Notendur vefmiðla vilja ekki þurfa að velta fyrir sér, hvernig þeir eiga að komast um vefsvæði. Þeir vilja, að siglingafræðin sé augljós, þeir týnist ekki, þótt þeir fari á kaf í svæðið. Á góðum vefjum rata menn vel fram og til baka. Og finna allt, hvort sem þeir vafra eða leita. Notendur vilja beita hugsun við notkun efnis, en ekki við notkun á hnöppum og krækjum og flipum á vefsíðum. Þeir vilja heldur ekki þurfa að pæla í leit. Tæknin á að lagast að manninum, en maðurinn ekki að tækninni. Þetta er einföld regla. Alveg eins og önnur regla, sem segir: Láttu mig ekki þurfa að hugsa.
