Dögum saman hafa ráðherrar kjarnaríkja Evrópusambandsins haldið leynifundi í Luxembourg um ástandið í Grikklandi. Fyrsta lýðræðisríki heimsins rambar á barmi gjaldþrots vegna spillingar pólitíkusa og skattafælni borgara. Landið er á framfæri Evrópusambandsins, þarf núna 10.000 milljarða króna í viðbót. Fyrst og fremst verða það Þjóðverjar sem borga eins og venjulega. Bretar verða ekki með, enda spila þeir fríspil í Evrópu. Kjósendur snúast öndvert gegn greiðasemi við Grikki og erfitt verður því að verja niðurstöðuna. Það undarlega við þessa fundi er, að allir vita um þá, þótt þeir séu leynilegir.
