engin efnahagsástæða er fyrir lágum launum hér. Kominn er tími til að hala lágu launin upp. Ofsagróði er í sjávarútvegi, falinn gróði í stóriðju og gjaldeyrir mokast inn í ferðaþjónustu. Samt eru laun döpur einmitt í ferðaþjónustu. Danir hafa 20$ lágmarkslaun eða 2.600 kr. á tímann. Engin efnahagsrök er fyrir lægra lágmarki hér. Auðlindir eru margfalt meiri hér. En launin þarf að lögfesta, því Alþýðusambandið er í klóm brauðmola-ofsatrúar og alveg gagnslaust. 2.600 krónur á tímann samsvara 100.000 krónum á viku. Hæfir samt varla lágmarks framfærslu samkvæmt hagtölum. Tilgangur hagvaxtar er sá einn, að allir geti séð til sólar.

Heimavarnarlið Sigmundar Davíðs í InDefence jarðar heldur betur heimsmeistarann sinn í fjármálum. Nýjasta sjónhverfing forsætisráðherra gerir illt verra, segir Sveinn Valfells. Það einungis spurning hvenær, ekki hvort það mun hafa neikvæð áhrif á gengi íslensku krónunnar. Vandinn sé óleystur þrátt fyrir fullyrðingar. „Vandinn er skilgreindur upp á 815 milljarða, … slitaframlögin ekki upp á nema 379 milljarða, eftir virðast standa 400 milljarðar af krónueignum sem kunna að fara úr landinu og hafa þannig neikvæð áhrif á íslensku krónuna“, segir Sveinn. Þetta er einfalt rothögg á valdhafa. Hengingarólin verður áfram okkur um háls.

Illugi Gunnarsson er ekki bara gerspilltur, heldur pólitískt dauður. Tróð sér inn í viðskiptasamning við Kína. Fékk þar inn klausu um, að umbjóðandi sinn, Orka Energy, væri fulltrúi Íslands í samstarfi við Kína um jarðhitarannsóknir. Orka Energy og kínverska Sinopec eiga að vinna að því að byggja upp hitaveitur í Kína, en ekki neinir aðrir aðilar. Er þó ekki í verkahring menntaráðherra að stjórna utanríkisviðskiptum. Þetta kom í ljós í morgun, þegar birt voru gögn um samkomulagið milli Íslands og Kína. Illugi hefur lengi verið fjárglæframaður á framfæri Orku Energy, þegið styrki, lán og húsnæði af forstjóra fyrirtækisins.

NÍTJÁN Evrópulönd hafa bannað erfðabreytta ræktun auk þess sem slík ræktun er víða bönnuð í landshlutum. Til dæmis er hún bönnuð í franska hluta Belgíu. Um leið er Evrópusambandið að herða andstöðuna gegn þrýstingi Bandaríkjanna í þágu erfðabreyttrar vöru. Hefur keðjuverkandi áhrif á þriðja heiminn, því evrópski markaðurinn er heimsins stærsti innflytjandi búvöru. Allt er þetta að frumkvæði almennings. Hann reis upp gegn ofurvaldi ríkja og ríkjasambanda, sem ævinlega þjóna auðgreifum umfram almenna borgara. Sams konar alda rís núna í Evrópu gegn TISA og öðrum samningum um ofurvald auðhringa andspænis áður fullvalda ríkjum.

Umræðan um staðsetningu landspítala er til þess fallin að draga athyglina frá hruni Landspítalans. Menn æpa sig hása út af tæknilegum atriðum. En víkja engu orði að hinu alvarlegra, að sjúklingurinn er að deyja, sjálfur Landspítalinn. Meðan málið er tafið með linnulausi röfli, hamast ríkisstjórnin við að veikja spítalann. Svo að auðveldara sé að reisa einkarekstur á rústum hans. Vitringar staðarvals eru peð í meginskák einkavinavæðingar. Biðlistar lengjast, fólki hrakar og það deyr á biðlistum. Þjónusta versnar og oftar er teflt á tæpasta vað. Vinnugleði og líknarhugsun víkur fyrir stríði Flokksins gegn sjúklingum.

Niðurstaða stöðugleikadæmisins er sú, sem búist var við. Gefinn nokkur hundruð milljarða afsláttur frá 800 milljarða stöðugleikaskatti til að fá slitabúin til að greiða tæplega 400 milljarða stöðugleikaframlag. Helmings afsláttur er of mikil góðsemi, sem lélegir pólitíkusar reyna að fela með því að taka ýmislegt óskylt inn í dæmið. Þannig vinnur alltaf Sigmundur Davíð Gunnlaugsson, hann elskar sjónhverfingar. Seðlabankinn var látinn taka á sig að gefa gæðastimpil á niðurstöðuna. Málinu er lokið, sem er jákvætt. Sömuleiðis er jákvætt, að öll upphæðin verði notuð í að lækka skuldir ríkisins, sem urðu til í bankahruninu.

Hávær er þögn Evrópusambandsins um hallarbyltingu forseta og afnám lýðræðis í Portúgal. Hún er versta atriðið í röð tilvika, sem sýna fram á, að sambandið er duglaust um lýðræði. Flækt í net bankstera, sem vilja endurheimta spilavítisfé sitt. Jafnvel Angela Merkel kanzlari harmaði kosningasigur krata í Portúgal og lagði lóð sitt í vogarskál hallarbyltingar. Í málum Grikklands og flóttamanna hafði sambandið áður sýnt innri vanmátt. Annars vegar er vont að hafa róna og smámenni í forustu fjölþjóðasambands. Hins vegar er sjálft kerfi sambandsins í megnu ólagi, samanber TTP og TISA afsal fullveldis og opin Schengen-landamæri.

Ég fæ jafnan gæsahúð, þegar ég sé Þorstein Víglundsson og Gylfa Arnbjörnsson takast í hendur. Reynslan segir mér, að þá sé verið að díla um brauðmola, sem falla af borði hinna forríku. Sem verða ríkari og ríkari meðan láglaunafólk þarf að bíta þrengdan kost. Korpóratismi sameinaðrar klíku atvinnurekenda og verkalýðsrekenda er ættaður frá Mussolini og fasistum. Þeir fundu upp kjörorð Sjálfstæðisflokksins: Stétt með stétt. Norræna og þýzka sáttastefnan er annars eðlis, stefnir að sanngirni og bættum lífskjörum. Hér á landi er ekki um neitt slíkt traust að ræða. Hér er skipulega unnið að aukinni velferð yfirstéttar.

Landsfundurinn staðfesti, að Sjálfstæðisflokkurinn hefur ekki áhuga á að breyta stjórnarskránni og vill ekki endurheimta þjóðareign auðlinda. Flokkurinn verður því ekki með pírötum í ríkisstjórn þeirra, þótt sumir hafi gamnað sér við þá fráleitu hugsun. Píratar verða að díla til vinstri, hvort sem þeim líkar betur eða verr. Sjálfstæðisflokkurinn verður áfram bófaflokkurinn, helzta fyrirstaðan á þroskabraut þjóðarinnar. Að öðru leyti skipta samþykktir landsfundarins engu, ekki frekar en nokkru sinni áður. Ungliðahreyfing flokksins fékk sinn landsfund og getur farið heim. Hún hefur ekkert fylgi út fyrir fjölskyldurnar fjörutíu.