Ólafur Ragnar Grímsson er sérfræðingur í hálfkveðnum vísum og óræðu spjalli til að rugla fólk í ríminu. Eins og véfréttin í Delfí, sem var svo myrk í máli, að sérstakan túlk þurfti til að skýra spádómana. Sumum finnst þetta fínt dæmi um pólitíska snilli í refskák. Mér finnst það vera dæmi um pólitíska forherðingu. Forkastanlegt er, að forseti tali torskiljanlegum tungum. Hann er greinilega að gera fólki erfitt við að stilla upp framboði til forseta. Væntanlega til að fleiri en einn fari fram gegn sér, svo að atkvæðin dreifist. Þannig slapp hann inn síðast. En þetta er ógeðfelld hegðun og engan veginn sæmandi þjóðhöfðingja.

Langur vegur er milli vísindalegra kannana og atkvæðagreiðslna, svo sem haldnar eru á Útvarpi Sögu. Þótt atkvæðagreiðslur séu ómarktækar, eru kannanir það alls ekki. Nokkur fyrirtæki kanna skoðanir Íslendinga með mismunandi tækni og komast öll að sömu niðurstöðu. Atkvæði hjá Sögu eiga ekki heima í þeim hópi. Eigandinn reynir að varpa skugga á heiðarlega vinnu með að draga þetta í sama flokk. Í úrtaki virkar slembilukka, en ekki í eigin vali hlustenda. Þetta er margreynt í áratugum af könnunum. Atkvæðagreiðslur heima í tölvu eru létt gaman, sem ekki má taka of alvarlega. Og sízt af öllu til að varpa skugga á alvöru vísindi.

Ég fór að efast um múslima fyrir áratug í eftirmálum teikningar af spámanninum í Jyllandsposten. Danskir múslimar fóru um lönd og æstu múslima til óeirða. Það voru landráð. Síðan var Theo van Gogh myrtur. Vestrænir múslimar mótmæltu fáir og fjöldi þeirra hló. Aðlögun múslima að Vesturlöndum var greinilega í steik. Sjáið Svíþjóð, þaðan hafa 300 ungmenni farið að berjast með Íslamska ríkinu. Múslimar í Svíþjóð halda að sér höndum. Fjölmiðlar þar í landi reyna að birta sem minnst um ofbeldi múslima, karlrembu og heiðursglæpi. Þöggunin þar er ekki í lagi. Þögnin er hávær hjá hinum meintu hógvægu múslimum. Endar með skelfingu.

Hef litla samúð með löggum, þótt sumir þar séu að ganga úr Flokknum sínum. Þar fer fúlt lið, sem lætur etja sér til óhæfuverka fyrir siðblindingja, til dæmis gegn gamlingjum í Gálgahrauni. Er á fullu við að framkvæma fíkniefnabann, sem er á útleið í siðuðum ríkjum. Hefur sjaldnast tíma til að sinna almenningi, svo sem í heimilisofbeldi. Þessir óánægðu Flokksmenn geta bara haft sína gremju út af fyrir sig. Án þess að fólk út í bæ þurfi að hossa undir þeim. Geri mér grein fyrir, að samkvæmt könnunum ber fólk traust til lögreglunnar. Ég tek ekki þátt í því. Vilji bófaflokkarnir ekki borga varðhundum sínum, er það ekki mitt mál.

Flokkurinn stækkar báknið með að ráða landsfundarfólk sem forstjóra óþarfra stofnana. Þar með vinnur flokkurinn tvennt. Stækkar báknið og getur svo hamast á kröfu um einkavinavæðingu þess. Útvegar rænulitlum flokksmönnum feitan bita, svo þeir þurfi ekki að keppa á vinnumarkaði. Með þessu tvennu hefur Flokkurinn byggt upp embættismannakerfi Flokksins og dómskerfi Flokksins. Alls staðar eru andverðleikar hafðir í heiðri. Búnar til 80 manna stofnanir, sem eru þjóðinni gagnslausar. Flokkurinn bendir síðan á skort á skilvirkni síns eigin kerfis og einkavinavæðir gróðavænlega einokunarþætti. Andverðleikar á tvöföldu blússi.

