“Ég verð að játa það hreinskilnislega, að útkoman á rekstrl félagsins á fyrstu mánuðum nýstofnaðs dagblaðs er mér algert undrunarefni. Ég fæ raunar ekki skilið, hvernig hægt er að ná slíkum árangri við þær aðstæður, sem þurft hefur að vlnna við.”
Þetta sagði Björn Þórhallsson viðskiptafræðingur og stjórnarformaður Dagblaðsins meðal annars í skýrslu þeirri, er hann flutti á aðalfundi fyrirtækisins á föstudaginn um rekstur blaðsins í fyrra.
Þar kom fram, að rekstrartap Dagblaðsins þá fjóra mánuði, sem blaðið starfaði í fyrra, nam þremur og hálfri milljón króna af sextíu milljón króna veltu. Þetta er í rauninni mjög lítið tap, ef höfð er hliðsjón af því, að í veltu fyrstu ævimánaðanna er jafnan fólginn mikill stofnkostnaður.
Velta blaðsins nam um fimmtán milljón krónum á mánuði síðustu mánuði árins Í fyrra. Ljóst er, að veltan verður um 25 milljón krónur á mánuði í ár, enda hafa tekjur blaðsins vaxið gífurlega frá því í fyrra. Munar þar mest um áskriftir og auglýsingar, en lausasala hefur einnig aukizt verulega.
Á aðalfundinum kom fram, að hlutafé Dagblaðsins er orðið 75 milljónir króna eða 25 milljónum meira en upphaflega var ráðgert. Þetta mikla hlutafé kemur sér vel, því að blaðið þarf að afla sér eigin húsnæðis og tækja. Blaðið á nú þegar tvær verðmætar fasteignir, er verðtryggja hlutafé fyrirtækisins.
Eitt brýnasta verkefnið í rekstri Dagblaðsins er að koma starfseminni í sómasamlegt húsnæði og er stefnt að því, að svo geti orðið í haust. Vonandi verður árangurinn af betri vinnuaðstöðu sá, að Dagblaðið batni og þjóni lesendum sínum betur.
Allur þorri starfsmanna Dagblaðsins á hlutabréf í Dagblaðinu. Algengastir eru 200-300 þúsund króna hlutir í eigu starfsmanna. Samanlagðir hlutir starfsmanna eru rúmlega helmingur af öllu hlutafé fyrirtækisins.
Það er líka bundið í stofnskrá Dagblaðsins, að einn starfsmaður að minnsta kosti, fyrir utan framkvæmdastjóra og ritstjóra, skuli sitja í aðalstjórn fyrirtækisins. Þar er á ferðinni athyglisverð tilraun til atvinnulýðræðis, sem fróðlegt verður að fylgjast með í framtíðinni.
Dagblaðið er sérdeilis fjölmennt hlutafélag. Mikill fjöldi lesenda þess á eitt þúsund króna hlutabréf. Slík bréf eru 5000 talsÍns og geta gengið kaupum og sölum án afskipta stjórnar félagsins. Fyrir utan þessa hluthafa eru rúmlega 200 stærri hluthafar í fyrirtækinu. Sennilega er aðeins til eitt fjölmennara hlutafélag á landinu, Eimskipafélag Ítslands.
Mikill einhugur ríkti á fyrsta aðalfundi Dagblaðsins á föstudaginn. Fundurinn einkenndist af víðtækri samstöðu hlutafjáreigenda úr hópi lesenda og starfsmanna. Velunnarar blaðsins mættu þar fjölmennir og voru starfsmönnum hvatning til aukinna átaka við útgáfu næststærsta dagblaðs á landinu.
Af upphafinu má ráða, að framtíð Dagblaðsins sé vel tryggð.
Jónas Kristjánsson
Dagblaðið
