Samanburður á stjórnkerfi ríkisins og Reykjavíkur er höfuðstaðnum yfirleitt hagstæður. Til dæmis er á vegum Reykjavíkurborgar meira starfað fyrir opnum tjöldum. Fjölmiðlum eru sendar allar fundargerðir ráða og nefnda á vegum borgarinnar, en hið sama er ekki unnt að segja um ríkisvaldið. Fjölmiðlum reynist tiltölulega auðvelt að veita almenningi innsýn í starfsemi borgarinnar, en fremur erfitt að lýsa inn í myrkvið ríkiskerfisins.
Athyglisvert er, hve mikla áherzlu borgarstjórinn leggur á að vita því sem næst allt um allan rekstur borgarinnar. Þetta kom greinilega fram á fundum hans í hverfunum fyrr í vetur. Spyrjendum reyndist útilokað að koma að tómum kofunum hjá honum. Hann hafði jafnvel á hraðbergi svör við spurningum um einstaka ljósastaura. Svona nákvæm þekking er algeng hjá stjórnendum í einkarekstri, en fremur sjaldgæf hjá stjórnendum í opinberum rekstri.
Að undanförnu hefur verið haldin á Kjarvalsstöðum sýning á nýjum tillögum að skipulagi Reykjavíkur, sem skipulagsnefnd borgarinnar hefur samþykkt og sent borgarráði og borgarstjórn til meðferðar. Með sýningunni vilja borgaryfirvöld kynna borgarbúum tillögur og hugmyndir skipulagsnefndar, svo að þeir geti komið fram með sínar ábendingar og athugasemdir, áður en skipulagið er endanlega samþykkt.
Þetta er ólíkt vinnubrögðum ríkisvaldsins, sem sendir tillögur sínar aðeins til umsagnar sérfræðinga og hagsmunahópa, en reynir ekki að laða almenning til samstarfs. Að vísu er enn ekki ljóst, hvaða árangur næst af tilraunum Reykjavíkurborgar til samstarfs við borgarbúa um skipulagsmál, en borgin hefur þó með sýningunni reynt að leggja sig fram á því sviði.
Skipulagssýningin er fremur ýtarleg. Áhugamenn geta verið þar dögum saman, ef þeir hyggjast komast yfir alla þætti hennar. Auðvelt er að kynnast þeirri hugsun, sem liggur að baki tillagnanna, og auðvelt að átta sig á áhrifum þeirra. Einkum er fjallað ýtarlega um ákveðna þætti, svo sem framtíðarbyggð norðan Grafarvogs og að lögsögu Mosfellssveitar, endurnýjun gamla miðbæjarins og uppbyggingu nýja miðbæjarins, hafnarsvæðin, frekari þróun Breiðholts og um gatnakerfi framtíðarinnar.
Væntanlega verður á næstunni reynt í leiðara Dagblaðsins að fjalla um ýmsa þætti sýningarinnar og gagnrýna sumt, sem þar kemur fram. Mun blaðið þannig fyrir sitt leyti reyna að verða við hvatningu borgaryfirvalda, sem láta liggja frammi á sýningunni pappír og skriffæri, svo að menn geti párað hugmyndir sínar á blað og sett í sérstakan kassa, er þar trónir á áberandi stað.
Ekki er nóg með, að borgin bjóði upp á þessa ýtarlegu sýningu og hugmyndabankann. Í kynningarbæklingi sýningarinnar er bent á, að þar sé ekki unnt að sýna alla þá vinnu, sem liggi að baki sýningunni. Öllum er því gefinn kostur á að koma í Þróunarstofnun Reykjavíkurborgar og fá þar svarað frekari spurningum í einstökum atriðum og fá aðgang að greinargerðum um einstök atriði.
Þessi viðhorf Reykjavíkurborgar gagnvart almenningi eru til sóma og fyrirmyndar.
Jónas Kristjánsson
Dagblaðið