Fésbókin hefur síðustu daga verið full af sögum fólks af geðveiki sinni. Fram kemur, að 15-20% íslenzkra barna þjáist af einhverri tegund hennar. Þjóðfélagið tekur illa á móti, viðurkennir geðveiki bara með semingi sem sjúkdóm. Raunar er íslenzkt þjóðfélag mótdrægt andlegri heilbrigði. Það er grimmt, bófaflokkarnir eiga landið og stýra því. Afrakstri auðlinda er komið til Tortola. Fólk er rænt og ruplað við að reyna að koma þaki yfir höfuðið. Lágmarkslaun eru sultarlaun. Margir gefast bara strax upp og leggjast í kör, þegar þeir kynnast fárviðrinu. Ríkið á að selja nýja benzinn undan feita barninu og móta mannlegra samfélag.

Samkvæmt lýsingu Spilluga hefur hann fengið fyrirframgreidd eftirágreidd laun hjá Orku Energy. Ráðgjöfin innt af hendi 2011 og greidd 2012 fyrir vinnu ársins 2013. Efast um, að Spillugi skilji þetta sjálfur. Fyrirframgreidd laun teljast vera lán samkvæmt skattstjórum, sem þurfa greinileg að kíkja á Spilluga. Það furðulega er svo, að eftir ýmsar hundakúnstir kemur út slétt tala, 2.950.000 krónur. En svona fer, þegar menn kunna ekki fagið 2015 við að reikna afturábak, það sem þeir vildu óska að hefði gerzt 2011, 2012 og 2013. Launaseðill Spilluga er fávitalegasta fölsun, sem ég hef lengi séð. Er ráðherrann svona heimskur?

Stuðningur við móttöku landflótta múslima hefur HRUNIÐ í Evrópu, sérstaklega í Þýzkalandi. Fólk er að átta sig á, að mikill hluti múslima um allan heim lítur fyrst og fremst á sig sem múslima. Frekar en borgara viðkomandi ríkis. Fólk er að átta sig á, að vestrænir múslimar hafa verið daufir í gagnrýni á framferði Íslamska ríkisins í miðausturlöndum. Kom fyrst fram í deilunum um skopmyndir í Jyllandsposten og morðið á Theo van Gogh. En menn hafa samt ekki áttað sig á útbreiddri samstöðu vestrænna múslima fyrr en í sumar. Allt í einu er annar hver Þjóðverji orðinn andvígur viðtöku múslima. Fólk er bara orðið mjög hrætt.

Samkvæmt BLOGGI Ögmundar Jónassonar var ekki stuðningur meirihluta við tillögu um afgreiðslu stjórnarskrár fólksins í lok síðasta kjörtímabils. Hann segir, að tillögur stjórnlagaráðs hafi þurft á verulegum breytingum og lagfæringum að halda. Með þeirri skoðun vísar hann til þess, að hann sjálfur var verstur í flokki óvina stjórnarskrárinnar. Lykilþingmenn tveggja stjórnarflokka grófu undan stjórnarskrá fólksins, Árni Páll og Ögmundur. Báðir voru undir áhrifum lagatækna, sem voru fúlir yfir að fá ekki sjálfir að skrifa stjórnarskrá fyrir fólkið. Þessir ömurlegu þingmenn stóðu að samsærinu gegn stjórnarskrá fólksins.

Þaulsetur á matarhúsum gera mér kleift að upplýsa, að hruninu er lokið. Að vísu bara fyrir hálfa þjóðina. Hinn helmingurinn á ekki þátt í góðærinu, sjúklingar, aldraðir, öryrkjar og láglaunafólk. Enda telur ríkisstjórnin aumingja ekki vera þjóðina. En semsagt hinn heppni helmingur er farinn að flykkjast á veitingahús, einkum í hádeginu. Gerðist snögglega núna um mánaðamótin. Flestir góðir staðir, sem árum saman voru hálftómir í hádegi, eru þéttsetnir, þar af 80% heimafólk. Þjóðin, sú sem telur, hefur tekið gleði sína. Nú vantar pólitík, sem lyftir hinum helmingi upp í mannsæmandi kjör. Til þess höfum við nóg af auðlindum í túrisma, fiski og orku, en höfum vanrækt að innheimta auðlindarentu. Það er næsta skref. En fyrst þarf að sparka bófaflokkunum.

