Á flokksþingi Framsóknar þóttist forsætis vitna í hrægamma um varðstöðu hennar gegn ásælni þeirra. Fljótlega kom í ljós, að hann var að vitna í orð Ásmundar Einars Daðasonar, eigin aðstoðarmanns. Þau birtust í fréttabréfi Einars Karls Haraldssonar, almannatengils Glitnis. Leyniskjal leiðtogans mikla um leiðtogann mikla reyndist bara aðstoðarmaður leiðtogans mikla. Þessu fagnaði þingheimur á þingi flokksins um helgina, enda tæplega annað í boði. Leiðtoginn mikli segist hafa efnt öll sín loforð, þótt aðrir sjái slíks engin merki. Sjónhverfingar eru framsóknarmönnum gleðiefni, enda er fátt þar til þess fallið að gleðja fávísa.

Hægri hönd forseta Alþýðusambandsins segir, að skólakerfið eigi að vinna með atvinnulífinu. Það er rangt eins og annað, sem verkalýðsrekendur hafa meðtekið af of náinni sambúð við atvinnurekendur. Markmið skólakerfisins á að vera að mennta. Minna máli skiptir, hvort lokapróf er tekið í þessari grein eða hinni. Lengi var brezka ríkið rekið af útskrifuðum sérfræðingum í grískum og latneskum bókmenntum. Ekki er unnt að sjá, að einhver tilgreind tæknileg menntun hefði hentað betur. Engin leið er að átta sig á, hvaða sérfræði verður mikilvægari eða lítilvægari eftir marga áratugi. Fólk lærir af reynslu sinni, það er bezt.

Nú eru Norðurlönd búin að skilgreina Rússland að nýju sem hættu við heimsfrið og sérstaka ógnun við norðurslóðir. Ísland stóð með öðrum að þeirri ákvörðun. Nú er spurning, hvað gert verði við helzta umboðsmann og stuðningsmann Pútins Rússlandsforseta hér á landi. Mun Gunnar Bragi Sveinsson setja öryggisvakt á Ólaf Ragnar Grímsson, hlera síma hans og hafa á honum aðrar gætur? Greinilegt er, að stóraukin fyrirferð Pútíns hefur rekið fleyg gegnum miðjuna á Undralandi Framsóknarflokksins. Nú ríður á, að hinn þjóðrembdi flokkur láti hinn mikla og ástsæla leiðtoga flokksins segja sér, til hvaða ráða verði að grípa í stöðunni.

Sam­band er á milli fjölg­un­ar dauðsfalla á höfuðborg­ar­svæðinu og aukins styrks brenni­steinsvetn­is frá jarðhita­virkj­un­um í ná­grenni þess, sam­kvæmt niður­stöðum nýrr­ar rann­sókn­ar. „Þessi rann­sókn gef­ur vís­bend­ingu um, að það sé eitt­hvað að ger­ast og það þurfi að skoða þetta bet­ur,“ SEGIR Ragn­hild­ur Finn­björns­dótt­ir. Hún er að skrifa doktorsritgerð um málið. Samkvæmt þessu notar Orkuveitan íbúa svæðisins sem tilraunadýr, hugsanlega með lífshættulegum afleiðingum. Þarf ekki að stinga við fótum? „Við erum í raun mjög aft­ar­lega á mer­inni á Íslandi með að skoða áhrif loft­meng­un­ar á heilsu. Norður­lönd­in eru miklu dug­legri …“

Flokksþing Undralands er haldið um helgina. Fram kom, að sérfræðingar á vegum hrægamma væru búnir á sálgreina formanninn. Hefðu borgað 18 milljarða til að hafa flesta lagatækna, almannatengla og nokkra blaðamenn og álitsgjafa á kaupi. Við að ofsækja Sigmund Davíð. Að gjaldeyrishöftin væru á útleið í vor, þvert ofan í varfærni Bjarna Benediktssonar. Fundarmenn Undralands voru sælir með, að SDG hefði efnt öll kosningaloforðin. Þar á meðal tekið 300 milljarða af vondu hrægömmunum. Miklir menn erum við, sögðu vænisjúkir fundarmenn. Og mestur allra er hinn mikli og ástsæli næstum-doktor í skipulagsfræðum, sem enn er risinn úr rekkju.

