Tveggja ára afmæli Dagblaðsins er í dag. Slíkt afmæli væri varla talið merkisafmæli, ef menn hafa ekki í huga, að frjáls og óháð blöð hafa hingað til verið skammlíf á Íslandi.
Dagblaðið er hins vegar á tveggja ára afmælinu komið úr lífshættu. Liðin er sú tíð, að menn vissu ekki í dag, hvort blaðið kæmi út á morgun. Fjárhagur blaðsins er orðinn nógu traustur til að bægja frá öllum hættum, ef lesendur slá skjaldborg um blaðið hér eftir sem hingað til.
Þegar Dagblaðið horfir nú fram á veginn á tveggja ára afmæli sínu, er starfsliði þess efst í huga að læra af reynslunni og slá hvergi af þeim grundvallarsjónarmiðum, sem blaðið byggir á tilveru sína og tilverurétt.
Í fyrsta lagi verður Dagblaðið innlent fréttablað, sem stefnir að því að birta meiri, dýpri og betri fréttir, ekki sízt af málum, sem lágu í þagnargildi hjá flokksblöðunum, er höfðu og hafa annarra hagsmuna að gæta en lesenda sinna.
Í öðru lagi verður Dagblaðið áfram innlent skoðanablað, sem stefnir að því að birta fleiri, dýpri og fjölbreyttari skoðanir en unnt hefur verið að bera á borð í flokksblöðunum. Hundruð hæfra manna hafa notað þetta tækifæri til að láta að sér kveða utan flokksklafa.
Í þriðja lagi verður Dagblaðið áfram frjálst og óháð dagblað. Í næstu kosningum mun það ekki styðja neinn ákveðinn stjórnmálaflokk, hvorki á beinan né óbeinan hátt. Verður það væntanlega eina dagblaðið, sem stendur þá ofan við bardaga flokkanna og segir lesendum hlutlaust frá gangi orrustunnar.
Dagblaðið hyggst ekki aðeins vera áfram óháð stjórnmálaflokkunum, heldur einnig helztu hagsmunaöflum og þrýstihópum þjóðfélagsins. Hin blöðin eru bundin á ýmsa slíka klafa auk flokksklafans. Morgunblaðið og Vísir gæta hagsmuna láglaunastefnu af mikilli hörku, svo að dæmi sé nefnt.
Þeir þrír hornsteinar Dagblaðsins, sem hér hafa verið nefndir, eiga verulegan þátt í að treysta stöðu blaðsins sem næstmest selda blaðs landsins. Með 25.000 eintaka upplagi hefur það stungið af litlu blöðin, því að langt bil er í þriðja blaðið, Vísi, með 17.000 eintök. Nálgast Dagblaðið nú óðum upplagssvið sjálfs risans, Morgunblaðsins.
Þetta hefur gert Dagblaðinu kleift að marka djúp spor á aðeins tveggja ára ferli þess. Það hefur haft bolmagn til að rjúfa skarð í einokun stjórnmálaflokkanna á íslenzkri fjölmiðlun og í þá samtryggingu, sem einokuninni hefur fylgt. Dagblaðið hefur veitt lesendum innsýn í mál, sem þeir fengu áður ekkert að vita um.
Því fleiri lesendur sem slá skjaldborg um Dagblaðið, þeim mun betur mun blaðinu takast að gegna hlutverki sínu sem frjáls og óháðs frétta- og skoðanablaðs. Hagsmunir Dagblaðsins fara saman við hagsmuni borgara landsins, sem til skamms tíma hafa verið meðhöndlaðir eins og ósjálfráða börn.
Notum því tveggja ára afmælið til að hraða og efla sókn Dagblaðsins og lesenda þess.
Jónas Kristjánsson
Dagblaðið
