Sykurbergur fjarlægði Össur Skarphéðinsson af fésbókinni í tæpan sólarhring í vikunni. Ég sé þó ekki, að auðjöfurinn eigi vald til ritskoðunar á pólitískri umræðu hér á landi. Þótt hann bæðist afsökunar og opnaði skjótt aftur, er málið allt hið versta. Áður hefur komið fram, að bófaflokkar geta gert slíka aðför að fésbókurum. Mál Össurar er ekki einsdæmi. Kallar á faglega rannsókn á, hvernig það gerist og hvernig á að bregðast hratt við. Við þurfum að hafa aðgengilegar upplýsingar um hraðan gang kvartana á hendur Facebook. Ritskoðun Zuckerbergs getur verið hættuleg á tímum sviptinga í pólitík og í aðdraganda kosninga.

Undanfarið hafa birzt undarlegar excel töflur og gröf, sem virðast sýna gott ástand. Hentugt fyrir þá, sem annars þyrftu að horfa á veruleikann. Við munum eftir dæmi frá Hagstofunni um nánast engan landflótta ungs fólks. Dæmum frá Guðlaugi Þór Þórðarsyni um frábæra stöðu Landspítalans. Bent hefur verið á, að allt eru þetta falsaðir og rangir útreikningar. Nú síðast eru tölur í Mogga um, að laun lækna og hjúkrunarkvenna séu hærri hér en á norðurlöndunum. Fréttin er raunar unnin undir sérstakri ritstjórn Samtaka atvinnulífsins. Talnafalsanir eru ört að eflast. Skynsamlegt er fyrir fólk að horfa frekar á raunveruleikann.

Kristrún Elsa Harðardóttir titlar sig sem „talsmann hælisleitenda“. Villir á sér heimildir. Þótt hún hafi unnið hjá hinni frægu Útlendingastofnun, getur hún ekki verið eða hafa verið talsmaður hælisleitenda. Ég veit ekki betur en, að eini formlegi „talsmaður hælisleitenda“ sé Arndís A. K. Gunnarsdóttir hjá Rauða krossinum. Samt flaggar Kristrún Elsa þessu tignarheiti í fésbókarfærslu, sem Mogginn tók upp á sína arma. Þar fer hún með varnir fyrir Útlendingastofnun í frægu máli hælisleitenda frá Albaníu. Endurtekur þuluna um, að „the computer says No“. Skrítnast er þar, að hún skuli veifa fölsku flaggi um virðingu sína.

Kári Stefánsson er hrokagikkur og þrasari. Um leið er hann fagmaður á sínu fagi og veit meira um heilbrigðismál en Kögunarbarnið. Kári hefur gert margt gott á sínum ferli, meðal annars gaukað rándýru tæki að Landspítalanum. Kögunarbarnið er hins vegar ekki bara próflaust, heldur hæfileikalaust með öllu. Pabbi þess keypti stjórnmálaflokk handa því og síðan ofsalaug barnið sig inn á ginnkeypta kjósendur. Höfum síðan þurft að þola heimsins versta forsætis í hálft þriðja ár. Kögunarbarnið vinnur lítið og þrasar mest, þá sjaldan það er á ferli. Þegar það er komið í ritdeilu við Kára, er hætt við, að það fari sér að bráðum voða.

Með herðingu hengingarólar um háls Landspítalans framselur fjárlagavaldið vald um líf og dauða fólks í hendur Frankenstein hjá Sjúkratryggingunum. Mestum tíma ver hann í að fleygja í ruslafötuna öllum kvörtunum yfir sjúkrahóteli Ásdísar Höllu Bragadóttur. Hann ákveður svo, að sextíu manns á ári fái aðgerð til þess að fyrirbyggja gáttatif og með því heilablóðfall. 150 manns bíða á biðlista og fá varanlega fötlun. Á sama tíma hlaupa hjúkrunarfræðingar milli bráðaverka og eru svo kærðar fyrir manndráp af gáleysi. Felur í sér, að Landspítalinn er ekki norrænt hátæknisjúkrahús, heldur sjúkraskýli á átakasvæði í þriðja heiminum.

