Snemma vorar við Hrunaheiðar þetta árið. Er búinn að fara tvær ferðir með reiðhesta úr Reykjavík upp að Kaldbak. Þeim líður þar vel, líta ekki við heyi. Þetta er í 200 metra hæð yfir sjávarmáli og 60 km frá sjó. Þeir vilja heldur nýgresið á skurðbökkum og fornum túnum. Ásgeir bóndi segir þetta eitt fljótasta vorið á Kaldbak í hans minni. Það stendur á endum, að allt hey er að verða búið eftir harðan vetur. Í vikunni fara síðustu hestarnir uppeftir. Þá er öll útgerðin komin í heiðina og júní samt ekki hafinn. Nú er kominn sá tími, að lofthiti á heiðarbýlum er hærri en niðri við strönd.
