Spunakerlingar og almannatenglar í Bandaríkjunum og Bretlandi hafa klæðst grænu gervi og ganga berserksgang í grænni stefnu. Dagblöð hafa tekið upp grænar útgáfur, einkum á vefnum. Almannatenglar telja, að næstu áratugi verði græn stefna efst á baugi í samfélaginu. Þeir vilja koma sínum fyrirtækjum fyrir á þeim slóðum í litrófinu. Einkum telja þeir heppilegt að auka í senn efni fyrir konur og græningja. Væntanlega af því að konur eru grænni en karlar, sem hafa áhuga á álverum og öðru úreltu. Sprig.com hjá Washington Post er gott dæmi um þessa grænu kvennaþróun. Sjá IHT.

Ríkisstjórnin hefur samið við Noreg og Danmörku um varnir landsins. Fólk fær að vita um innihaldið eftir undirritun. Stjórnarandstaðan hefur fallizt á þá málsmeðferð. Allir þingflokkar eru sammála um, að þjóðinni komi ekkert við, hvernig höndluð eru mikilvægustu mál landsins. Þannig hefur alltaf verið samið um varnir án nokkurrar umræðu í þjóðfélaginu um innihaldið. Þannig niðurgreiðir ríkið stóriðju og ábyrgðist milljarða til að koma upp virkjunum á viðkvæmum stöðum. Allt eru þetta risavaxin mál. Fólk fær ekki einu sinni að vita um orkuverðið. Skítt veri með pakkið.

Jón Sigurðsson hefur sett Framsókn yzt á hægri kant stjórnmálanna. Í grein í Fréttablaðinu hafnar hann norrænu leiðinni til framtíðarinnar. Hann taldi hana fæla auðmagnið burt með sköttum. Síðustu forvöð eru fyrir evrópskan flokksforingja að hallast að Chicago-hagfræðinni og Washington-sáttinni, áður en hún dettur úr samkeppni utan landa engilsaxa. Svo mikið hefur brotið á auðmagnshyggju Jóns síðustu misserin, að hún er komin á flótta um heim allan. Enda vill fólk heldur búa á Norðurlöndum en í Bandaríkjunum, heldur búa í Frakklandi en í Bretlandi. Jón er bara strandaglópur.

Kristnum prelátum hefur jafnan verið umhugað um hina nákvæmlega réttu trú. Til dæmis hefur verið ákveðið, að guð sé þríeinn og að guð sé ekki æðri en heilagur andi og Jesús Kristur. Drepnir voru þeir, sem ekki vildu játa þetta. Þannig lék hvert kirkjuþingið á fætur öðru á reiðiskjálfi fyrr á öldum. Þannig var sprengd gjá milli grísks og rómversks rétttrúnaðar fyrir þúsund árum. Það er í samræmi við hefðir, að íslenzkir prelátar vilja vera nákvæmir í orðalagi um sambúð hjá hommum og lessum. Kannski mundi Guði líka illa, ef ríkisreknir pokaprestar feiluðu í orðalaginu.

Jón Sigurðsson, formaður Framsóknar, er andvígur norrænu lausninni á samfélaginu. Hann telur hana fæla fyrirtæki í burtu með sköttum og leiða til meira atvinnuleysis. Hann skrifaði í gær grein um þetta í Fréttablaðið. Hann minntist ekki á, að fólki líður betur á Norðurlöndum en víðast hvar í heiminum. Hann gat ekki öryggis og velferðar, sem Norðurlöndin hafa umfram Ísland. Hann gleymdi alveg, að Norðurlönd eru meðal ríkustu landa í heimi, þrátt fyrir alla skatta og skyldur. Jón vill samfélag hinna ríkustu, sem borga 10% skatt, á kostnað meðalfólks, sem borgar 38% skatt.

Í leiðara í gær segir Guardian, að Boris Jeltsín hafi verið eyðileggjandi, ekki uppbyggjandi. Tækifærissinni, sem hoppaði úr stalínisma yfir á opnun Gorbatsjovs. En gat síðan sem Rússlandsforseti ekki þróað lýðræði. Þekktastur er hann fyrir að gefa ríkiseigur í hendur ólígarka, sem síðan tóku öll völd. Við þetta má bæta, að hann var róni, sem lá dögum saman í rúminu í timburmönnum. Í tremmanum gaf hann öryggisverði sínum færi á að erfa völdin. Pútín lék hlutverk Sejanusar frá Róm hinni fornu og byggði upp einræði á herðum leyniþjónustunnar og nokkurra óligarka.

Þú ert við völd og vilt koma á fasisma. Þú gerir þetta: 1. Þú býrð til ógnvekjandi óvini, einn innlendan og annan erlendan. 2. Þú býrð til gúlag. 3. Þú býrð til stétt fauta. 4. Þú setur upp öryggislögreglu. 5. Þú hrellir borgaralega andstöðuhópa. 6. Þú fangelsar og náðar án dóms og laga. 7. Þú tekur einstaklinga í gegn. 8. Þú nærð tökum á fjölmiðlum. 9. Þú lætur andstöðu jafngilda landráðum. 10. Þú tekur lög og rétt úr sambandi. Naomi Wolf segir í grein í Guardian, að tíu skrefin séu sameiginleg fastistum, svo sem Hitler og Pinochet. Og að Bush sé kominn áleiðis á öllum skrefunum.

