Hrun Dags B. Eggertssonar er nýjasta dæmið um, að kratar misstu söguþráðinn við innreið Tony Blair í pólitíkina. Sú hugsun var galin að fara yfir til hægri til að ná óákveðna fylginu. Til lengdar leiddi það til vonlausrar stöðu krata. Nú er verið að snúa dæminu við með Sanders í Bandaríkjunum og Corbyn í Bretlandi. Dagur er síðasti Blair-istinn. Tapaði þræðinum í miðjum sniðgönguklíðum. Með samræmdum ofsa valtaði hamslausa hægrið yfir hann. Ég sá í sjónvarpinu Dag tapa fótfestu, fá ótta í augun og hrapa. „Hefnist þeim er svíkur sína huldumey“ orti Guðmundur Böðvarsson. Pólitíkin snýst um söguþráð, ekki um „samráð“ við rándýr.

Flugfélög vilja lendingar úti á landi, borgi skattgreiðendur brúsann. Samtök ferðaþjónustunnar mæla eindregið með þessum pilsfaldi. Kátlegasta dæmið um, að forstjórar hér eru ófærir um að sjá út fyrir pilsfaldinn, þar sem þeir kúra. Nánast allt framtak á Íslandi felst í að misnota skattgreiðendur, einkavinavæða menntaskóla og sjúkrahótel með tilheyrandi okri á notendum. Einkavinavæðing ríkisstofnana hefur skapað ömurlegustu fyrirbæri landsins, svo sem Strætó og Isavia. Það eina, sem þetta lið undir pilsfaldinum kann í rekstri er að hirða arð, borga fólki skítakaup og segja kúnnann ætíð hafa rangt fyrir sér.

Sammála Atla Þór Fanndal, Dagur B. Eggertsson er aumingi, sem á að segja af sér sem borgarstjóri. Flúði frá sjálfsagðri tillögu um að borgin hafnaði vörum frá Ísrael. Þoldi ekki mótlætið, er skriða af spuna, lygum og dylgjum skrímslanna skall á honum með aðstoð spilltra fjölmiðla. Lyppaðist niður í tveimur áföngum. Fyrst hélt ég, að hann ætlaði að laga tillöguna, en hann gafst þá bara upp. Á að skammast sín fyrir aulaskapinn. Borgin „er nú fyrirmynd fyrir Ísrael um hvernig brjóta skuli beinar aðgerðir á bak aftur.“ Laukrétt hjá Atla Þór. Búast má við fleiri atlögum skrímslanna og þá dugar ekki að hafa aumingja í forsvari.

Margt er það, sem ég skil ekki. Af hverju er skárra að setja innkaupabann á vörur frá herteknum svæðum Palestínu en frá Ísrael sjálfu, gerandanum? Einhver hræsni þarna? Af hverju eru margir æstir út í borgarstjórann, mundu þeir fagna þjónustubanni á hvalveiðibáta til að gleðja útlenda fjármagnseigendur? Einhver hræsni þarna? Af hverju heitir það nazismi að standa í viðskiptaaðgerðum gegn Ísrael? Einhver hræsni þarna? Af hverju er andúð á gerðum Ísraels sagt vera gyðingahatur? Einhver hræsni þarna? Er hálft Ísland orðið að geðveikrahæli út af innantómum flökkusögum um tjón á viðskiptavild?

Húmoristinn á Strætó SAGÐI: „Sem betur fer er hann þó ekki meira einhverfur en það, að hann getur þó allavega ratað heim.“ Reglurnar segja þó, að Strætó eigi að keyra skjólstæðinga heim. En það er meira blóð í kúnni: Bílstjórinn „segist hafa séð hann ganga inn um dyrnar. Og samkvæmt okkar skráningum þá eru engar sérstakar skráningar um þennan aðila.“ Hann trúir, að bílstjórinn sjái gegnum holt og hæðir eða hafi keyrt í humátt eftir drengnum. Heldur, að bara þurfi að fara eftir reglum, sé það tekið fram í hvert sinn. Jóhannes Rúnarsson forstjóri er fífl í þörf fyrir almannatengil. Ævintýri einkavæðingar Strætó er fullreynt.

