Ég er frjáls sem fuglinn. Enginn getur gert mér neitt. Ég er kominn á aldur og hef lagt nóg fyrir, eyddi engu. Get sagt það, sem mér sýnist. Hef ekkert símanúmer og ekkert skiptiborð. Engir æstir valdhafar ná í mig. Þarf ekki að svara fyrir verk annarra. Mér var borgað sem svarar milljón á mánuði fyrir að vera ritstjóri. Það voru skítalaun fyrir erfiða starfsævi. Nú fer ég í fimmtán daga hestaferð, þegar mér þóknast. Fer til útlanda, ef ég nenni. Blogga bara prívat og persónulega um ruglið í þjóðfélaginu. Og leyfi úrillum ekki einu sinni að setja inn athugasemdir. Flott starf.

Einokunarbanki landsins er svo sjálfhverfur, að hann telur sig fara með löggjafar- og dómsvald. Kaupþing, Landsbankinn og Glitnir halda, að þeir geti sektað fólk fyrir greiðslufall og haldið eftir sektum. Ríkisvaldið eitt hefur rétt til að sekta og taka til sín sektarfé. Svo firrtur er þríeini einokunarbankinn, að hann segir ekki einu sinni, hvað hann stelur miklu fé af fólki og ríkissjóði með því að setja fólk á “fitt”. Umboðsmaður neytenda hefur vaknað til lífsins og með stuðningi lagaprófessora vakið athygli á lögleysu bankanna. Segir fólk eiga endurkröfu á bankadólgana.

Neðanjarðarhagkerfið á Íslandi er 63 þingmönnum að kenna. Þeir eru að vísu sáttir við, að ríkið höndli hættulegustu fíkniefnin, áfengi og tóbak. En önnur fíkniefni láta þeir eftir neðanjarðarhagkerfinu. Það mundi hverfa, ef ríkið fengi að höndla fíkniefni almennt. Þá mundu dópsalar og handrukkarar hverfa og siðferði þeirra um leið. Þeir yrðu að selja bimmana sína og fólk mundi hía á þá. En þingmennirnir hafa ákveðið, að dópsalar og handrukkarar skuli vera helztu höfðingjar landsins. Þeir megi hafa um sig hirðir, sem taka reglur neðanjarðarhagkerfisins fram yfir lög og rétt samfélagsins.

Matgæðingar, sem ég tek mark á, kaupa tilbúna fiskrétti í nýtízku fiskbúð til að setja á pönnu. Það þori ég ekki, fer í gamaldags fiskbúð. Ég hef óbilandi trú á, að gamall fiskur sé notaður í tilbúna rétti. Fyrst sé fiskurinn seldur eins og hann er eða afhausaður og slógdreginn, kannski flakaður. Það, sem ekki seljist yfir daginn, fari í tilbúna fiskrétti eða plokk. Þegar ég kaupi nýjan fisk, leynir sér ekki við eldamennskuna, hvort hann er raunverulega nýr eða ekki. Tilbúni fiskurinn leynir hins vegar á sér, ellibragðið af fiskinum er falið bak við krydd og legi og sósur.

Ég ók um miðbæinn í mesta hitanum, þegar Austurvöllur var þéttsetinn fólki. Á horni Pósthússtrætis og Austurstrætis stóðu tveir stjarfir og lömdu hvor annan. Voru sæmilega klæddir en augnaráð þeirra var af annarri plánetu. Sama dag las ég í blaði Stefán Eiríksson lögreglustjóra stæra sig af zero tolerance fyrir minni háttar brot og óskunda á almannafæri. Þeir stjörfu vissu ekkert um það, enda hvergi sjáanleg lögga. Ég sé aldrei löggu þarna, í athvarfi öl- og dópóðra. Dag nokkurn mun einhver stjarfur grípa vélbyssu úr pússi sínu og skjóta tugi fólks. Hvar verður zero tolerance þá?

Góður tölvuhakkari og vel skipulagður safnari ummæla nafnlausra álitsgjafa geta eignazt skúbb aldarinnar. Það væri jólabók, þar sem flett er ofan af hinum nafnlausu. Þar væri nafn þeirra, mynd, heimilisfang og sími. Neðan við hvert nafn kæmi svo allur sorinn, sem vellur um veraldarvefinn af völdum þess. Þetta yrði reiðarslag fyrir landssamband klikkusa og alla félagsmenn þess. Ég mundi kaupa svona bók, þótt hún kostaði 10.000 krónur. Því miður hef ég ekki nógu mikið vit á tölvum og ekki nógu mikla þolinmæði til að moka upp soranum. Þess vegna get ég ekki sett saman metsölubókina.

Ég á forláta eldavél úr keramiki og eldunarofn, sem hefur fleiri stillingar en ég kann að nefna. Því þarf ég ekki að nota grill. Ég er laus við að hanga úti í garði við að forkelast, meðan matargestir sitja inni í hlýju gluggaveðri. Konan keypti einu sinni grill að mér forspurðum, en ég sá við henni. Örlög þess urðu þau, að einn sonurinn fékk það lánað og skilaði því ekki frekar en öðru. Ég sakna þess ekki. Þegar ég kem heim undir kvöld finn ég lykt af kryddaðri, brenndri olíu liggja yfir nálægum götum. Nágrannarnir hamast við að forkelast við að brenna og eyðileggja góðan mat.

Einn af hverjum fimm Bandaríkjamönnum trúir, að sólin snúist um jörðina. Enn fleiri hafna þróunarkenningunni, sennilega hinir sömu, og svo margir í viðbót. Það eru þeir, sem hafa komið óorði á kristni í heiminum. Enn fleiri vita ekki, hvað er fruma, litningur og geislun. Fólkið, sem trúir róttækum bókstafsklerkum að hætti Gunnars í Krossinum. Kannanir í Bandaríkjunum sýna, að þetta er sama heimska, ómenntaða bókstafsfólkið. Í Evrópu er það jaðarfólk umhverfis stofnanir á borð við Omega. En það er því miður við stjórnborðið í valdamiðstöðvum Bandaríkjanna og við gereyðingarvopn þeirra.

Þótt veraldarvefurinn virðist opinn og frjáls, leynist þar Stóri bróðir. Jón Ólafsson fékk Hannes Hólmstein dæmdan í Bretlandi fyrir efni, sem sett var á vefinn á Íslandi. Vont er, ef menn geta valið sér afturhaldsland til málaferla. Einnig hefur höfundaréttur verið þaninn út. Svo sem til að gera Warner Bros. kleift að elta uppi blogg barna og unglinga. Dómstólar í Bandaríkjunum hafa bannað sumt: Krækjur í efni annarra framhjá heimasíðum. Forrit, sem brjóta læsingar á efni. Að setja upp krækjur í slík forrit. Löggan kemur fljótt í heimsókn og óvænt, ef bloggarar vara sig ekki.