Hér þarf fátt að breytast í kjölfar hryðjuverkanna í París. Venjulegt fólk ber ekki ábyrgð á þeim. Við tökum við flóttafjölskyldum eins og áður var ráðgert. En munum sníða augljósa vankanta af fjölmenningarstefnu. Viljum ekki sharia, karlrembu, feðraveldi, búrkur, bókstafstrú, miðaldir. Í Róm ertu sem Rómverji, í Reykjavík ertu sem Reykvíkingur. Erlendis eru fjölmörg dæmi um, að róttækir wahabítar skilji ekki eða heyri ekki fræðslu um þau efni. Við munum því ekki flytja inn wahabíta og allra sízt klerka þeirra. Fjölmenningin mun ekki fela í sér neina sambræðslu við forneskjuna. Við gefum ekki eftir veraldlegu hefðina.

Um alla Evrópu mun hatur á múslimum magnast í kjölfar hryðjuverkanna í París. Áður voru hatursflokkar búnir að auka fylgið upp í 20-25% í kosningum og taka völdin í Ungverjalandi og Póllandi. Hatur mun enn magnast, einkum í Frakklandi. Flóttafólk mun líða fyrir hryðjuverkin. Schengen-frelsið er fyrir bí og Evrópa rambar eins og drukkinn Jean-Claude Juncker. Angela Merkel hefur orðið fyrir rothöggi. Hatursfylgið er líklega komið í 30-35% víðs vegar um álfuna. Hér er staðan skárri, við erum ekki gefin fyrir fordóma. En almenningi verður ekki um sel og löggan heimtar forvirkni. Fjölmenningarstefna lifir ekki af svona nætur.

Enn er allt í óvissu um fjölda látinna í hryðjuverkum róttækra múslima í París. Opinbera talan stendur núna kl.7 í 120 manns á sex stöðum. Flestir voru felldir á rokktónleikum í Le Batacian höllinni. Landamærin eru lokuð og herinn er í viðbragðsstöðu. Nokkrum tímum síðar kveiktu andstæðingar múslima í flóttamannabúðunum í Calais, þar sem voru 6000 manns. Eldar virðast loga þar, en ekki er vitað um neitt manntjón. Sem betur fer eru engar fréttir af öðrum hefndaraðgerðum í Frakklandi. Þetta er nýja stríðstegundin. Sá sem fer halloka á vígvelli, flytur stríðið til almennings í óvinaríki. Eins og Tsétsénar gerðu í Moskvu árið 2002.

Allt bendir til, að hryðjuverkin í París séu verk róttækra múslima. Sé svo, má segja, að þriðja heimsstyrjöldin sé hafin. Milli Evrópu og íslamista. Frakkland hefur lokað landamærum. Önnur lönd munu loka landamærum fyrir múslimum og reka fjölskyldulausa flóttamenn til síns heima. Tími fjölmenningar er liðinn og í staðinn risinn stríðstími haturs á múslimum. Að venju koma slík stríð einkum niður á meinlausu fólki. Hryðjuverk og afleiðingarnar gera það alltaf. Flokkar múslimahaturs munu sækja bratt í kosningum og breyta viðhorfum heilla ríkja til trúarbragða múslima. Moskum wahabíta verður lokað og söfnuðum þeirra tvístrað.

Sé engin gögn um, að byggingareglur séu hér of strangar. Húsnæði er svo stór þáttur í efnahag fólks, að fáir hafa efni á að lenda í göllum vegna nízku við smíði húss, t.d. v. jarðskjálftavarna og einangrunar. Slá mætti þó af kröfum um geymslur og fleira þess háttar. Stóra hrunið 2008 stafaði að töluverðu leyti af skorti á opinberu eftirliti með bönkum. Reglur halda uppi varanlegum gæðum í nýju húsnæði. Ég byði ekki í villta vestrið, sem gæti komið svakalega í hausinn á fólki, er kaupir köttinn í sekknum. Gott væri líks að fá ábyrgar tölur um jaðarkostnað við þá einstöku liði í reglugerð, sem sumir sjá ofsjónum yfir.

