“Loksins”, segja sumir, þegar sagt er frá útkomu nýs dagblaðs á Íslandi. En aðrir spyrja: “Til hvers?”
Hvað tákna yfirlýsingar aðstandenda Dagblaðsins um, að það eigi að vera frjálst og óháð dagblað? Margir efast um, að þetta geti verið satt í landi, þar sem blaðamennska og flokkapólitík. hafa frá upphafi verið í nánum tengslum.
Okkar svar við efasemdunum getur ekki verið annað en að biðja þjóðina um að fylgjast vel með Dagblaðinu frá upphafi og kveða upp dóm sinn í ljósi reynslunnar.
Við erum að leggja upp í risavaxið ævintýri, sem við teljum, að lánist því aðeins, að Dagblaðið verði frjálst og óháð stjórnmálaflokkum og hagsmunaöflum.
Þótt fyrsta tölublaðið sé ekki enn komið út, þegar þetta er ritað, hafa þúsundir manna gerzt áskrifendur Dagblaðsins að eigin frumkvæði. Símalínur blaðsins hafa af þessum sökum verið rauðglóandi í heila viku.
Við vissum, að þörf var fyrir frjálst og óháð dagblað á Íslandi, þrátt fyrir slæma afkomu margra þeirra blaða, sem fyrir eru. En okkur datt ekki í hug, að fyrstu undirtektir yrðu jafn stórfenglegar og áskrifendastraumurinn hefur sýnt.
Við vonum, að þessi bylgja brotni ekki. Við vonum, að almenningur taki okkur vel, sýni okkur nokkra biðlund, þegar okkur mistekst, og gefi okkur tækifæri til að eflast nægilega til að standa undir fyrirheitum okkar.
Flestum mun í fyrstu þykja Dagblaðið minna á Vísi. Það er eðlilegt, því að þorri ritstjórnarinnar er kominn beint af Vísi yfir á Dagblaðið. Við munum í fyrstu að ýmsu leyti móta Dagblaðið með svipuðum hætti og við mótuðum Vísi fram á þetta sumar. Ritstjórn Dagblaðsins er að okkar mati eðlilegt framhald af ritstjórn Vísis.
En við teljum, að kringumstæður okkar séu betri en áður, þannig að við höfum nú tækifæri til að þróa blaðið okkar og ykkar í átt til frjáls og óháðs dagblaðs, dagblaðs nútímans. Við höfum aðstöðu til að gefa út ábyrgt og skemmtilegt blað, heiðarlegt og fjörugt blað, og ætlum að spreyta okkur á því.
Margar hindranir hafa verið lagðar í braut okkar. Við höfum verið eltir með lögbönnum og hótunum um lögbönn. Margir hafa orðið fyrir persónulegu ónæði vegna stuðnings og aðstoðar við okkur. Prentsmiðjan hefur verið kúguð til að láta okkur hafa fremur óhentugan prentunartíma. Og útkoma Dagblaðsins hefur tafizt viku vegna þessara hindrana.
En margar þessara hindrana eru nú að baki. Dagblaðið er komið út, reiðubúið að mæta örlögum sínum, sjálfum dómi íslenzkra blaðalesenda. Því verður unnt að svara smám saman spurningunni “til hvers?” og reyna að uppfylla óskir, þeirra, sem segja “loksins”.
Jónas Kristjánsson
Dagblaðið
