Yfirlýsing stjórnvalda um aðildarferlið að Evrópu felur í sér að halda sjó fram yfir kosningar. Áfram verður dúllað við að kanna möppur, sem hafa verið opnaðar. Hins vegar ekkert gert í erfiðu möppunum, sem ekki hafa enn verið opnaðar. Lengi hefur legið fyrir, að þetta væri eðlileg lending í aðdraganda alþingiskosninga. Samfylkingin hefur lítinn stuðning við þetta hjartans mál, hefði hvort sem er ekki komizt lengra. Ég er eindreginn aðildarsinni. En hef lengi séð, að málið er dautt, meðan þjóðin er þjóðrembd útskerjaþjóð, sem trúir á Bjart í Sumarhúsum. Enda ætti Evrópa alls ekki að taka við slíkum.

Bjarni Benediktsson hyggst láta lífeyrissjóðina kaupa í Landsvirkjun til að spara ríkinu vexti af völdum hrunsins. Ekki er ljóst, hvernig hægt yrði að hindra frekara framsal hlutabréfanna til annarra. Erlendir vogunarsjóðir gætu eignast orkuauðlindir landsins, alveg eins og kvótabófarnir gátu rænt auðlindum hafsins. Einkavæðing er sjálfvirkt skrímsli, sem veltur eins og bolti án þess að við neitt verði ráðið. Erfitt verður með lögum að hindra lífeyrissjóði í að nýta eign sína á löglegan hátt. Fyrr en varir verður orka landsins komin í fjarlæga eigu. Skammtímasjónarmið stjórna græðgis-vafningi.

Rammaáætlun er rós í hnappagat Vinstri grænna, Samfylkingarinnar og þeirra þingmanna, sem standa að nýjum framboðum. Aðeins bófar Flokks og Framsóknar sögðu nei, bara 21 atkvæði. Rammaáætlun markar skref í átt til nýs og betri skilnings þjóðarinnar á mikilvægi náttúrunnar í umhverfi okkar. Því fleiri sem verja frístundum í samneyti við náttúru landsins, þeim mun hraðar miðar okkur í átt til skynseminnar. Enn er þó Reykjanesskagi virkjunarsvæði, þótt nýjar rannsóknir sýni, að fyrri rannsóknir voru í skötulíki. Verkfræðingar Rammaáætlunar skildu ekki, að friðaður skagi yrði gullnáma í ferðaþjónustu.

Engum blöðum er um að fletta, að þjóðin er óhæf. Um áratugi hefur hún valið undirmálsfólk til að stjórna, einkum úr Sjálfstæðis- og Framsóknarflokki. Umboðsmenn okkar hafa einkum gætt þröngra sérhagsmuna, svo sem í útgerð og vinnslu búvöru. Hafa fyllt embætti ríkisins af undirmálsfólki, sem kemur fáu í verk. Ég hef áður rakið dæmi um óstarfhæf ríkisembætti vegna undirmáls-forstjóra. Umboðsmenn fólksins gáfu líka græðgisliði sínu mjög svo misnotaða friðhelgi fyrir eftirliti. Afleiðingar íslenzks undirmáls sjást alla leið frá barnadólgum, um kvótagreifa, bankstera og víkinga, og upp í forsetakjör.

Bjarni Benediktsson vill ekki, að ríkið þurfi að borga alla þessa vexti. Hefur gleymt stuðningi sínum við hrunstjórnina. Hún tók ábyrgð á gjaldþroti Seðlabankans og fjármögnun nýrra viðskiptabanka. Sem gerðist á grundvelli fúsks í ríkisstjórn Geirs og Seðlabanka Davíðs. Bjarni var formaður þingflokksins, þegar þúsund milljörðum var slengt á ríkissjóð. Geðbilaðri fjárhæð. Hann er óhress með vextina af þessu fé. Lausnin er einföld, hentar vel fávitunum, sem styðja flokkinn. Kennir Jóhönnu og Steingrími um vexti af völdum hrunsins og býður nýtt fyllerí og nýtt gjaldþrot að hætti Flokksins.

