Ekki er sopið kálið, þótt í ausuna sé komið. Vinir Dagblaðsins mega ekki sofna á verðinum, þótt ævintýralega vel hafi gengið fyrstu þrjá mánuði blaðsins. Erfiðustu hjallarnir eru að vísu að baki, en framundan eru margvíslegar hættur, sem Dagblaðið verður að sigrast á með aðstoð lesenda sinna og stuðningsmanna.
Stjórnmálaflokkarnir eru dauðhræddir við Dagblaðið, enda er það á margan hátt ógnun við samtryggingu þeirra. Blaðið þiggur hvorki beina né óbeina styrki af ríkisvaldinu, svo sem hin dagblöðin gera. Þetta þykir stjórnmálamönnunum jafn grábölvað og skrif Dagblaðsins um ýmis mál, sem hin samtryggðu dagblöð mega ekki skrifa um.
Ótti stjórnmálamanna kemur fram í ýmsum myndum. Þeir fylgjast vandlega með greiðslustöðu og skuldbindingastöðu aðstandenda Dagblaðsins og áminna bankastjóra um að veita blaðinu engar eða sem minnstar fyrirgreiðslur. Þar að auki verður vart tilrauna til að gera Dagblaðinu bölvun í prentunarmálum, bæði hvað snertir verðlagningu og útkomutíma.
Dagblaðið þarf því að geta mun meira en staðið undir daglegum rekstri sínum. það þarf að efnast nægilega til þess, að það þurfi ekki á valdakerfinu að halda, hvorki í bankafyrirgreiðslum né í prentsmiðjumálum. Dagblaðið þarf sem fyrst að eignast eigið húsnæði og eigin prentsmiðju til þess að verða sem minnst háð löngum armi stjómmálaflokkanna.
Fyrstu þrjá mánuði ævi sinnar hefur Dagblaðið tryggt sig sæmilega vel í sessi. Það hefur frá fyrsta degi verið annað útbreiddasta dagblað landsins. 21.000 eintaka upplag blaðsins er gernýtt að því marki, sem unnt er að nýta upplag dagblaða. Rúmlega 7500 eintök fara til áskrifenda og afgaangurinn í lausasölu.
Allan þennan tíma hefur lausasalan verið söm og jöfn, en áskrifendum fjölgað, fyrst mjög ört og síðan hægt og sígandi. Vinir Dagblaðsins þurfa nú að taka saman höndum um að örva þennan straum lesenda til Dagblaðsins, svo að blaðið verði sem fljótast að ná tilgangi sínum.
Það er einkar athyglisvert, að Dagblaðið er orðið helzti smáauglýsingamiðill landsins. Blaðið birtir tvöfalt fleiri nýjar, áður óbirtar smáauglýsingar en nokkurt annað íslenzkt dagblað. Þetta sýnir betur en nokkuð annað, hvílíkri rótfestu Dagblaðið hefur náð á örskömmum tíma.
Þessi velgengni fyrstu þriggja mánaðanna hefur valdið því, að daglegar tekjur hafa verið nokkuð umfram dagleg gjöld. Stofnkostnaður Dagblaðsins hefur því greiðzt niður tiltölulega ört. Það eru því góðar horfur á, að sú ósk rætist, að hlutaféð megi eingöngu nota til fjárfestingar.
Eftir gerðardóminn um prentunarkjörin þarf Dagblaðið að sæta tilraunum andstæðinga sinna til að spilla útkomutíma blaðsins. Fyrir bragðið kunna margir áskrifendur þess að fá það nokkuð seint heim til sín. Við biðjum þá að sýna okkur biðlund yfir háveturinn, meðan við erum að koma okkur upp þeirri aðstöðu, að enginn geti sett Dagblaðinu og lesendum þess stólinn fyrir dyrnar.
Jónas Kristjánsson
Dagblaðið