Silkihúfufundurinn í París er öðrum þræði vettvangur mengunarfyrirtækja til að ljúga upp ævintýrum um sinn græna lit. Eitt þessara fyrirtækja er Landsvirkjun, sem notar fundinn til að auglýsa íslenzka orku á spottprís gegnum kapal. Á sama tíma eru umhverfissinnar teknir til fanga og þeim meinað að tjá sig. Nær væri, að Ísland notaði orku sína til að spara olíu í bílum og öðrum flutningatækjum. Loka ætti álverum í stað þess að spilla náttúrunni í þágu kapals til Evrópu. Nýta þá orku til að gera Ísland að grænu ríki. Silkihúfufundurinn í París staðfestir, að stjórnir ríkja jarðar hafa engan minnsta áhuga á umhverfisvernd.

Ólöf Nordal er óhæf. Mætir í sjónvarp til að vorkenna sjálfri sér fyrir storm, sem hún réði ekki við. Kennir Kristínu Völundardóttir um illvirkið. Sú er líka óhæf, veit ekki að heilsukerfi Albaníu er einkarekið mútufélag. Annar pólitíkus stimplaði sig óhæfan sama dag, Ásmundur Friðriksson. Með bakþanka vegna öryrkja og aldraðra, en bara með bakþanka. Hann og Ólöf gefa í skyn, að einhvers staðar innra með sér leynist heiðarleg taug. Vond staða í bófaflokki sjálfstæðismanna. Kristín í Útlendingastofnun minnir á Steingrím Ara Arason í Sjúkratryggingum. Hann er þar til að vernda albanskt sjúkrahótel Ásdísar Höllu. Nytsamur bjáni.

Sorgarsaga Ríkisútvarpsins byrjaði með Þorgerði Katrínu Gunnarsdóttur ráðherra. Stofnunin var áður í skuldlausu húsnæði og átti hundruð milljóna í sjóði. Aðild ráðherrans fólst í að neita að viðurkenna, að flutningur í Efstaleiti kostaði þrjá milljarða. Sú upphæð var hengingaról, sem síðan var látin herðast um háls Ríkisútvarpsins. Ekki hefur síðan sézt til sólar þar á bæ. Það er bara vegna pólitískra ákvarðana um, að láta skulda- og vaxtabyrði vaxa og kæfa stofnunina. Nú sér Illugi Gunnarsson ráðherra um að keyra stofnunina í þrot. Þetta er allt þáttur í markvissri rústun ríkisrekstrar til að rýma fyrir einkavinavæðingu.

Ekki kemur á óvart, að ráðherrar og þingmenn Sjálfstæðisflokksins puði við að rústa ríkiskerfinu. Landspítalinn hefur lengi verið í sigtinu. Þeir eru að rýma til fyrir framtaki einkavina Flokksins. Hins vegar kemur spánskt fyrir sjónir, að Framsókn skuli yfirgefa norrænu miðjuna og færast yfir í sömu öfgar. Vigdís Hauks er ofsatrúaðri brauðmolasinni og einkavæðingarsinni en sjálfstæðismenn. Þeir beita þó kreddunni bara í ábataskyni. Þingmenn Framsóknar þykjast sumir hverjir vera á miðjunni. Rétta þó ævinlega upp hendi, þegar greidd eru atkvæði með árásum á þá, sem minnst mega sín. Nöfn þeirra eru brennd í vitund kjósenda.

Íbúðalánasjóður hyggst ekki selja almenningi þær 504 íbúðir, sem verða til sölu um áramótin. Hann setur íbúðirnar í stóra pakka, ekki ætlaða almenningi, heldur íbúðabröskurum og einkum leiguhákörlum. Dæmin sýna, að hákarlar sprengja upp verð á slíkum íbúðum um þriðjung eða meira. Aðferð sjóðsins stafar af, að forstjórinn er þungt haldinn af öfgum brauðmolatrúar Sjálfstæðisflokksins. Hún snýst um, að hossa ríkum á kostnað fátækra. Íbúðirnar voru áður í eigu fólks, sem réði ekki við okur sjóðsins. Nú falla þær í hendur enn verri okrara, sem hafa með kennitöluskiptum og annarri aðstoð glæpabanka komizt yfir peninga.

