Skömmu fyrir þriggja ára afmæli Dagblaðsins, sem er einmitt í dag, náði blaðið merkum áfanga í útbreiðslu sinni. Áskrifendur þess urðu fleiri en 14.000 samtals.
Þar með hefur Dagblaðið náð því jafnvægi, að helmingur hinna 28.000 eintaka blaðsins selzt í áskrift og helmingurinn í lausasölu. Að þessu leyti er blaðið ekki dæmigert síðdegisblað.
Þetta jafnvægi á sér hliðstæðu í öðru jafnvægi, sem blaðið hefur náð á þremur upphafsárum sínum. Það hefur náð jafnri dreifingu um allt land. Það selzt í svipuðum hlutföllum á norðausturhorninu og suðvesturhorninu.
Dagblaðið hefur gersamlega stungið önnur blöð af í baráttunni um annað sætið í sölu, en á nokkuð í land að ná útbreiðslu Morgunblaðsins. Víða er blaðið þó komið í efsta sæti, svo sem sums staðar á Suðurnesjum, Snæfellsnesi og Austfjörðum.
Auglýsendur eru búnir að átta sig á staðreyndum útbreiðslunnar, þrátt fyrir marklausar fullyrðingar annarra blaða um eigið upplag. Þeir hafa á undanförnum mánuðum beint auglýsingum sínum í vaxandi mæli til Dagblaðsins.
Það hefur líka komið í ljós, að Dagblaðið og Morgunblaðið eru einu blöðin, sem þora að fela hlutlausum aðila að hafa eftirlit með upplagi og sölu og birtingar á opinberum vettvangi.
Þessi þróun endurspeglast jafnt og þétt í fjárhagslegri stöðu Dagblaðsins, sem verður traustari með hverju árinu, er blaðið skilar hagnaði. Á væntanlegum aðalfundi fyrir árið 1977 mun koma í ljós meiri hagnaður en varð árið á undan.
Hagnaðurinn þyrfti hins vegar að vera meiri, því að Dagblaðið er ungt og þarf að byggja sig ört upp með auknum húsa- og tækjakosti. Á þeim sviðum eru þarfirnar svo miklar, að sjaldan er króna í kassanum.
Frjálst og óháð dagblað þarf helzt að eiga sitt eigið húsnæði og tækjakost og ekki vera komið upp á neina valdaaðila í þjóðfélaginu. Að þessu er markvisst stefnt með kaupum á húsnæði, innréttingu þess, kaupum á tölvum og öðrum tækjabúnaði af fullkomnustu gerð.
Á þessum sviðum hefur orðið ánægjuleg þróun á þriðja starfsári Dagblaðsins. Vonandi sjá viðskiptavinir blaðsins um, að þessi þróun verði enn örari á fjórða æviárinu, sem nú fer í hönd.
Dagblaðið hefur nú staðizt eldraun tveggja kosninga á einu sumri. Hrakspárnar um, að blaðið mundi ekki reynast frjálst og óháð, rættust ekki. Einn kosningastjórinn sagði við höfund þessa dálks: “Þið fáið 9,5 fyrir óhlutdrægni í kosningabaráttunni”.
Dagblaðið er stolt af því að hafa verið eina blaðið, sem ekki tengdist beint né óbeint neinum stjórnmálaflokki í kosningabaráttunni. Blaðið skipulagði jafnan aðgang stuðningsmanna allra flokka að skoðanasíðum blaðsins.
Hitt er svo annað mál, að sumir voru duglegri en aðrir við að notfæra sér þessa möguleika. Blaðið reyndi að jafna þetta með því að hvetja þá síðarnefndu til að skrifa.
Eins og almennu fréttirnar í Dagblaðinu gera þá endurspegla kjallaragreinarnar, að blaðið er fjölmiðill en ekki áróðursgagn. Þar geta landsmenn lesið daglegar fréttir og daglegar skoðanir án matreiðslu af hálfu pólítískra hagsmunaaðila.
Við lofuðum þessu á sínum tíma. Sumir trúðu þá, en aðrir ekki. Í sumar hefur hinum vantrúuðu fækkað verulega. Líklega er það veigamesti orsakavaldur söluaukningarinnar í sumar.
Jónas Kristjánsson
Dagblaðið
