Hér í blaðinu á föstudaginn vakti Jón Einarsson lögfræðingur athygli á klórgasmálinu í Kópavogi. Þar hefur bæjarstjórn langtímum verið að reyna að fá verksmiðju til að hætta að framleiða banvænt klórgas í miðju íbúðahverfi. Fjölmiðlar hafa fjallað með hangandi hendi um þetta mál, sem varðar öryggi almennings á stóru svæði. Þeir hafa þeim mun betur fylgzt nótt sem nýtan dag með hefðbundinni og þjóðlegri smalamennsku þar í bæ, er kunnir góðbændur hafa smalað framsóknarkonum í rétta dilka. Sá hversdagslegi atburður fékk margfalt meiri athygli en eitrið í íbúðahverfinu.
