Heldur hefur birt yfir samningaviðræðum aðila vinnumarkaðsins í dymbilvikunni. Sáttasemjari lagði á mánudag fram tillögu um 4.500 króna láglaunabætur, sem deiluaðilar eru nú að skoða.
Svo var að heyra á samningamönnum í gær, að betri horfur en áður væru á samkomulagi fyrir 7. apríl, þegar verkföllin, sem Alþýðusambandið hefur hvatt til, eiga að hefjast. Hugsanlegt er, að samkomulag takist til bráðabirgða um láglaunabætur:en það verði síðan endurskoðað í haust, þegar séð er,hvernig efnahagsþróunin hefur orðið í millitíðinni.
Skammtímasamningar eru að vísu ekki til fyrirmyndar. En á þeim verðbólgutímum, sem verið hafa í hálft annað ár, er eðlilegt, að menn séu hræddir við samninga til langs tíma. Alténd væri mikils virði fyrir sjúkt efnahagslífið, ef vinnufriður héldist í vor og sumar.Sá friður getur hæglega stuðlað að nokkrum bata í þjóðarbúskapnum.
Vinnufriðurinn, ásamt samdrætti þeim í ríkisbúskapnum, sem efnahags- og fjármálafrumvarp ríkisstjórnarinnar gerir ráð fyrir, munu sameiginlega stuðla að framhaldi á blómlegu atvinnuástandi og hindra samdrátt í einkaneyzlu láglaunafólks. Það er því til mikils að vinna fyrir báða deiluaðila að ná samkomulagi á grundvelli tillögu sáttasemjara.
Það,sem raunverulega gerist, ef slíkt samkomulag tekst, er, að sneið ríkisins af þjóðarkökunni minnkar, en sneiðar atvinnuveganna og láglaunafólks stækka. Í því ástandi, sem verið hefur í efnahagslífinu, er slík tilfærsla .blátt áfram nauðsynleg, ef stöðva á þróunina í átt til kreppu.
Næstum hvarvetna meðal nágrannaþjóða okkar ríkir mikið og vaxandi atvinnuleysi með tilheyrandi brestum í efnahags. og þjóðmálum. Hér á landi hefur hins vegar ekki bólað á atvinnuleysi að neinu ráði, umfram hið staðbundna og tímabundna atvinnuleysi, sem verið hefur á undanförnum árum. Með vinnufriði nú ættum við áfram að geta haft sérstöðu meðal Vesturlanda á þessu sviði.
Ekki væri hægt að hugsa sér betri páskagjöf deiluaðila til sjálfra sín og þjóðarinnar allrar en þá, að þeir notuðu dymbilvikuna vel til að brúa það litla bil, sem enn er milli þeirra í samningunum.
Páskagjöf!
Þjóðin hefur fært sér aðra páskagjöf, þar sem er hið nýja varðskip Týr. Þetta fullkomnasta varðskip flotans á að auka starfsgetu gæzlunnar um allt að 40%. Ráðgert er, að gæzlan afli sér flugvélar í framhaldi af komu varðskipsins. Þegar sú flugvél er komin, á Landhelgisgæzlan að vera fær í flestan sjó, þegar kemur að útfærslu efnahagslögsögu okkar í 200 sjómílur.
Þessi efling Landhelgisgæzlunnar er ein af forsendum þess, að við getum stækkað lögsöguna fyrir næsta vetur, eins og ríkisstjórnin hefur ákveðið. Þess vegna fögnum við öll komu varðskipsins og óskum skipherra þess og áhöfn allra heilla í hinum vandasömu störfum, sem framundan eru við útfærslu efnahagslögsögunnar.
Jónas Kristjánsson
Vísir
