€ Íslendingar munu smám saman taka við um 400 störfum af bandarískum varnarliðsmönnum, einkum við radarstöðvarnar.
€ Varnarliðið mun auka húsakost sinn nógu mikið til þess, að allir varnarliðsmenn geti búið á vallarsvæðinu sjálfu.
€ Almennur flugrekstur verður aðskilinn frá varnarstarfi á Keflavikurflugvelli á kostnað Bandaríkjamanna, sem m.a. aðstoða við fjármögnun nýrrar flugstöðvar.
Þetta eru þrjú meginatriðin í samkomulaginu, sem Einar Ágústsson utanríkisráðherra og Sisco aðstoðarutanríkisráðherra Bandaríkjanna náðu í varnarmálum Íslands í Washington í gær. Verður síðar haldinn fundur beggja aðila í Reykjavík, þar sem gengið verður í einstökum atriðum frá breytingum þeim, sem samkomulag gærdagsins felur í sér.
Samkomulag utanríkisráðherranna er í algeru samræmi við stefnu hinnar nýju ríkisstjórnar okkar í varnarmálum. Þar með er bundinn endir á langt tímabil öryggisleysis og óvissu í einu mikilvægasta hagsmunamáli Íslendinga.
Aðalatriðið í samkomulaginu er, að varnarmáttur varnarliðsins verður í engu skertur, starfsmönnum við varnir fækkar ekki, heldur taka Íslendingar smám saman við 400 störfum af Bandaríkjamönnum.
Hraði þessarar breytingar fer annars vegar eftir því, hve ört Íslendingar geta látið þennan mannafla í té, og hins vegar eftir því, hve langan tíma tekur að þjálfa hann.
Þetta má auðvitað ekki gerast svo hratt, að það valdi skorti á mannafla í atvinnulífinu. En jafnframt verður þetta mikilvægur þáttur í eflingu tækniþekkingar þjóðarinnar og skilnings hennar á eigin ábyrgð í öryggismálum sínum.
Mikill húsnæðisskortur hefur lengi verið í þeim byggðarlögum, sem næst eru Keflavíkurflugvelli. Með flutningi varnarliðsmanna inn á sjálft vallarsvæðið myndast möguleikar á aðstreymi fólks til eflingar útgerðar, fiskvinnslu og annarra atvinnugreina á Suðurnesjum.
Íslendingum hefur lengi verið þyrnir í augum, að varnir og almennur flugrekstur hafa blandazt saman á Keflavíkurflugvelli. Nú verður unnið að því að skipta vallarsvæðinu í tvennt, annars vegar í lokaða varnarstöð og hins vegar í opna flugstöð. Þegar þeirri skiptingu er lokið, munu Íslendingar alls ekki koma inn á svæði varnarliðsins, þegar þeir fljúga utan.
Flugstöðin á Keflavíkurflugvelli er ákaflega ófullkomin og óþægileg, auk þess sem hún er fremur ömurleg landkynning. Ný flugstöð mun gerbreyta þessu ástandi. Þar verður unnt að beita nútímatækni í allri þjónustu við farþega og flugvélar.
Hin bætta aðstaða mun vafalítið laða að sér auknar millilendingar í fluginu yfir Atlantshafið. Og jafnframt mun hún hafa jákvæð áhrif á hinn fjölmenna hóp, sem ekki hefur önnur kynni af Íslandi en stutta viðkomu í flugstöðinni.
Árangurinn, sem felst í samkomulaginu við Bandaríkjamenn, er tvöfaldur. Annars vegar hefur verið tryggður framgangur áhugamála Íslendinga í sambandi við rekstur Keflavíkurflugvallar. Og hins vegar hefur öryggishagsmuna þjóðarinnar verið gætt til fullnustu.
Jónas Kristjánsson
Vísir