Viðskiptablaðið og Ásdís Halla Bragadóttir ræða einkarekna heilsuþjónustu eins og gagnrýnin snúist um, að hagnaður sé illur. Gagnrýnin snýst bara alls ekki um það. Hún snýst um, að Sinnum fyrirtæki Ásdísar Höllu veiti lakari þjónustu en hægt er að þola. Fólk grætur undan henni. Og um að hún geri það fyrir hærra verð en þjónustan mundi kosta, ef ríkið veitti hana. Gagnrýnin snýst bara um, að Sinnum sé pilsfaldafyrirtæki undir vernd Steingríms Ara Arasonar öfgaklerks. Raki inn arði með viðbótarkostnaði fyrir samfélagið. Sinnum er dæmi um ástand, sem verður landlægt, þegar bófarnir hafa einkavætt heilsuna. Landspítalinn sveltur og nýjungar settar upp í okurbúlum fyrir auðuga. Slíkt verður stöðvað.

Össur Skarphéðinsson hefur talað, undir rós að vísu. Og honum er nóg boðið. Í Fréttablaðinu minnir hann á, að Árni Páll Árnason sé skipper, sem ekki fiskar. Össur býðst til að sitja í stjórn undir forsæti pírata. Kallar sig meira að segja heiðurspírata. Gamli jaxlinn er raunar eini kratinn, sem nennir að rífast við pírata á vef þeirra. Aðrir kratar fatta ekki, að þar er lífið og umræðan. Oft er meiri seigla í þeim gömlu en sætabrauðsdrengjunum. Nú liggur það eitt fyrir, að Árni Páll víki úr vegi eigin flokks. Gefi krötum færi á að arka í átt til nútímans. Össur verður án efa tilbúinn til að lóðsa til bráðabirgða.

Heil Íslandsæfing Atlantshafsbandalagsins með löggunni og gæzlunni snerist um að gæta okkar fyrir „umhverfisverndar-hryðjuverkamönnum“. Hugarfar stjórnenda löggunnar og gæzlunnar snýst einmitt um, að náttúruvinir séu öfgahópar. Við það hugarfar er Eyrún Eyþórsdóttir illa fær um að setja upp sérstaka deild til „að fylgjast með uppgangi öfgahópa“, það er náttúruvina. Ég vara við öllum slíkum tilraunum til að glæpavæða náttúruvernd að undirlagi Landsvirkjunar, Landsnets og skyldra safnaða. Alþingi verður að hindra öfgatrúarflokka í að þjóna geði sínu með þessum hætti. Hafa þarf strangt eftirlit með Eyrúnu í öfgadeildinni.

Viðreisnarflokkur Benedikts Jóhannessonar boðar aukna einkavæðingu í menntun. Ég fékk gæsahúð. Þar er flokkur, sem hyggst lifa samhliða þeim flokki, sem er að keyra menntun þjóðarinnar fjandans til. Þurfum ekki fleiri slíka. Þótt annar sé með Evrópu og á móti krónu og hinn á móti Evrópu og með krónu. Komi báðir flokkarnir fólki á þing, munu þeir óðar semja um samstarf um að kýla fátæklinga í verri klessu. Viðreisn og Flokkurinn eru jafngild afsprengi trúarofstækis Hannesar Hólmsteins, síamstvíburar í „græðgi er góð“. Þeir skipta með sér 25% sauðahjörð kjósenda. En þeir fiska væntanlega lítið á dýpri og fengsælli miðum.

Lög um eignarétt og ferðarétt á óræktuðu landi eru ættuð úr elztu lögum fyrstu íbúa landsins. Þar er nákvæmlega fjallað um réttindi og skyldur hvors aðila. Eru farsæl sátt milli tveggja sjónarmiða. Síðan hafa lögin verið á þann veg um aldir til þessa dags. Nú er þingnefnd hins vegar sammála um að breyta. Þingmenn fallast í faðma. Breytingin er samt fáránleg og alþingi til skammar. Samkvæmt henni geta landeigendur bannað labb um óræktað land. Vélknúnum ökutækjum er þar á ofan bönnuð ferð um öræfaslóðir. Af þessu frumhlaupi mun leiða langvinnt og harðsnúið ósætti. Ferðafélagið, Samút, 4×4, Alpaklúbburinn og Útivist eru uppi á háa C í dag. Það þurfti fáránlegt rugl til, að þingmenn gætu fallizt í faðma.