Hrægammur að nafni Eggert Dagbjartsson sendi Höskuldi Ólafssyni bankstera bréf á ensku með áhyggjum af sniðgöngu Reykjavíkur á vörum frá Ísrael. Banksterinn sá ástæðu til að áframsenda bréfið til Dags B. Eggertssonar borgarstjóra, sem fékk fyrir hjartað. Því upplýsti Richard L. Friedman, talsmaður Carpenter & Co fjárfestingarsjóðsins, að engar breytingar væru á ráðagerðum sjóðsins. Mál þetta var því stormur í vatnsglasi. Raunar eins og aðrar óljósar hlaupafréttir af meintu tjóni háværra braskara vegna sniðgöngunnar. Ragnheiður Elín ráðherra og DV hafa bara auglýst taugaveiklun sína og slúðurburð. Ekkert er í uppnámi.

Niðurlæging Sameinuðu þjóðanna birtist í skipun Sádi-Arabans Faisal bin Hassan Trad í formennsku fimm manna mannréttindanefndar samtakanna. Sádi-Arabía á ekki erindi í neina slíka nefnd. Hefur ekki einu sinni samþykkt mannréttindasáttmála Sameinuðu þjóðanna. Sádi-Arabía er miðaldaríki karlrembu, sem hálsheggur fólk fyrir eðlilegt hátterni, svo sem trúleysi. Ríkið notar olíuauðinn til að grafa undan veraldlegu þjóðfélagi vesturlanda. Fjármagnar moskur wahabíta víðs vegar um Evrópu, þar á meðal í Skógarhlíð í Reykjavík. Fylgjast þarf með, hvað er á seyði í slíkri mosku wahabíta. Styðja heldur fyrirhugaða mosku í Sogamýri.

Úlfar Erlingsson er merkasti núlifandi Íslendingur. Yfirmaður tölvuöryggis hjá Google. Hefur í þeirri stöðu séð til þess, að íslenzka er eina örsmáa tungan í máltæknigrunni fyrirtækisins. Einstæð forréttindi, sem gera Íslendingum kleift að ferðast inn í nána framtíð talgervla. Það kostar að vísu milljarð króna, sem er skiptimynt í þessu samhengi. Talgervlar munu skilja okkur og tala við okkur, þegar þeir flytja okkur í sjálfkeyrandi bílum milli staða. Lyklaborðið er ekki lengur aðgangur að morgundeginum, heldur mælt mál á íslenzkri tungu. Talgervlar á íslenzku munu gera okkur kleift að lifa áfram sem sérstök þjóð næstu áratugi.

Píratar móta stefnu sína frá grunni í rafrænum samskiptum og opnum fundum. Það er kallað „crowdsourcing“. Allir leggja í púkkið, sumu er hafnað og annað þróað áfram. Svipað og vinnubrögð stjórnlagaráðs, er samdi stjórnarskrá. Lausnarmiðuð vinnubrögð, allt er hugsað frá grunni. Ólíkt hefðbundnu stjórnmálarifrildi. Þar kemur hugsun og frumkvæði að ofan úr valdapíramídanum og handauppréttingar að neðan. Píratar hafa lagt mikla vinnu í til dæmis stjórnarskrána og kvótakerfið, en eiga eftir margt erfitt, til dæmis höfundarétt, svo og mörk persónuverndar og gegnsæis. Með sama framhaldi mæta þeir fullbúnir til næstu alþingiskosninga.

Væri ég að byrja lífið núna, yrði ferillinn snubbóttur. Fengi tæpast vinnu á fjölmiðli vegna gruns um sjálfstæða hugsun. Hvað þá að ég yrði ritstjóri blaða. Fréttir og skoðanir eru núna ókeypis, greiddar af hagsmunum. Borgarbækur mínar tíu hefðu ekki komið út og enn síður fjórtán bækur mínar um hrossarækt. Hefði að minnsta kosti ekki getað selt vinnuna, því stolið efni næst frítt á netinu. Þjóðleiðabókin stóra gæti að vísu komið út núna, en eftir örfá ár verða stolin sérkort ókeypis á netinu. Höfundar eiga lítinn séns árið 2015, þótt mér hafi verið allir vegir færir 1962. Kannski er ég af úreltri kynslóð síðustu höfunda.