Sigmundur Davíð er dauft menntaður pabbastrákur, sem ráfaði án árangurs milli erlendra háskóla. Skreytti sig með stolnum próffjöðrum, þegar pabbinn keypti handa honum Framsóknarflokkinn. Sá flokkur var þá hlynntur nýrri stjórnarskrá og aðild að Evrópusambandinu. Gervidoktorinn sneri stefnunni þveröfugt og gerði Framsókn að þjóðrembdum afturhaldsflokki. Þar á ofan lofaði hann að ná tugum milljarða af hrægömmum og afhenda þrautpíndum skuldurum. Þeir gerðu hann strax að forsætis. Þar hefur hann hægt um sig, mest verið týndur. Af og til rís hann úr rekkju til að kvarta yfir gagnrýnendum, sem aldrei geta látið hann í friði.

Heilbrigðiskerfið er hrunið. Var lengst af gallað, til dæmis voru tannlækningar og eru enn á kostnað sjúklinga. En nú er hrunið ekki á einstökum sviðum, heldur almennt. Biðlistar lengjast hratt, eru farnir að valda fólki heilsutjóni og jafnvel ótímabæru andláti. Löngu biðlistarnir líkjast engu í nálægum löndum. Nú bíður fólk þrjú ár eftir augasteinaskiptum, tiltölulega fljótlegri aðgerð. Ríkt fólk fær augasteinaskipti strax í dag. Þannig er orðið tvenns konar heilsufar, hinna ríku og svo hinna, sem mega éta það, sem úti frýs. Fyrri ríkisstjórn hélt nokkurn veginn í horfinu, en græðgisvædda stjórnin stefnir hratt út í ógæfuna.

Leifar spillingar Hönnu Birnu eru í stofnunum ráðuneytisins. Hrakti grandvaran embættismann úr starfi lögreglustjóra. Skipaði í staðinn þá, sem hafði aðstoðað hana við lögbrot. Um glæpinn sagði Sigríður Björk Guðjónsdóttir: „Ef ráðuneytið biður um eitthvað, þá fær ráðuneytið það, sem það biður um. Í fyrsta lagi vissi ég ekki að hann hefði ekki rétt á að fá þetta. Hann hringir fyrir ráðherra. Hann hringir fyrir ráðuneytið.“ Þetta er víst það, sem hinn nýi lögreglustjóri kallar að hafa „flekklausan feril“, ojbarasta. Nýi lögreglustjórinn hefur vikið grandvörum aðstoðarlögreglustjórum til hliðar. Skemmda eplið eitrar út frá sér.

Nýir lífeyrisþegar eru að byrja að átta sig á, að áunninn lífeyrir veitir þeim ekki neitt, sem þeir fengju ekki án hans. Greiðslur úr lífeyrissjóðum dragast nefnilega frá greiðslum frá Tryggingastofnun ríkisins. Gæludýr verkalýðsrekenda og atvinnurekenda stela peningum almennings til að hossast í ýmsum fjárglæfrum. Reka fyrirtæki, sem eru fjandsamleg starfsfólki sínu og borga ekki mannsæmandi laun. Það eru nú öll afrek sjóðanna, svo einfalt er það. Reyni menn að losna úr þessari ánauð, eru þeir úthrópaðir af Guðmundi Gunnarssyni. Skil vel, að Sölvi Tryggvason, sem á hvorki hús né bíl, neiti að borga afgjald til lénsherranna.

Viðskiptafræðideild Háskóla Íslands vill losna við sjúkling í banalegu, lætur semja sálfræðiálit og rekur starfsmanninn. Hann telur vegið að sér í álitinu. Háskólinn þrætir fyrir, en Úrskurðarnefnd um upplýsingamál hrekur það. Einnig segir nefndin, að starfsmaðurinn eigi samkvæmt upplýsingalögum að fá eintak af álitinu. Háskólinn neitar að fara eftir lögunum, því það „kæmi sér mjög illa fyrir deildina og háskólann í heild“. Háskóli Íslands fær dýrustu lögmannsstofu landsins til að stefna starfsmanninum fyrir dómstól til ógildingar á niðurstöðu Úrskurðarnefndar. Vantar ekki suma mannasiði hjá Kristínu Ingólfsdóttur rektor?