Skoðanakannanir segja okkur, hvernig fylgi þeirra, sem hafa gert upp hug sinn, skiptist milli fjögurra deilda fjórflokksins. Þær sýna aukið fylgi Sjálfstæðisflokks, minnkað fylgi Samfylkingarinnar og hrun Vinstri grænna. Þær segja okkur lítið um væntanlega þingmannatölu, því að þær segja okkur ekki, hver verða áhrif nýrra framboða. Það fer eftir stemmningunni í vor, en ekki eftir aðstæðum í janúar. Því er of snemmt að reikna skiptingu í stjórn og stjórnarandstöðu. Ljóst er þó, að innan Samfylkingarinnar er hreyfing í átt til sjónarmiða Sjálfstæðisflokksins, enda hefur fólkið gullfiskaminni.

Margir ætluðust til meira af ríkisstjórninni en, að hún setti svokölluð hjól atvinnulífsins í gang og afskaffaði atvinnuleysi. Þökkum það, en hörmum, að hún skyldi ekki hrófla við bankaglæpum. Árið 2013 eru bankarnir nákvæmlega eins og þeir voru fyrir hrunið 2008. Hossa bófum og níðast á almenningi. Til þess voru þeir upphaflega studdir af Árna Páli Árnasyni bankaráðherra, sem sótti ráðgjöf til bankabófa. Svo rak Jóhanna hann úr stjórninni með skömm og skít. Síðan hafa þeir verið studdir af Steingrími J. Sigfússyni, sem einnig gætir hagsmuna Samherja og kvótagreifanna á þeim bæ. Fjórflokkurinn, sjitt.

Kristin stjórnmálasamtök íhuga að bjóða fram til þingkosninga í vor. Þeim þykir “ásókn veraldlegra hreyfinga mjög áberandi hér á síðustu árum og mörg vígi kristin siðferðis fallin”. Þegar ég heyri um síðustu vígi kristins siðferðis, detta mér í hug þeir Ólafur Skúlason biskup, séra Ágúst George, Helgi Hróbjartsson trúboði, Guðmundur í Byrginu og Karl Vignir Þorsteinsson. Töluvert af barnaníði síðustu áratuga hefur verið framið undir englavængjum kristinnar kirkju. Þar með talinni þjóðkirkjunni, þeirri kaþólsku og ýmsum kristnum ofsatrúarsöfnuðum. Því vantar núna kristilega þingmenn til varnar.

Þar sem kattarþvottur Róberts Spanó um betrunarheimilin illræmdu hefur verið upplýstur, þarf að rannsaka Kumbaravog. Þar virðist Kristján Friðbergsson hafa rekið þrælabúðir barna í gróðaskyni. Þar á ofan lánað óviðkomandi perra skrifstofu sína til að gramsa í börnunum. Einnig misnotaði sonur Kristjáns, Halldór J. Kristjánsson bankastjóri, Landsbankann í ofsókn gegn blaðamanni, sem skrifaði um Kumbaravog. Hælið stinkar til himnaríkis. Kannski er þetta eitt af frægum málum, sem þjóðin á alls ekki að skoða “í baksýnisspeglinum”. Heldur horfa fram eftir gullveginum að hætti stjórnmálabófa hrunverjanna.

Hjartnæm minningargrein Össurar Skarphéðinssonar um góða perrann á Ísafirði markaði upphaf blómaskeiðs barnaníðs á Íslandi. Fjórflokkur og þjóð náðu þá í síðasta skipti saman um eitt hugsjónamál. Um velferð og friðhelgi perra á kostnað barna. Aldrei kom illska og heimska afskekktrar eyþjóðar betur fram á neinum dögum þjóðarsögunnar. Barnaníðingar hafa síðan leikið lausum hala í átta ár. Eftir vel þegið Kastljós urðu snögg umskipti. Húðstrýkt og hnípin þjóð horfir í gaupnir sér. Veit upp á sig hræsnina og þöggunina, þarf að finna sér nýja afneitun. Ætli sú snúist ekki um að hafna baksýnisspeglum.