Leyniþjónusta Pútíns hefur tekið stjórn á öllum mikilvægum fjölmiðlum í landinu. Stærstu útvarpskeðju landsins hefur verið skipað að hafa minnst 50% frétta jákvæðar. Bönnuð er svokölluð jaðarmennska, svo sem frásagnir af mótmælum á vegum Kasparovs, fyrrverandi heimsmeistara í skák. Hann er sakaður um róttækar skoðanir og “vandalisma”. Nú er stjórn hins nýja Stalíns farin að eltast við bloggara með húsleit gegn netþjónum. Allt er þetta undirbúningur kosninganna, sem verða í haust. Félagi Pútín stefnir að einræði á borð við það, þegar félagi Stalín fékk 101% atkvæða. SjáIHT.

Preston um Frakkland
Í Guardian í gær gerir Peter Preston grín að engilsaxnesku áráttunni að gera grín að Frökkum. Hann segir þvætting, að hagur fólks sé betri í Bretlandi og Bandaríkjunum. Hann bendir á betri vegi og lestir í Frakklandi; frábæra heilsugæzlu; mikla tækniást; snjallari skriffinna í embættum; og stjórnvöld, sem föttuðu Íraksmálið. Síðasta forsendan skýrir, af hverju Bandaríkjamönnum er illa við Frakka. Við þetta má bæta, að Frakkar gátu mótað Evrópusambandið í sinni mynd og búa til bezta mat í heimi. Svo eru vísitölur hagfræðinnar lygi. Svo sem tölur um hagvöxt.

Oddviti meirihlutans í öldungadeild Bandaríkjaþings, Harry Reid, segir hernámsstefnuna gjaldþrota í Írak. Ekki hafi neinn tilgang að senda þangað fleiri hermenn. Blóð mun áfram renna, þótt reistir verði múrar víða um land. Því að trúarflokkarnir eru að undirbúa valdatöku eftir brottför hernámsliðsins. Sjítar munu þá fara með sigur af hólmi, því að þeir eru helmingur íbúanna. Sjítar ráða líka ferðinni í Íran, sem ráðamenn Bandaríkjanna og John McCain forsetaframbjóðandi vilja sprengja í tætlur. Í Guardian er Hvíta húsið í Washington kallað “geðveikrahæli”.

Fólk hefur raunsærri hugmyndir um framtíð flugs innanlands en stjórnmálamenn og sérfræðingar. Könnun Fréttablaðsins sýnir, að það vill hafa flugvöll áfram í Vatnsmýri. Að þeim kosti frágengnum vill það hafa innanlandsflug á Keflavíkurvelli. Mjög fáir vilja hafa völlinn á Hólmsheiði og nánast engir vilja hafa hann á Lönguskerjum. Hafa þeir tveir kostir þó verið rækilega auglýstir, en hinir tveir gagnrýndir. Það stríðir bara gegn heilbrigðri skynsemi almennings að lagður verði nýr flugvöllur, þegar tveir vellir eru til. Valið stendur því milli Vatnsmýrar og Keflavíkurvallar.

Framsóknarmenn skammast sín, þegar þeir eru spurðir í könnunum og vilja helzt ekki segja til flokks. Því mælist Framsókn illa í könnunum. Síðast halaði flokkurinn inn tölvuert fylgi á síðustu vikunum fyrir kosningar, því að kjósendur flokksins komu þá loksins út úr fylgsnunum. Þetta er eðlilegt fyrir flokk, sem er í rauninni vinnumiðlun og spillingarmiðlun. Skjólstæðingar flokksins eru margir, en mælast seint og illa. Það er óeðlilegt að afkastamikill flokkur í sértækri góðsemi hafi innan við 10% fylgi. Enda er það nú að koma í ljós þremur vikum fyrir kosningar.

Árin 2003-2005 var ég útgáfustjóri hestablaðsins Eiðfaxa. Þá skrifaði ég í blaðið fjölda greina um hestamennsku, einkum um langferðir á sumrum. Þar er meðal annars fjallað um útbúnað á ferðum, klæðnað fólks og rekstur hrossa. Allt var það byggt á uppsafnaðri reynslu ýmissa manna. Greinarnar hafa nú verið settar í gagnabankann www.jonas.is. Til að finna grein nægir að fara í leitarboxið hér vinstra megin og skrifa þar inn leitarorð, t.d. “stígvéli”, “GPS”, “mél”. Ef menn vilja nota ítarlegri leið, þurfa þeir að fara í flokkinn “Greinar”, þar sem eru leitarbox fyrir mörg leitarorð í senn.

Um leið og rannsókn sýndi, að Sjálfstæðisflokkurinn hefur svikið allan þorra síðustu kosningaloforða, stórjókst fylgi flokksins. Kjósendur hans kæra sig nefnilega sumir kollótta um kosningaloforð og aðrir þeirra vona fremur en hitt, að þau verði svikin. Loforð kosta nefnilega peninga, sem kjósendur flokksins telja afleitt. Þeir telja hlutverk ráðamanna flokksins vera að tryggja fjörugt atvinnulíf og fulla vinnu, gott svigrúm fyrir athafnir fólks. Flokknum hefur tekizt að halda úti sveiflu og spennu síðustu árin. Meira heimta kjósendur ekki. Er það ekki bara í lagi?

Ég fær gæsahúð, þegar ég heyri pólitíkus tala um athafnastjórnmál. Athafnir eiga heima í atvinnulífinu, þar sem menn taka áhættu. Pólitíkusar taka hins vegar enga fjárhagslega ábyrgð af áhættu á kostnað greiðenda skatts og útsvars. Athafnapólitíkusinn er vinur verktaka, sem vilja reisa háhýsi á dýrum lóðum ofan í gömlum hverfum. Sem vilja reisa orkuver á ábyrgð ríkisins og á kostnað orkunotenda. Sem vilja reisa flugvöll og íbúðir úti í sjó. Athafnastjórnmál eru fínt orð um pólitíkusa, sem ekki hafa vaxið upp úr sandkassa og spillingu. Þeir eru hættulegir.