Þegar allt er í steik, hugga afneitarar sig við ímyndaðan vanda. Komið hefur í ljós, að kjósendur Framsóknar verða fyrir ónæði af erlendum ferðamönnum. Telja sig ekki fá pláss á veitingahúsum og kaffihúsum af þeirra völdum. Gaman hefði ég af að sjá þá kjósendur ráfa árangurslaust milli staða, þeir eiga varla betra skilið. Kannski líta þeir svona óþriflega út, með mosann í skegginu. Auðvitað getur verið hætta á, að hinir hræðilegu útlendingar ávarpi kjósendur Framsóknar á öldurhúsum. Það gæti talizt vera hinum síðarnefndu andlegt áfall. Alltaf er heilsuspillandi, þegar menn mæta augnaráði frá eitraðri Evrópu. Hvar er Guðni?

Gamla trikkið var að einkavinavæða ríkiseinokun og græða milljarð á hverju ári, samanber Kögun. Nýi snúningurinn á trikkinu er að búa fyrst til ríkiseinokun og einkavinavæða hana síðan. Þannig varð til hugmyndin um Auðkenni. Skuldaþrælar voru skyldaðir til að koma sér upp óþörfu rafrænu skilríki. Til viðbótar við auðkennislykil, veflykil skattstofu og önnur rafræn skilríki. Svo var ákveðið að taka upp fast mánaðargjald. Og bingó, milljónir streyma inn. Einkavinavæðing lætur svipuna ganga á skuldaþrælum. Svonefnd frjálshyggja er einkavinavæðing ríkiseinokunar. Pilsfalda-kapítalismi leysir frjálsa markaðshyggju af hólmi.

Náttúrupassinn átti að vera annað trikk af þessu tagi, en heimskum ráðherra tókst ekki að höndla svindlið.

Hópar stjórnmálamanna berjast fyrir spillingu lands og náttúru í þágu stóriðju. Þá köllum við réttilega landráðamenn. Sömu hópar berjast fyrir flutningi tekna frá fátækari helmingi þjóðarinnar í vasa þessa eina prósents, sem fjármagnar þæga pólitíkusa. Þá köllum við réttilega þjóðníðinga. Allir vita, að verið er að tala um þingmenn Sjálfstæðisflokksins og Framsóknarflokksins. Svona tal um landráðamenn og þjóðníðinga er sagt vera ljótt og marklaust öskur út í loftið. Samt segja þessi tvö orð bara sannleikann um skelfilegt ástand, sem er nýtt í stjórnmálasögunni: Kjósendur hafa afhent örvita bófaflokkum völdin í landinu.

Sammála Karli Garðarssyni, þingmanni Framsóknar. Hann vill banna bónusana, sem tíðkast í fjármálastofnunum. Bónusar grafa undan siðferði og búa til glórulausa græðgigamma, sem ekki eru húsum hæfir. Fjármálaráðherra vill leyfa 25% bónusa, en fjármálastofnanir heimta 100% bónusa. Karl vill, að þetta verði hreinlega bannað. Vitað er, að fjármálastofnanir valda kreppum og hruni, einkum vegna siðblindunnar, sem þar er þjálfuð upp. Enda segir Karl: „Ég segi enga bónusa. Þeir hafa þegar valdið þjóðinni nógu miklum skaða.“ Þetta er mergurinn málsins. Raunar á að skylda bankstera til að vinna aðra hverja viku í samfélagsþjónustu.

Verður einhver flokkur öðrum líklegri til að koma þessum boðorðum í verk?
1. Gangsetja nýju stjórnarskrána.
2. Galopna gögn stjórnsýslu, stjórnmála og fjármála.
3. Bjóða upp allan kvóta til leigu.
4. Taka auðlindarentu af öllum auðlindum.
5. Reka bankstera, koma böndum á bankana.
6. Semja við umheiminn um afnám tolla.
7. Setja lög gegn orðhenglatúlkun dómstóla.
8. Auka framlög til velferðar og heilbrigðis.
9. Nota skatta til að jafna lífskjör.
X. Lögfesta lágmarkslaun 500.000 krónur.