Baráttublöð Breta á lslandi, Morgunblaðið og Vísir, hafa að undanförnu flutt svo sérkennilegar röksemdir til stuðnings stórhættulegum landhelgissamningi við Breta, að ætla mætti, að þau séu endanlega slitin úr tengslum við mannlíf á Íslandi.
Broslegastar eru tilraunir Morgunblaðsins og Vísis til að halda því fram, að Lúðvík Jósepsson styðji samninga við Breta. Verður ekki séð, að málstaðinn skipti nokkru, hvort Lúðvík styður hann eða ekki. Hingað til hefur Lúðvík ekki verið talinn neitt nauðsynlegt átrúnaóargoð í augum annarra en sumra flokksbræðra sinna.
Seint verður úr því skorið, hvort Lúðvík mismælti sig í viðtali við annað baráttublaðið eða hvort rangt var eftir honum haft. Ef hið fyrra er rétt, á hann alténd leiðréttingu orða sinna. Og síðan hefur hann margsinnis sagzt vera andvígur þessum samningum.
Lúðvík ætti að vita bezt sjálfur um eigin skoðanir og ekki að þurfa túlkun Morgunblaðsins og Vísis. En það er til marks um undarlegan hugsunarhátt baráttublaða Breta, að þau skuli dag eftir dag hafa eytt rúmi í að reyna að nudda því inn í fólk, að Lúðvík hafi í umræddu viótali sagt eitthvað, sem túlka mætti sem stuðning við samninga við Breta. Hvað svo?
Alvarlegra dæmi um hinar sérkennilegu hugsanabrautir er Reykjavíkurbréf Morgunblaðsins á sunnudaginn. Þar eru rakin nokkur atriði, sem blaðið segir uppistöðuna í málflutningi andstæðinga samninga við Breta. Þessi atriði eru aðeins til í hugarheimi höfundar bréfsins.
Ekki er þar vikið einu orði að þeirri gagnrýni, sem þyngst er á metunum. Ekkert er minnzt á áhyggjur manna út af því, aó bókun númer sex um viðskipti Íslands og Efnahagsbandalagsins muni aftur falla úr gildi að sex mánaða samningstíma liðnum. Ekkert er minnzt á áhyggjur manna út af því, aó þá muni Bretar hafa sterka aðstöðu til að heimta óbreytt framhaldsréttindi sér til handa.
Kjarni málsins er þessi: Bráðabirgðasamningur við Breta leiðir til þess að bókunin umrædda tekur gildi og að við förum að flytja fiskafurðir til ríkja bandalagsins. Einkum mun lagmetisiðnaðurinn hugsa sér gott til glóðarinnar og leggja í mikinn kostnað við öflun evrópskra markaða. Að sex mánuðum liðnum yrðu það þung spor fyrir ríkisstjórnina að valda þessum útflutningi vandræðum með því að sýna festu í nýjum samningum við Breta.
Þá munu Bretar koma og segja: Við höfum ekki viðurkennt neinar 200 mílur. Ekki kemur til mála að fækka skipum okkar á Íslandsmiðum, né draga úr aflamagni okkar. Í mesta lagi erum við tilbúnir að fallast á óbreytt ástand næstu árin. Ef þið eruð með eitthvert múður, fellur bókun sex úr gildi og útflutningsatvinnuvegir ykkar verða fyrir miklu tjóni eftir aó hafa eytt milljónum í að komast inn á evrópska markaði.
Hér í Dagblaðinu var ríkisstjórnin strax í upphafi vöruð við þessu bragði Breta. Baráttublöðum Breta er mikið í mun, að ríkisstjórnin hlusti ekki á þessar aðvaranir og ani heldur beint út í ófæruna. Þess vegna þyrla þau upp ryki út af lítilfjörlegum hliðaratriðum.
Jónas Kristjánsson
Dagblaðið