Vil vara nýju framboðin við lukkuriddurum, sem vilja nota þau til að komast til fjár og áhrifa. Þeir eru duglegir við að smala á fundi. Reyna að taka yfir félög á borð við Neytendasamtökin í haust. Ýmsir félagsberserkir hafa síðan sótt grimmt inn í nýju framboðin. Til dæmis frá Hagsmunasamtökum heimilanna og Geðhjálp. Stjórn síðastnefnda félagsins hefur lýst vantrausti á þann fyrrverandi formann sinn. Þótt fjórflokkurinn sé vandræðagripur, má hann þó eiga að halda utanaðkomandi lukkuriddurum frá pólitískum frama. Hef enga trú á, að pólitískir lukkuriddarar verði farsælli en fjórflokkspakkið.

Ríkisstjórnin leyfir kennitöluflakk og gervirekstur. Þótt ný lög væru ekki afturvirk, mundu þau þó gilda frá dagsetningu. Unnt hefði verið að hindra kennitöluflakk og skuldsetningu fyrirtækja fyrir einkaskuldum síðustu árin. Bankar yrðu að fylgjast með, hvort lánþegar hafi kennitölu-fortíð. Þeim væri bannað að leyfa skuldsetningu eignalausra hlutafélaga fyrir einkaskuldum bófa. Það eru umboðssvik af hálfu bankastjóra, sem eyða þannig tryggingum fyrir endurgreiðslum. Slík lög ættu líka að banna aðkomu fyrri eigenda að afskrifuðum rekstri þeirra. Ríkisstjórnin ber ábyrgð á þessari spillingu.

Vigdís Hauksdóttir hefur í nærri fjögur ár geisað mikið í pólitík. Farið þar óvægnum orðum um menn og málefni. Þar sem hún er jafnframt málhölt, hefur framganga hennar orðið tilefni frétta um málvillur. Það kallar hún einelti og kvartar sáran í kranaviðtali Fréttatímans í dag. Passar illa við óvægni hennar og ber vitni um dómgreindarbrest. Minnir á Sigurð G. Guðjónsson, sem kærir fyrir hatursáróður gegn Bakkavararbræðrum. Lagaákvæði um hatursáróður voru nýlega sett að undirlagi félagslegs rétttrúnaðar til að gæta hagsmuna minni máttar hópa. Sigurður telur auðuga fjárglæframenn vera minni máttar.

Tæplega helmingur ríkja Bandaríkjanna hefur tekið upp þriggja ofbeldisglæpa regluna. Þegar menn fremja ofbeldisglæp í þriðja skiptið, fá þeir sjálfkrafa 25 ára dóm eða ævilangt fangelsi án skilorðs. Því miður hræðir þetta ekki verðandi ofbeldismenn, því glæpum fækkar ekki. En reglan frelsar samt fólk undan hræðslu við þessa menn, sem undantekningarlítið eru karlar. Enda er markmið reglunnar ekki að lækna, heldur að losna við ofbeldismenn úr umferð. Það eitt út af fyrir sig er röksemd fyrir að innleiða svipaða reglu hér. Upp er risinn hópur einbeittra síbrotamanna, sem alls ekki má ganga laus.

Guðbergur Bergsson er félagslega röntgentækið, er dýpst hefur skimað í kima íslenzkrar þjóðarsálar. Gerði sálina víðfræga í Tómasi Jónssyni. Guðbergur tjáði sig 2009 um erfiðleika fólks við að laga sig að siðaðra manna háttum og semja um IceSave: “Þegar skip fórst tók öll þjóðin þátt í harminum. Það sem sameinaði þjóðina var harmurinn. Þetta mundi líka sameina þjóðina ef hún myndi ekki borga, einangrast og standa bara með sjálfri sér. Vera ekkert að hugsa um það hvaða álit hinn stóri heimur hefur á okkur. Stóri heimurinn hugsar ekkert mjög mikið um okkur.” Lýsing á þjóðrembu í einangrun eylands.