Sem þáttur í samfélagi andverðleika reynir Vinnumálastofnun að ljúga að okkur, að allt sé í lagi hjá starfsmannaleigum. Alþýðusambandið hefur bent á, að svo er ekki. Starfsmannaleigur eru beinlínis stofnaðar til að draga fólk út úr samningsbundnum launum og setja á lægri skítalaun. Þær nota einkum útlenda þræla í stað fólks í stéttarfélagi. Þrælarnir eru berskjaldaðir fyrir svindli, því að þeir skilja ekki tungumálið og eru hræddir við ríkiseftirlitið. Leiðir til undirboða á vinnumarkaði. Og til þeirrar fátæktarvæðingar, sem ríkisstjórn andverðleika þráir svo heitt. Vinnumálastofnun vill bara ekki að sinna vandanum.

Á þessu ári er í fyrsta skipti hafinn landflótti, án þess að hann fylgi beint í kjölfar kreppu. Alls fluttu 3.210 íslenskir ríkisborgarar frá Íslandi á fyrstu níu mánuðum ársins, um 1.130 fleiri en fluttu til þess. Rosalegar tölur í litlu samfélagi. Sjúkrageirinn er kominn á flot vegna fólsku ríkisstjórnar greifanna. Andverðleikakerfið íslenzka birtist á öllum sviðum. Flestir ríkisforstjórar eru handvaldir af bófum með tilliti til getuleysis. Menntaðir flykkist til landa, þar sem hæfni er metin að verðleikum. Ísland liggur lamað eftir í skítnum. Við erum fórnardýr taumlausrar hægri stefnu andverðleika, sem sogar burt allan dug.

Við höfum lengi vitað, að Seðlabankinn er rekinn á brauðmolatrú eins og aðrir talsmenn greifanna. Ekki þarf stórfellda vitsmuni til að róa fram í gráðið og endurtaka möntruna í síbylju. Þessir telja, að öllu fé sé bezt fyrir komið hjá greifum, sem sáldri brauðmolum niður til skrílsins. Hagvöxtur mælist beztur, þegar launum er þrýst allra mest niður. Klerkarnir vilja ekki skilja tilgang samfélags. Sjaldgæft er þó, að biskupar trúarbragðanna séu svo utangátta að játa markmiðið. Þórarinn G. Pétursson er þó nógu vitgrannur til að segja upphátt: „Það sem við erum að gera er að draga úr ráðstöfunartekjum heimila.“

Smám saman er að koma í ljós, að stöðugleikaframlagið gefur í aðra hönd aðeins brot af áður ráðgerðum stöðugleikaskatti. Hann átti að nema 857 milljörðum, en framlagið mun aðeins útvega 260-345 milljarða. Þar af meiriparturinn í eignum, en ekki í reiðufé. Þetta kemur fram í trúverðugum útreikningi Fréttablaðsins í dag. Mér sýnist ljóst, að spuni ríkisstjórnarinnar jafngildi landráðum. Felur í sér meira tjón en illræmd stjórn Davíðs á Seðlabankanum og er þá mikið sagt. Stafar auðvitað af, að einkavinir undir pilsfaldinum eru atkvæðamiklir í hópi hrægammasjóðanna, sem eiga föllnu bankana. Landráðin eru skandall aldarinnar.

Lengst af lét ég skipulögð trúarbrögð eiga sig, enda létu þau mig í friði. En íslam hefur farið í taugarnar á mér síðan múslimar fóru að ofsækja rithöfundinn Salman Rushdie 1989. Pirringurinn jókst eftir birtingu skrípamynda af vitfirrta spámanninum í Jyllandsposten 2005. Árásin á Charlie Hebdo 2015 opnaði svo augu mín fyrir, að íslam er ekki í lagi. Þá á ég ekki bara við ISIS og wahabismann frá Sádi-Arabíu, versta villimannaríki heims. Það hefur nefnilega komið í ljós mikill undirliggjandi stuðningur meðal múslima við allan þennan brútalisma. Ég er því farinn að vara við óheftum innflutningi vandamála af þessu miðaldatagi.