Á vegginn hjá mér á fésbók koma fimm veftröll, er hrópa og færa engin rök fyrir neinu. Áhugamálin eru tvö, ofsahatur á flóttamönnum og ofurást á Ísrael. Tveir fyrirferðamestu hópar veftrölla á íslandi eru þarna á ferð, að sumu leyti sama fólkið. Oft er það tengt ofsatrúarsöfnuðum, sem í sinn hóp ræða meintar spár biblíunnar um yfirvofandi heimsendi. Í heild á fésbók eru þetta nokkrir tugir manna, sem fáir hætta sér út í hina almennu umræðu. Þeir halda sig sér á parti og porra hver annan upp. Við aðra er hægt að ræða, þótt menn séu ósammála. Í þeim tilvikum eru notuð rök og tengt í góðar heimildir, en ekki falsanavefi.

Það er rugl að gefa brottflúnum borgarfulltrúa kveðjugjöf í formi samþykktar á tillögu. Það er rugl að hugsa svoleiðis tillögu ekki áður en hún er lögð fram. Og það er rugl að láta svo að lokum taka sig á taugum út af þessu. Auðvitað á að reyna að forðast vörur frá Ísrael og ekki bara frá hernumdu svæðunum. Borgin þarf hið bráðasta að samþykkja endurbætta tillögu, ritskoðaða af borgarstjórn Kaupmannahafnar. Borgarstjóri getur ekki lagzt í svaðið fyrir skrímsli Ísraels, verður að geta staðið í lappirnar. Þegar réttlætið er þín megin, máttu aldrei lyppast niður. Við þurfum ekki að hafa asklok fyrir himinn, við erum menn.

Kostnaður ríkisins og Seðlabankans af IceSave fer senn í 30 milljarða króna með vaxtagreiðslum samkvæmt nýjum samningi við Breta og Hollendinga. Næsti IceSave samningur á undan, svonefndur Buchheit-samningur, hefði kostað 45 milljarða króna með vaxtagreiðslum. Sá samningur var felldur í þjóðaratkvæði. Segja má, að sú höfnun hafi minnkað IceSave tjónið um 15 milljarða. Vissulega er það mikið fé, en þó snöggtum minna en flestir ímynda sér. Flestir, sem sögðu nei við Buchheit, töldu sér trú um, að það þýddi: Við borgum ekki. Annað varð uppi á teningnum. Að lokum var svo samið og málinu þannig lokað á viðunandi hátt.

Hefðbundinn höfundarréttur er að því leyti úreltur, að hann verður ekki varinn á stafrænni öld. Tilraunir til að loka hýsingu eru dæmdar til að mistakast. Að vissu leyti er staðan orðin eins og hún var í gamla daga fyrir tæknibyltingu. Þá höfðu listamenn tekjur af söng eða hljóðfæraslætti eða upplestri í eintaki dagsins. Gátu ekki selt langtíma plötur, diska eða bækur. Ljóst er, að finna þarf nýjar leiðir til að fjármagna menningu. Pírötum hefur ekki tekizt að sýna sannfærandi leið til lausnar málsins. Langhundur Helga Hrafns Gunnarssonar mun ekki sannfæra fólkið. Þarna liggur mikilvægasta þróunarverkefni flokks pírata.

Íslenzka ríkið beitir 29 ríki viðskiptaþvingunum. Evrópusambandið hefur hvatt til þvingana gegn Ísrael. Samtök, sjóðir og sveitarfélög víða á vesturlöndum hafa gert slíkt hið sama. Sjá rækilega um það í WIKIPEDIA. Ætíð svarar Ísrael aðgerðum af fullri grimmd, alveg eins og það svarar öllu mótlæti. Í uppsiglingu eru þvinganir af hálfu fleiri borga í Evrópu. Ekki kemur á óvart, að Reykjavík geri slíkt hið sama. Tillagan var hins vegar illa orðuð og borgarstjóri fór á taugum í eftirleiknum. Ég sé ekki, að hún lagist neitt við að takmarka hana við hernumin svæði. Ísrael sjálft er skrímslið. Beita þarf þvingunum á þeim grunni.