Múslimar í Evrópu hafa algera sérstöðu meðal nýbúa. Allur þorri þeirra aðlagast ekki. Kannanir sýna, að yfir 80% múslima í Vestur-Evrópu líta á sig sem múslima fremur en sem borgara. Múslimar í Evrópu hafa flúið eða eiga foreldra, sem hafa flúið miðaldir í heimi Íslams. Vilja samt flytja með sér þessar sömu miðaldir. Helmingur múslima í Vestur-Evrópu tekur sharia fram yfir landslög. Karlremba og kvenhatur blómstrar. Fjölmennur minnihluti þeirra er hallur undir ýmislegt í stefnu íslamista. Mundi skjóta skjólshúsi yfir eftirlýsta terrorista. Öfgafull fjölmenningarstefna norðurlandanna jafngildir sjálfsvígi evrópska lýðræðisins.

Einkareknum skólum í Svíþjóð og Bretlandi hefur sumpart gengið vel. Þeir nota ávísanir ríkisins á hvern nemanda og leggja þar á ofan skólagjöld, sem ríkir foreldrar borga. Til að friða vonda samvizku bjóða þeir oft fátækari nemendum fría skólavist. Þeir nemendur hafa lent í einelti, að minnsta kosti í brezkum einkaskólum. Í sænskum einkaskólum eru nokkur dæmi um hina íslenzku Hraðbraut. Skólar taka ávísanir ríkisins, ráða slaka kennara á undirkaupi, veita slaka kennslu. Soga arð í eigin vasa og heimta, að ríkið dragi sig að landi. Eða dólgarnir flýja land í miðju kafi. Og ætíð efla einkaskólar stéttaskiptinguna.

Harmsögur úr heilsugeira eru dagleg staðreynd. Tölur úr excel eru hins vegar ekki staðreynd, heldur ímyndun, byggð á vali. Upphaf og endir ferils eru valdir punktar. Fast gengi eða laust eru valdir punktar, líka aðferðir við umreikning á lausu gengi yfir í tegund af föstu gengi. Fjármagnskostnaður er fyrra val um að sauma að stofnun og er ekki rekstrarkostnaður. Skortur á viðhaldi og endurnýjun tækja á sinn þátt. Í spítalarekstri þarf líka að huga að mannfjölda, aldurssamsetningu og aðkomu ferðamanna. Slíkt gerir excel að sýndarveruleika í töflu og grafi. Harmsögur úr heilsugeira eru hins vegar hin daglega staðreynd.

Það er allt í lagi með trú, til dæmis barnatrú, ef hún er ekki gerð kórrétt í trúarbrögðum. Þau verða ætíð að spennitreyju. Verða beinlínis hættuleg, ef um þau er smíðuð heilög ritning. Hún verður smám saman margra alda gömul. Gamla testamentið er á köflum geðveik lesning og eins er kóraninn. Slíkir textar eru forneskja, sem eiga ekkert erindi í nútímann. Og sem heilög ritning og jafnvel efni í möntrur eins og Allahú Akbar, er hún hreint eitur. Ég fæ gæsahúð, þegar ég heyri farið með texta sem heilaga ritningu og síðan bullað út frá textanum. Svo sem gert er í kirkjum og moskum enn í dag. Bezt væri, að því færi að linna.

Landvættirnir svöruðu einæðingum Landsnets í nótt. Sýndu fram á, að brjálað veður á hálendinu mundi rústa Sprengisandslínu. Nema hún verði öll lögð í sand. Sýndu fram á, að náttúruöflin eru sterkari en frekjur orkumálanna. Áróðurshjörð Landsnets harðneitar að viðurkenna jarðstrengi, þótt óháðir verkfræðingar hafi sýnt fram á hagkvæmni þeirra. Þegar hjörð er rökheld, þýðir ekki að reyna að hafa vit fyrir henni með rökum. Sýnikennsla náttúruaflanna er öflugri. Hana skilja allir, þótt hjörðin berji áfram höfðinu við steininn. Sársaukaminna væri fyrir hana að stinga höfðinu í Sprengisandinn. Og mundi spara henni háðsglósur.