Sjálfstæðisflokkurinn á kerfið, æðstu embættismenn og dómara. Hæstiréttur er eign Flokksins. Kom í ljós, þegar rétturinn ógilti kosningar á nauðaómerkilegri tæknivillu. Nú er Flokkurinn að ráða nýjan hæstaréttardómara. Nýbúinn að ráða gagnslausan strák af landsfundi sem forstjóra óþarfrar Stjórnstöðvar ferðamála. Fólk getur rifið sig niður í rass út af slíku, en Flokknum er hjartanlega sama. Hann veit líka, að hann má þindarlaust ofsækja gamlingja án þess að þeir hætti að kjósa hann. Flokkurinn velur ýmist Framsókn eða Samfylkinguna sem hækju sér til aðstoðar. Skásta leiðin út úr þessu kerfi andverðleika er að kjósa Pírata.

Handfæraveiðar voru undirstaða mannlífs í sjávarplássum um allt land. Eru ekki stórtækar, því fiskurinn er veiddur á færi, en ekki í net eða vörpu. Vekja þarf handfæraveiðar aftur til lífs með því að leyfa þær. Svo að auðhringir hætti að geta rústað hverju plássinu á fætur öðru með fækkun vinnslustöðva. Setja má auðlindarentu á slíkar veiðar með uppboði handfæraheimilda og setja allan fisk á uppboðsmarkað. Handfæraveiðar eru öðrum þræði lífsstíll, sem gerir ekki kröfu til skjótfengins gróða. Henta vel fullorðum sjómönnum og grónum sjávarplássum. Lífið er meira en excel og jakkaföt og þvættingur um „hagvöxt“ og „framleiðni“.

Í síðustu þingkosningum hrundu ýmis eins máls framboð, þótt málefnin væru mörg hver góð. Fólk kaus ekki út á verkalýðshyggju eina sér, húmanisma, landsbyggð, Sturlu, þjóðrembu, stjórnarskrá eða hagsmuni heimilanna. Slík framboð kolféllu. Píratar slefuðu hins vegar inn og hafa löngu síðar fengið stóraukinn stuðning almennings. Píratar geta sameinað öll brýnu málin undir einum hatti. Þannig geta þeir rofið lögmálið um skammlífa nýflokka. Gera það raunar með markvissri málefnavinnu á ótal sviðum, sem þeir sinntu varla áður. Verða að forðast að drepa sig á að díla við bófaflokka valdsins um að plástra gamla stjórnarskrá.

Í Fréttablaðinu í dag upplýsir Illugi Gunnarsson ráðherra ekkert um spillingu sína umfram það, sem áður var upplýst. Vill ekki leggja fram kvittanir úr eigin heimabanka um greiðslu spillingar. Telur bankamál sín vera einkamál. Þar hefði viðtalið getað endað til að spara öllum tíma. Eins og ég hef oft sagt er persónuvernd á Íslandi einungis persónuvernd bófa. Aðferð við að neita að ræða spillt einkafjármál. Illugi getur ekki sannað neitt af því, sem hann fullyrðir. Við þurfum ekki að taka hann alvarlega í þessu frekar en öðru. Illuga verður áfram borinn saman við Þorgeirsbola, sem dregur spillingarhúðina eftir sér.

Við verðum að sætta okkur við, að fylgi bófaflokkanna er hætt að hrynja. Eftir standa 50.000 kjósendur Sjálfstæðisflokks og 20.000 kjósendur Framsóknarflokks. Þetta er rökhelda hratið, sem verður ekki bjargað, þynnsti þriðjungurinn. Mesti óvinur bófaflokkanna er hér eftir seinvirki maðurinn með ljáinn. Bófaflokkarnir eru nærri fylgislausir meðal unga fólksins. Njóta hins vegar töluverðs fylgis fólks á grafarbakkanum. Einmitt fólksins, sem bófarnir misþyrma mest. Um þetta gamla fólk gildir gamla spakmælið um, að þangað leitar klárinn, sem hann er kvaldastur. Það mun því taka manninn með ljáinn áratug að afnema bófaflokkana.